05 فبراير، 2009

غزة ... وإعلامنا الهداف جداااااااا








New Page 1

أنا بحس إن الفايدة الوحيدة من
إنقطاع التيار الكهربى فى غزة
إنهم بيتحرموا من برامج التلفزيون الممتعة بتاعتنا
يعنى تخيلوا واحد ولاده ماتوا والقصف شغال فوق دماغه

ومش لاقى لا دوا ولا أكل
وبيفتح التلفزيون لقى قناة مشغلة بورنوا كليب
وثقافة الغناء على السرير

او فيلم كوميدى ... هادف أوى يعنى

وياسلام لو مسلسل عربى أو مكسيكى
ده كده مش هيموت من الصواريخ .. ده هيموت بالذبحة الصدرية
ومش بعيد يروح يرمى نفسه تحت أى قنبلة نازلة من طيارة علشان يخلص
----
ولا حتى برنامج مستضيف نجم لامع
وبعد ما اتكلم عن أخبار المعجبات بتوعه الكتار أوى أوى يعنى
وبعد ما قعد يقول كام نكتة بايخة ويضحك عليهم مع الجمهور
المدفوع ليه مسبقاً

وبعد ما المذيع أثنى عليه والمكالمات التلفونية ظبطته
أنتفش وأنتعش ...
قال ياجماعة أنا قررت أجاهد مع إخواننا فى فلسطين
وقام عدل النضارة الشمس .. وطلع اللبانة من بقه
وفتح أخر زرار من القميص كان سايبه مقفول
مستعرضاً عضلاته الغير مفتولة .. ولمؤاخذة شعر صدره
ده حكيكى .. انا هملت أوغنيه كتيته لفلستين
ويبدأ يغنى .. ولو لاحظنا إنفعالاته ونظرات عنيه أثناء الأغنية
تحسسك انه مارتن لوثر كينج فى إحدى خطبه العصماء
مدافعاً عن الأقليات ومطالباً بحق المساواة

وبعد سيل من الإشادة والتثبيت
سواء من المذيع أو المكالمات المتأجرة
تظهر عليه أعراض البارانويا ويفتكر نفسه مالكوم اكس

وإنه المقاوم والمجاهد والمناضل فى سبيل
القضايا العربية

جماعااااااااء جمعااااااااء جمعاااااااااااء

ملحوظة الأخ اللى بيطلق على نفسه لقب ملك الجيل ولا
مش عارف نجم الجيل
أنا مش عارف أى جيل ده اللى الواد ده نجمه .. بس لو جيلى فأنا منحسب

ده أنا أرجع لجيل نوال هانم ورشدى باشا وسعيده مباركة أحسن
-----

أو لو مغنية .. بتبقى ألذ حقيقى

لأنها فى الغالب بتظهر بفستان أسود ..

وده طبعاً حداداً على أرواح الشهداء من الأطفال والشيوخ
وتعاطفاً مع النساء الثكالى والأطفال اليتامى
بغض النظر عن كونها تركت العنان لشعرها الجميل اللامع لينساب على خدها
وكل شويه ينزل وهيه تشيله .. ينزل وهيه تشيله

ومفيش مانع لو منزلش .. تنزله هيه وبعدين تشيله

مع بعض النظرات الناقمة على مصفف الشعر
اللى ضحك عليها وقالها وحياة ربنا هينزل لوحده يا حبيبتى

وبعدين تقعد وتحط رجل على رجل لتظهر عن ساقيها
ده بغض النظر برضه عن ظهور أأ.. و ... أحم يلام مش مهم

يعنى من الأخر الفستان فاقد لوظيفته الأساسية اللى هيه التغطية

وبرضه تبدأ تغنى لفلستين .. وللجهاد والمقاومة والنضال

ونفس النظرات والإنفعالات اللى مبنشفهاش غير على وجوه الخطباء اليساريين
المناضلين

----
ولا لو وقع على قناة من بتاعة الفقرات الإعلانية التى يتخللها
بعض المشاهد من الأفلام الأجنبية أو المسلسلات المدبلجة

____

ولا على أحسن الأحوال لو فتح قناة إخبارية
لو سلم من برامج تقطيع الهدوم وتكسير العظام

(بتاع عفواً سأتيح لك المجال ..

أنت فاشى ديماغوغى ديكتاتورى .. بل أنت إمبريالى توسعى برجوازى

إنت راديكالى متخلف .. بقى كده

طيب ودين أمى لأقطعك

والمذيع يقعد يسلك بينهم ...صلو على النبى يا جدعان)

-

مش هيسلم من برامج المداخلات التلفونية التافهة والعقيمة
وتحس ان ناس مريضة نفسياً ومعندهمش أى مؤهلات إنهم يتكلموا فى السياسة
غير وجود خط تليفون مباشر جنبهم

-

ولو سلموا من كل ده مش هيسلموا من أخبار خناقات القادة والزعماء العرب

يا إما القمة تتعمل عندى يا إما وربنا مش لاعب .. مش معنى عندك بقى يا خويا؟؟

طيب أنا هعملها وعاوز تحضر إحضر مش عاوز خليك

طيب أما مش هحضر ومش هخلى الناس بتوعى كمان يحضروا .. هه بس

-

أو من الأخبار اللى بتدس السم فى العسل ومليانة مزايدات وإشتغالات وإفتكاسات

وبتخلى شوية عيال من مواليد ستة الصبح يبقوا ابطال

-

هل بقى لو شافو فى غزة الحاجات دى

هل فيه أمل إن التلفزيون ميتكسرش ؟؟

ولا هيتكسر يعنى هيتكسر بحركة لا أرداية ويصاحب صوت التحطيم

بعض الألفاظ النابية واللعنات المتساقطة علينا

ربنا يهديهم .. ويهدينا





هناك تعليقان (2):

رئيس التحرير يقول...

بسم الله الرحمن الرحيم
السلام عليكم ورحمه الله وبركاته
انه لشرف عظيم لي ان تسجل أعجابك بمدونتي...لا بل دخولك وحده هو الشرف. سيدي ...اشكر لك كثيرا زيارتك لمدونتي و يسعدني كثيرا ان نتفق في الرأئ و اجدني مع صديق جديد انا به سعيد ...نشقي سويا في هموم تلك الأمه .
لا يفوتني تسجيل أعجابي الشديد بأسلوبكم الساخر الساحر...في معالجه انقطاع الكهرباء عن غزه . انا اعتقد ان انقطاع الكهرباء عن غزه يقابله انقطاء الحياء عند البث الاظلامي لقنواتنا المحترمه.
لك كل التقدير ...واتمني ان يدوم الوصل .

د. ياسر عمر عبد الفتاح يقول...

مروروك فى حد ذاتة شهادة صح أن توضع فى إطار وتعلق على ناصيتى وتعليقك نيشان من درجة أولى ذهبية
فكيف وقد اهديتى شرف لا ارانى استحقه وهو صداقتك
مقاقى يبدوا مناسباً كتلميذِ يشقى أيضاً فى هموم الأمة

وشرف كبير أن يعجبك اسلوبى المتواضع وسعيد بأن توافق رايى مع ما ترى
دمت بود .. دمت بحب
دمت كما أنت وأفضا إن شاء الله.