30 مارس، 2009

ومضات جديدة

ومضــــات

لمعرفة أصل ومضات
وسبب تسميتها يرجى زيارة الرابط التالى
المقدمة

*أغلبُ الناسِ يتعلمون كيف ينجحون

ولكنهم يغفلون غالباً عن تعلمِاذا ما فشلوا كيف يفشلون

لذا قسقطاتُهم دائماً مدويةٌ

ويتبعها تتر النهايةِ

The END



*إن نجاحَ انسانٍ لا يقاسُ

بمقدارِ ما حقَقَه من إنجازاتٍ

فقط

ولكن يقاسُ ايضاً

بعددِالاخفاقاتِ التى تجاوزها بسلام.



*شخص لم يخفق مرارً

فإنه

فى الغالبِ لن ينجح ابداً.


HTML clipboard

*لا تبتدأ شيئاً لا تستطيع استكماله

أو فلتضع إحتمالات فشله دائماً نصب عينيك

وذلك على اى حال خير من ان تتفاجأ بها دون سابق انذار.


*اذا كان عليك ان تخسر ...

فاخسر كما الفرسان

فإنهم لا يسقطونَ سريعاً ..

ولا يحبذونَ الرقودَطويلاً

ويقاتلون حتى النهاية بلا يأسٍ ولا استسلام.



*يقولون إن الاخفاقاتِ عثراتٌ فى الطريق

دعونى اختلف معكم فى حرفٍ واحد

فالاخفاقاتُ عثراتٌ الى الطريق

فكل اخفاقه تدلك على طريق خاطىء لا يجب السير فيه

وتقلل امامك الاحتمالات لمعرفة الطريق الصحيح.



*لان تظهر بصورةِ النبيلِ لتخفى وقاحتَك

خيرٌ الف مرة من ان تؤذينا بجلفك.

*انت تعيش اياماً معدوده ... ممها طالت فهى قصيره

حقيقه مجردة ... نتناساها دائماً

ولو تذكرناها دائماً ما عرف الحزن لنا فجاً.



*الحبُ والشهواتُ كالجمرات

ينفخ الانسانُ فيها بنفسِه

حتى تستعر وتشتدُ نيرانُها

لتحرقَه فى النهايه .



*كونك إنساناً عادياً

فى مغبة هذا الزمن _ الغير عادى_

لشىء يستحق الإشادة والتقدير.



*كن مرناً

إن الإطارات لما صنعت من الحديد تهشمت

ولما صنعت من المطاط صمدت.



29 مارس، 2009

تاج من خالتى ستيتة

تاج هدية من خالتى ستيتة


أسمك؟

ياسر عمر عبد الفتاح


المشهور بيه وسط صاحبك؟


ياسر عمر عبد الفتاح

وساعات ياسو
ومرات ياسور
وواحد صاحبى بيقولى يا يوتو


سنك؟

23 سنة ..

بس مش عارف ليه
الناس بتفتكرنى عجوز


مجال دراستك؟

الصيدلة


أسم مدونتك؟

ومضات


صورتك الرمزية في المدونة بتعبر عن أيه؟

الكائن الصيدلى


هل فكرت في أغلاق المدونة؟ والسبب؟


ده إحنا لسه بنقول يا هادى

ومكملتش فى التدوين 3 شهور لسة


أيه رد فعلك لو حد قل أدبه عليك في تعليق؟

هلغى الرد بتاعه وخلاص ...

يعنى هعمل ايه يعنى

هقتله يعنى؟؟


أسوء مدونة؟

أى مدونة تسول لصاحبها نفسه إنه يتعدى القدسية الدينية

وإنه يتجرأ فى الكلام بدون علم ويعك الدنيا

ارغى براحتك ..
بس لحد الدين وستوب


هيحصل أيه للإيميل بعد ما تموت؟


محمد أخويا هيدخل من على الجهاز وطبعاً الباسورد متسجل

وهيقول للناس ياسر مات .. وادعوله

بس يارب يلاقى قصة حلوة عن حسن الخاتمة يفرح بيها أصحابى(قصة حقيقية يعنى)


أديت الباسوورد لحد قبل كده؟

لالا


السفر بالنسبة لك؟

حاجة حلوة بس متطولش


المود بتاعك ايه؟

أنا ليا خمسين مود

مود كئيب ومود مجنون هادى ومود فيلسوف ومود دكتور ومود ضحك هيستيرى وحاجات كثير

لكن أهم حاجة
إنهم كلهم المفترض إن يشملهم مود متدين (المفروووض)


بتعمل أيه في وقت فراغك؟

عادى يعنى


الأكلة المفضلة؟

كثير يعنى

مش أكلة محددة


الصفات التي أخذتها عن والدك؟


الرجوووووووووووووولة

مع شوية حاجات تانية كثير


الصفات التي أخذتها من والدتك؟

الطيبة

مع شوية حاجات أكثر


اكثر ست حاجات بتكرهها؟

حاجات كثير ..
ومبحبش الأسئلة دى


اكثر ست حاجات بتحبهم؟

نفس الإجابة اللى فاتت


شخصيتك نوعها أيه؟

بيجو 307

يعنى ايه نوعها ايه؟

أنماط الإنسان بتختلف بتغير المكان والزمان والصحبة

ومفيش حد بيستمر على وتيرة واحدة أبدا

شخصية عادية وديماً بفخر بكونى عادى


لماذا دخلت عالم التدوين من الأساس؟

دخلته علشان
حاجات كثير أوى

لأنه عالم تانى
مختلف وموازى للعالم الحقيقى ومليان كل الإتجاهات والأفكار
مليان ثقافة
وأدب وناس بتفكر وشخصيات محترمة وعقول ناضجة وبرضه فيه قلة أدب وناس قذرة

كان لازم أجى أقيس نفسة بالنسبة ليهم كلهم ..


أحلى جملة قيلت في وصف مدونتك؟

مش عارف

محدش وصف مدونتى تقريباً قبل غير بكلمات عادية

زى جميلة ورائعة
ومتميزة والكلام بتاع المجاملات ده


أهمية التعليقات بالنسبة لك؟

زى أهمية الجماهير بالنسبة للعيب الكورة

تشجيع وتقويم


احلى بوست كتبته؟ وضع اللينك ثم أذكر السبب؟

بوستات ومضات كلها

وعصور الضياء


افضل مدونة قرأتها؟

مبتتحسبش كده

مينفعش أقيس مدونة سياسية بمدوة دينية

أو مدونة أدبية بمدونة شخصية

بس فيه مدونات جميلة كثير بتعجبنى

مدونة تيمى تظبيط

ومدونة عمنا فشكول

ومدونة رئيس التحرير وهنا العزبة

ومدنة محمد غالية

ومدونة خالتى طبعاً ستيتة ملهاش حل

مدونة دكتور عرفة الإعلانية بتفيدنى وبتعجبنى

مدونات الأخوات غربتى وسلمى وأمة الله وصفاء 

وكل المدونات اللى على الريدر بتعجبنى طبعاً

كلهم كلهم وشكر خاص لكل الناس اللى على الريدر

ولولا ضيق الوقت كنت نقلتهم كلهم


أفضل بوست قرأته؟

كتير قوي وظلم أني أحدد بوست واحد ..


الشغل بالنسبة لك؟

أنا


الأنترنت بالنسبة لك؟

ليلُ سرمدىُ حالم

وكنز لكل باحث غانم

ونهار مشرق سالم

وضجيج عالى وزحام قاتم


تمرر التاج ده لمين؟

لا مفيش

(رخامة)


28 مارس، 2009

مجلة رؤية مصرية

مجلة رؤية مصرية
إنهاردة السبت يا جماعة نزل أول عدد من
مجلة رؤية مصرية
دى مجلة إلكترونية ناشئة ..
إحنا كمدونين اللى بنقدمها وبنكتبها


أنا بدعوكم جميعاً لزيارتها والمشاركة فيها ككتاب وكمعليقين ومساندين
أنا شخصياً كان ليا الشرف بنزول موضوعين بقلمى فيها


بنهنى نفسنا بمجلة رؤية مصرية ..
وبنتمنالها التقدم والإزدهار


أى حد عنده إضافة أو موضوع للعدد القادم يبعت على الميل ده
ibrahemaladawy@gmail.com
وهمه بيرحبوا بالجميع

24 مارس، 2009

عُصُوْرُ الضِّيَـاء

عُـصُــوْرُ الضِّيَــاء


أَينَ الطَّريْقُ وَأَيْنَ الحَيَاة ؟
وَكَيْفَ العُبُوْرُ لِشَطِ النَّجَاة
وَكَيْفَ سَيُحْيِِّى العَمَارُ الفَلاة

فَمَازِلْتُ بَيْنَ الدُرُوبِ أَسِير
وَمَازِلْتُ أَحْيَا حَيَاةَ الأَسِير
وأَرْنُو لِصَوتِ غِنَاءِ الغَدِير


أُعَفِرُ وَجْهِى بِمِلْحِ السِِّنِين
وَأَرْحَلُ فِى كلِ وقتٍ وَحِيْن
وَأَرْشُفُ مَاءَ بحُوْرِ الحَنِيْن


أُحَاوِلُ قَطْفَ وَمِيضِ النُّجُوم
وَأَرفَعُ رَأسِى لِشَرفٍ مَرُوم
وأَغمِضُ عَينِى بِحُلْمٍ يَدُوم


أُنَاضلُ جَيْشَ الليَالِى الظَلِيمَة
وءأسرُ عِنْدَ الصَّبَاحِ الغَنِيمَة
وَأَهْفُو لِنَصْرٍ يُعِيْدُ العَزِيمَة

أُقَاوِمُ يَأْسَاً يُثيِرُ المَنَايَا
وَأَهْجُرُ بُؤْسِى وَضِيقَ الزَّوَايَا
وَأقهَرُ زَيْفَ ظِلَالِ المَرَايَا


سَأَمضِى حَثِيثَاً لضَىِّ المَنَار
وَدِفْىءِ الأخُوةِ عِنْدَ الدِّيَار
ونحرِ دُجَايَا بِسِيفِ النَّهَار


سَأَحْضُرُ حَفْلَ إِنْتِهَاءِ الشَّقَاء
وَأَرْقُبُ فَجراً يَشُقُ السَمَاء
لِيُعلِنَ فَوراً عُصُورَ الضِيَاء

(بقلمى)




 


أنا كنت حيران ومش عارف أنزل ايه
قصدى طبعاً غيه ولا إيه ولا إيه
إنتم عارفين طبعاً مواهبى متعددة
(وش مغرور)
واستقريت فى الأخر على الشعر
يارب يعجبكم .. عاوز رأيكم بجد

22 مارس، 2009

لولولىىىىىىىىىىىى

حد معاه فرد ..؟؟؟
فرد ..!!؟؟

ايه متعرفوش الفرد
طيب حد معاه كلاشينكوف أو رشاش ألى أو بندقية أو حتى مسدس؟
طيب مفيش حد معاه صواريخ أرض جو أو أرض أرض أو حتى قنبلة يدوية
يا جماعة أى رمانة ناسفة ..!!

طيب أكيد معاكم صواريخ وبمب
أه من بتاعة العيد ...
لا بقى
لو مش معاكم انزلوا اشتروا من أى سوبر ماركو

يا جدعان عاوز ضرب نار ... عاوز مفرقعات
أنا نجحت ...

هوه أنا صحيح أخدت جميع درجات الرأفة اللى حد يقدر ياخدها

بس اسمه نجاح برضه
والله العظيم جبتها من الكنترول وقالولى نجحت
(تبقى مصيبة لو طلعت غلط بعد الزيظة دى كلها)

أنا بقى ناوى أعمل إحتفالية ولا بتاعة مئوية النادى الأهلى
وهجيب برشلونة ومانشيستر وانتر ميلان كمان
ووو.. عاوز أجيب بتاع ريال مدريد
بس تقريباً المدرب بتاعم الخط بتاعه اتصالات .. وأنا فودافون
الدقيقة هتبقى 40 قرش ... مش عارف بقى

ما حد يسمعنا كده زغروطة ولا أى حاجة بقى
سايبينى عمال أرغى من الصبح .. ومحدش معبرنى
هوه انتم جايين تهنوا واحد محروق


تحية كبيرة جداً جداً جداً لكل الناس اللى عبرتى فى البوستين الى فاتوا
بجد ربنا يكرمكم .. نفسى أرد على كل واحد ووحداية
بس بصراحة مش فاضى

أصل الفراغ واخد كل وقتى


يلا بقى شوفوا هتجوبولى ايه هدية


 

أخر كلام

معلش أنا عارف إنى تقلت عليكم كلكم
وعاوز بجد أشكر كل الناس اللى دعيتلى
وإن شاء الله ربنا يجعلهم نصيب من دعائهم
ّ
~
 بنسبة كبيرة جداً جداً جداً
النتيجة هتبقى بكرة إن شاء الله
~
فيه أخبار كويسة جاية من الكنترول ..
وبيقولوا إن النتيجة حلوة عامةً
~
متنسونيش فى دعائكم
وربنا ييسر الحال

09 مارس، 2009

دعواتكم معانا

أعلن أنا المالك الشرعى لهذه المدونة
(ومضات)
تعليق كافة الأنشطة التدوينية بها لحين التأكد من نجاحى
وخروجى خالى الوفاض (قولوا يارب) من الترم الأول ..
وربنا يستر

أدعولنا معاكم ...
متنسوش أخوكم فى الدعاء


عااااااااااااااوز أتخرج بقىىىىىىىىىىىى

04 مارس، 2009

فوائد طوابير العيش

الأسباب الجوهرية والفوائد المجنية من طوابير العيش المصرية

أصدرت وزارة التموين نشرة عاجلة رداً على الهجوم المعلن فى وسائل الإعلام المتعددة على ظاهرة إنتشار طوابير العيش بشدة فى جميع قرى ومحافظات مصر.
وقد أوضحت الوزارة فى نشرتها أسباب تطبيق تلك السياسة والفوائد والأهداف المرجوة منها.
وقد جاء البيان وافياً ومقنعاً ومنظماً فى عدة نقاط ومنها:

1-تعمل تلك الطوابير على إرساء جو من الألفة والمحبة بين أعضاء الطابور الواحد نظراً لقضائهم فترات طويلة من حياتهم معاً فى مكان واحد وفى تماسك وتلاصق شديدين.
2-تعمل على خلق روح الفريق حيث تتمثل جميع معانى التكاتف المعنوى والمادى بين مرتادى الطوابير فى إتجاه هدف سامى واحد ألا وهو الحصول على (بجنيه عيش).
3-تربية نشأ قادر على مواجهة تحديات الحياة ومجابهة مخاطر المستقبل المجهول بإصرار وعزيمة حتى يحقق هدفه (بجنيه عيش).
4_تمرين عضلات السمانة والفخذين وعضلات الظهر ومفاصل الركب وغيرها أثناء الوقوف لفترات طويلة من أجل(بجنيه عيش).
5_إنقاذ مجموعة نادرة من الأسماك كانت على وشك الإنقراض نتيجة إستهدافها المتكرر من هواة الصيد بغرض تعلم الصبر ,حيث وفرت لهم تلك الطوابير طريقة أفضل ووقت أطول لتعلم الصبر.
6-التخلص من الوزن الزائد عن طريق ممارسة مجهود عضلى شديد خلال عملية شراء(بجنيه عيش) خاصةً مع إرتفاع درجة حرارة الفرن من الداخل وسقوط أشعة الشمس الحارقة عليهم من أعلى لتوفر مناخ اشبه بساونا طبيعية تساعد من حرق المزيد من السعرات الحرارية الضارة بالجسم.
7-كما أوضح البيان أن التعرض لأشعة الشمس لفترات طويلة أثناء شراء(بجنيه عيش) يزيد من صلابة العظام ويقلل من فرص الإصابة بالأمراض كما أثبتت أخر الأبحاث العلمية.
8-تقضى على البطالة بعدة طرق ومنها:
أ.يضطر صاحب المخبز الى توظيف عمالة أكثر من الجنسين لتنظيم الطوابير والعمل على عدم إختلالها.
ب.لن يحتاج أى فرد من أفراد المجتمع الى العمل فترة ثانية لأنه سيكون منشغلاً فى شراء(بجنيه عيش).
ج.توفر فرص عمر فى المنطقة المحيطة بالمخبز لتوفير إحتياجات مرتادى الطابور من لب وفول سودانى للتسلية أثناء إنتظار الحصول على(بجنيه عيش).
9-محاربة الإجرام وتخفيض نسبة الخروج على القانون حيث يمضى العاطلون أوقاتهم فى الطوابير ولن يجدوا وقتاً لشرب الممنوعات أو الجلوس على المقاهى وإحتلال النواصى.
10_إرساء ثقافة الإلتزام بالمواعيد والحضور المبكر حيث يسعى الجميع الى الحضور مبكراً-بعد الفجر- مع إنارة شعلة الفرن الأولى لكى يستطيعوا أن يستفيدوا(بجنيه عيش) فى وجبة العشاء.
11-إزالة الفوارق بين الطبقات حيث يشمل الطابور الواحد فئات الشعب المختلفة فى ترابط مثمر.
12-تمثل فرصة ذهبية للحصول على فترة سلام نفسى وعصبى لكل شخص ليراجع فيها أهدافه وخططه المستقبلية وتقييم أوضاعه الحالية بصفة مستمرة أثناء إنتظار (بجنيه عيش).
13-تقليل نسبة الغياب من المدارس والتسرب من التعليم حيث أن التلميذ يعلم أنه فى حال غيابه لغير سبب مقنع سيكون عليه الذهاب الى المخبز بدلاً عن والده للحصول على(بجنيه عيش).
14-كما أضحت الطوابير المكونة من عدة ألاف من الرجال والنساء للحصول على(بجنيه عيش) مزاراً سياحياً تتوافد عليه الأفواج السياحية ليشاهدوا روعة حياة المصريين, مما يدر دخلاً كبيراً على خزانة الدولة.
15-تمثل فرحة المواطن المصرى كل يوم بإنجاز الحصول على (بجنيه عيش) عاملاً مهماً فى التغلب على الإحباط والفشل الذى يواجهه فى باقى مجالات الحياة.

لهذا تنصح الوزارة بتطبيق سياسة الطوابير طويلة المدى فى جميع أنشطة الدولة العامة والخاصة من أجل مستقبل أفضل لنا ولأولادنا.