27 أبريل، 2009

حلقة جديدة من ومضات


ومضــــات
----

تحديث :

يا جماعة أنا اللي كتبت الكلام ده كله ... مش منقول يعني

وكل سلسلة ومضات أنا اللي مألفها

وهتعرفوا كده لو قرأتوا المقدمة

-----


لمعرفة أصل ومضات

وسبب تسميتها يرجى زيارة الرابط التالى

المقدمة



*الجهلة أقل ضجيجاً من المتعلمين
ولأن أكون جاهلاً أحبُ إلىَّ
من أن أكونَ نصفَ مثقف متفيقه.


*ومن العلم ما قتل.

.
*أنت لن تعرف كل شىء

ولن تدرى هذا حقاً إلا إذا تعلمت بعض هذا الشىء.


*العلم فى حد ذاته ليس دائماً وسيلة

ففى التعلم والقراءة متعة عظيمة.


*السعادة

إختيار وإتجاه بغض النظر عن ظروف الحياة.



*يستطيع الجميع أن يكتبوا عن قضيةٍ استفزتهم

لكن وحدهم العظماء

من يستفزون القضايا ما بأقلامهم.


*لا تحكم على شىءٍ وأنت فى ثناياه.


*الشعــر
مثل الشيكولاته يحبها الجميع
ويتذوقها الخاصة ,
ولا يجيد صناعتها إلا قلة.


*تستطيع أن تمضى في الحياةِ كيفما تشاء فى سعادة
فقط إن كنت تحمل جنتك على ظهرك ,

ورضا ربك فوق رأسك , والشوق الي الأخرة في قلبك.



*تبدوا لىَّ الحياةُ فى غرابتِها كقصيدةٍ مطلسمة
كلنا فيها باحث عن صوتيم.

(صوتيم الحياة الحقيقى هو التوحيد وعبادة الله)

25 أبريل، 2009

مجلة رؤية مصرية في ثوبها الجديد


إنهاردة بحمد الله ظهرت مجلة رؤية مصرية للنور الحقيقي
ايوه هيه ظهرت من فترة طويلة كمدونة
لكن إنهاردة بس عملت قفزة كبيرة أوي أوي
وظهرت بشكلها الجديد والأنيق كموقع منفصل
.
لكن اللي متغيرش إننا لحد دلوقت لسه كتابها ومحرريها
أنا وإنت وإنتِ وحضرتك وسيادتك .. كلنا كلنا يعني
.
عاوزين مشاركتكم معانا هناك
وكمان شوية تشجيع
.
.
أخوكم عامل مشاركتين علي قده كده
.
بكمل معاكم سلسلة شقلوبسان
.
والثانية حاجة كتبتها زمان أوي
يارب تعجبكم

21 أبريل، 2009

الدُّرَرُ المُنْتَقَاة .. الحلقة الأولي


قال أبو يزيد:

ما زلت أقود نفسي إلى الله وهي تبكي ، حتى سقتها وهي تضحك .

التعليــــق

شوفوا جمال فقهه وعلمه ....
بينورلنا طريق هوه مشى فيه قبلنا

مشي فيه وعرفه وعرف خباياه ومنحنياته ومخاطره

وقرر إنه يعملنا علامات مرورية عليه للتنبيه

وكأنه بيقول خلو بالكم يا جماعه فى الاول ومع بداية التوبة وعمل الطاعات

أنفسكم هتأمركم بالسوء وهتتعبكم ...

لأنها واخدة علي الراحة وواخدة علي المعصية

فهل نسلم بسرعة قدامها؟؟؟

أبسليوتلي نوو

هتقودها وهى بتبكى ...

هتقودها وهيه مش مطاوعاك خالص

هتسوقها بالعافية وغصب عنها كمان


طيب هنفضل كده كتير..؟؟؟؟؟


لالا بعد كده هيه اللى هتقودك للطاعه
بعد ما تذوق جمالها ووتعود عليها
وتستشعر لذة القرب من الله
ومتعة الأنس به سبحانه وتعالي

وكما قال سعيد بن المسيب

(الذى لم تفته تكبيره الاحرام اربعيييييييين سنه)

راقبت نفسى عشرين سنه وراقبتنى عشرين سنه
.

طيب ما تيجو نشوف حال السلف مع أمر واحد مثلاً
وهو الصلاة وقيام اليل
هل كانت عبأ وهم ثقيل عليهم؟

يقول أحد السلف: إني آتي إلى الصلاة وأنا أحمل هم الخروج منها

وكان ثابت البناني يقول: "اللهم إن كنت أعطيت أحدًا الصلاة في قبره فأعطني الصلاة في قبري
".
وقال سفيان الثوري: إني لأفرح بالليل إذا جاء، وإذا جاء النهار حزنت
.
إنها الجنة التي لما دخلها الداراني قال: إن أهل الليل في ليلهم ألذ من أهل اللهو في لهوهم...وإنه لتأتي على القلب أوقات يرقص فيها طربا من ذكر الله فأقول: لو أن أهل الجنة في مثل هذا إنهم لفي عيش طيب".

طيب هل لما بدأو التعود علي الصلاة كانوا كده؟

أكيد لا
وتذكردائماً أنك تشتري سلعةً غاليةً جداً.
(ألا ان سلعة الله غالية .. ألا ان سلعة الله هي الجنة)

يَا سِلعةَ الرَّحمنِ لَستِ رَخيصَةً

بَل أنتِ غَاليةٌ عَلَى الكَسلانِ

يَا سِلعَةَ الرَّحمنِ ليسَ يَنالُهَا

فِي الألفِ إلا وَاحِدٌ لا اثْنَانِ
يَا سِلعةَ الرَّحمنِ أينَ المُشترِي ؟
فَلقد عُرضتِ بأيسرِ الأَثمَانِ

يَا سِلعَةَ الرَّحمنِ هَل مِن خَاطِبٍ ؟
فَالمَهرُ قَبل المَوتِ ذُو إِمكَانِ
يَا سِلعةَ الرَّحمنِ لَولا أنَّهَا
حُجِبَت بِكلِّ مَكَارِهِ الإنسَانِ
مَا كَان عَنهَا قَطُّ مِن مُتخلِّفٍ
وتَعطَّلتْ دَارُ الجَزاءِ الثَّانِي
لكنَّها حُجِبتْ بكلِّ كَريهَةٍ
لِيُصدَّ عَنهَا المُبطِلُ المُتَوَانِي
وتَنَالها الهِمَمُ التي تَسمُو إلى
رَبِّ العُلا بمشِيئةِ الرَّحمنِ
فَاتْعَبْ لِيومِ مَعَادِكَ الأَدنَى تَجِدْ
رَاحَاتِهِ يَومَ المَعادِ الثَّانِي


ولقد بلغت لذة العبادة وحلاوتها ببعض ذائقيها

أن قال أحدهم من شدة سروره: لو يعلم الملوك وأبناء الملوك ما نحن فيه – يعني من النعيم -لجالدونا عليه بالسيوف.

وقال آخر مبديًا حزنه وتأسفه على الذين لم يشهدوا هذا المشهد: مساكين أهل الدنيا، خرجوا منها وما ذاقوا أطيب ما فيها.. قيل: وما أطيب ما فيها؟ قال: محبة الله ومعرفته وذكره
.

وكان شيخ الإسلام ابن تيمية – رحمه الله تعالى – يقول:

إن في الدنيا جنة من لم يدخلها لم يدخل جنة الآخرة..



20 أبريل، 2009

الدُّرَرُ المُنْتَقَاة

الدُّرَرُ المُنْتَقَــــــاةُ
.
فى بعض الاحيان وانا بقرأ بتقف قدامى بعض الحكم والمواعظ
والمأثورات

قليلة الكلمات , عظيمة المعاني
.
تنم عن مدى فهم وعلم وعم فكر قائلها والمامه بالقضية دي
بحس انها جمعت فأوعت..ورمت فأصابت..ورسمت فأبدعت

ولما بفكر فى كلماتها ...

ياااااااااه ايه الجمال ده ..!!

.
ومن هنا جات الفكره

طيب ما اكتبلكم الكلمات دى وتقولوا رأيكم فيها

وتستفيدوا معايا منها

.
فمن الممكن ان تكون هذه الكلمات البسيطة لما حوت من معاني

زبدةَ كتابٍ كامل..او خلاصة فكر وتجارب سنين

.

فتحوى
جوامع الكلم ... وروائع البيان

.

ولانها بحق قد تخطت حدود الاحرف والكلمات
فأضحت معانى من نور تسطع بين الصفحات

وطفقت تنافس اللألىء وتسمو فوق الهامات

لذا سميتها

الدرر المنتقــــــاة

.
أرجوا ان تنال اعجابكم
.
ملحوظة : مجهودى فيها يقتصر على التجميع والتعليق
أما الدرر فمنقوله من مصادر متعدد
ة
.
نبدأ غداً إن شاء الله مع الحلقة الأولي

18 أبريل، 2009

التاج .. كما يجب أن يكون



 تاج من

(حــارة ســد)

من أنت ؟وما الذي تفعله هنا ؟



أصعب الأسئلة على الإطلاق

لا يستطيع الإجابة علي هذا السؤال إلا رجل شديد الحكمة أو رجل شديد الغباء

وبما أني لم أصل لأيٍ من اللقبين
فلا استطيع أن أقول سوي

(عبد من عباد الله أسموني ياسر)
أما عما أفعله هنا ,

 فأحاول أن أنمق كلماتي لتجعلني أبدو كما أريد ,

 أو قل لأجعلها تصف (ياسر) الذي اريده.

إسرائيل تقصف كل جنوب ممكن بحثا عنك ، أي شمال ستقصد ؟

وأي شمالٍ سوي شمالها أي شمال إسرائيل ,
فإنها لن تدرك وهي تبحث عني أني قد أكون تحت إبطها
ولو أدركت فلتضربني بكل ما أوتيت من قوة لتدمرني مع بعض أرضها وشعبها.
 

أنت مكلف بحذف حرف من حروف اللغة العربية .. أيها ستختار ولماذا ؟


لحذفت كاف كفر أوحاء إلحاد أوعين بدعة أوجيم جهل  أوضاض ضعف أوخاء خور

حرف واحد ؟ كم أنت بخيل

فكم من حروف كلماتنا تستحق رمانة ناسفة ملفوفة بشريط أحمر.


لو قدر لك أن تدخل السجن فما هي القضية التي تتمنى ان تدخل بها إليه؟


وأي شىء سوي ديني ؟


بالمناسبة.. منذ متى اكتشفت نفسك؟


إكتشفت أن لي نفس أو قل روح منذ حوالي اربع سنوات
ومازلت أبحث بين أغوارها , وأقلب فى دفاترها , وأفتش عن مخابئها , وارحل فى ثناياها , وأعرف عن سجاياها.

على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

أحلامي بلا سقف أو أفق أو حدود

وكما قال أحمد بخيت


لاَ أُفْقَ لِى إنَّنِى الراؤونَ... والأفُقُ

صَمْتُ الْجِبَالِ الَّتِى فِى ظِلِّهَا صُعِقُوا


ومع ذلك هي بسيطة كالطفل في مهده

صدقني يا أخي أيهما يفي بالغرض .
نحن لا نعيش حياتنا بل نتعلم فيها كيف نعيش» ما تعليقك؟

جانبها الصواببعض الشىء

يستطيع الجميع أن يتعايش مع الحياة أو أن تعيش فيه ,

لكن وحدهم العظماء من يعيشون الحياة ويسيرونها.

وقد تتعلم طوراً من الزمن كيف الحياة , ثم بعد ذلك تعيشها.


بجملة واحدة فقط أكتب تعريفاً لكل كلمة من الكلمات التالية:-


الوطن :


أم جافية , ولكنها أم
فنحن لا نحب أمنا لأنها الأجمل أو الأفضل

ولكن لأنها أمنا.


الأم:

حضنٌ واسع وحنان متدفق والمعني الأسمي للتضحية.

 
الليل

مرتع الفكر ومكمن الحلم وحياة التأمل أو تأمل الحياة , وهدنة إلي الصباح.

 
الحب

أكثر المشاعر التي ظلمت , وأعظم الأحاسيس التي قيدت.

أمريكا :

طاغوت عصر.

المرأة :

---------

الصمت:

وكيف أعبر عن الصمت بالكلمات؟ ألن يؤذي هذا مشاعره؟ 

الإنترنت
 

عرفته ذات تاج

ليلُ سرمدىُ حالم

وكنز لكل باحث غانم
ونهار مشرق سالم

وضجيج عالى وزحام قاتم

المسنجر

حين تتحاور الكلمات .

أخترمنصباً واتخذ قرارا

سيد العالم
وأول قرار أتنازل عن المنصب لمن يستحقه حقاً.

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

كان على أحدهم أنا يتكلم وعلى الأخر أن ينصت في دلال و(تقل)

فهل كانت ستتحمل إحداهن أن تنشد في رجلها أبياتاً دون أن يرد , لكان حينها جلفاً وجامداً وربما قليل الذوق.


أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل
 

أتفق معها كما اتفق مع الحجاج حين قتل سعيد بن جبير.
(مبتفقش يعني)
إل ىأين تمضي كلمات الحب .. بعد أن نقولها؟

لم يسبق لي أن قلت كلمات الحب إلا لمن إستحقها فعلاً

لذا فقد ذهبت إلي حيث يجب أن تكون.
(أمي , أبي , أخوتي , أصدقائي)

هل تجد علاقة بشكل أو بآخر بين المرأة وقطاع الطرق ؟

----------

هذا فراق بيني وبينك .. متى ولمن تقولها ؟

لذنب أعرفه ,وأقولها بعد مقارعته

أقولها كثيراً ولكن أتمني أن أعيها وأصدق فيها يوماً . 

كيف هو غداً ؟

كيف تسألني عما لا أملكه.

16 أبريل، 2009

وَجَاءتْ سَكْرَةُ الْمَوْتِ بِالْحَقّ


امبارح حصلت حاجة صعبة جداً
مجموعة شباب صغيرين يمكن أعمارهم كلهم أقل من عشرين سنة كانوا في عربية واحد صاحبهم وبدون الدخول فى تفاصيل كثيرة العربية عملت حادثة مروعة ..

شكل العربية بعد الحادثة شبه علبة السردين
السقف مفتوح ومخبوطة من كل حتة ..
شكلها إتقلبت أكثر من مرة
كانت النتيجة إن كل الشباب مصابين ومنهم اللى حالته خطيرة جداً

ومنهم شاب صغير عنده 17 سنة مات
{وَجَاءتْ سَكْرَةُ الْمَوْتِ بِالْحَقِّ ذَلِكَ مَا كُنتَ مِنْهُ تَحِيدُ} (19) سورة ق

الشاب ده قبل كام ساعة بس كان معانا فى الدنيا
بياكل .. وبيضحك .. وبيتكلم .. وبيتنفس .. وبيشرب
يمكن كان رايح يتعشي أو يخرج أو أو أو

أكيد كانت عنده خطط لحاجات هيعملها فى فترة الكام يوم الأجازة دول
يمكن كان المفروض هيقابل حد من أصحابه إنهاردة علشان يخرج معاه
أكيد كان بيفكر فى مستقبل كبير جداً بعد التخرج والشغل والجواز والأولاد

{كُلُّ نَفْسٍ ذَائِقَةُ الْمَوْتِ وَنَبْلُوكُم بِالشَّرِّ وَالْخَيْرِ فِتْنَةً وَإِلَيْنَا تُرْجَعُونَ} (35) سورة الأنبياء

 
لما روحت المستشفي لقيتها مليانة شباب صغيرين وكبار

كله واقف حزين وبيبكي ومتأثر

ياتري لو كنت أنا أو أي حد منهم اللى مكانه ..
هل كان هيبقي عندي إستعداد لمقابلة ربنا؟

{وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَى أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ}(10) سورة المنافقون

 
هوه إحنا ليه بننسي إننا هنموت ..؟؟

أيوه كلنا هنموت وهنندفن وهنتسأل ...

{قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ ثُمَّ تُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُم بِمَا كُنتُمْ تَعْمَلُونَ} (8) سورة الجمعة

ليه فكرتنا عن الموت دايماً مستشفي ومرض فى أخر العمر
وأولادنا حوالينا وكل أحلامنا تكون إتحققت
مع إن كل يوم ناس بتموت فجأة .. وشباب بتموت

واحد هيقولي ده كلام كلنا عارفينه
كلنا هنموت ومحدش عارف هيموت إمتي

هيه فعلاً حقيقة مجردة ..
وأنا مش جاي أقول كلام جديد
أنا بس بقول كلام كلنا بنتجاهله أو بنتناساه

{كُلُّ نَفْسٍ ذَائِقَةُ الْمَوْتِ ثُمَّ إِلَيْنَا تُرْجَعُونَ} (57) سورة العنكبوت 

مش باقي غير كلمة واحدة بس
مش لازم نفكر فى الموت وبس
لكن لازم نفكر فيما بعد الموت

{كُلُّ نَفْسٍ ذَآئِقَةُ الْمَوْتِ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ فَمَن زُحْزِحَ عَنِ النَّارِ وَأُدْخِلَ الْجَنَّةَفَقَدْ فَازَ وَما الْحَيَاةُ الدُّنْيَا إِلاَّ مَتَاعُ الْغُرُورِ} (185) سورة آل عمران

أنا عارف إن البوست ممكن يبقي دمه تقيل شوية وحزين
بس دي شوية خواطر جاتلي وقلا أذكركم بالموت

عن أبي هريرة رضي الله عنه قال:
قال رسول الله صلى الله عليه وسلم :
«أكثروا ذكر هادم اللذات»،
يعني الموت.




14 أبريل، 2009

ياااااااارب

يارب

يامن رفعت سماءاً بلا عمدِ
يا من خلقت الأنس فى كبدِ

يا من بعثت رسول الله مرحمةً
فجاء يهدي كل الخلق قاطبةً

يا من وضعت الظلم والجورَ
ويا من رفعت العدل والنورَ

كم مرة رفعنا إليك شكوتنا
وكم ليلة بتنا ندعوك ترحمنا

فما رددت فى يومٍ أيادينا
وقد كنت دوماً خير المجيبينَ


يارب

مالى سواك إلهً أناجيه
ومالى سو
اك مغيثاً أناديه
فاغفر ذنوباً تعرفها وتحصيها
واستر عيوباً تعلمها وتُخفيها

وارحم عبادك يوم العرض من سقر
واغسل خطايانا بالثلج والمطر

....
..
.
.
بقلمي
لظروف إمتحانية طارئة
الإمتحانات عاملة هجمة مرتدة

12 أبريل، 2009

يا غزة العزة


~*¤ô§ô¤*~ يا غزة العزة ~*¤ô§ô¤*~

قلوبُ الخلقِ قدْ ضنت بما فيهـا
والظلمُ يخنُقَها والقهـرُ يرديهـا
كـم أمَّلت  معتصماً لكربتَهـا
وكم دعته فى الظلماتِ باريـها
يا أمـةٌ باتت والمجـدُ غايتُهـا
أضحت والذلُ عنواناً لواديهـا



أين الأخوةُ والإسلامُ والعربُ
أين الجحافلُ ..
هل ألهاهم الطربُ؟



هل صاروا لغيرِ الحقِ ينقادوا
أم ألفوا الخذلان واعتادوا؟؟

يا غزةَ العزة ..



لا ترتجى فينا
غير الدموعِ وغير الشجبِ واللينا



فالعشقُ والأشواقُ قد صارت أمانينا
وعاهراتُ الفنِ .. قد قطعن أيدينا

يا غزة العزة ..



يا منبعَ النخوة
يا معنى الصمود ويا مصنعَ القوة
لا تنحنى ..لا تركنى ..
فلغير الله أبداً ..لن تركعى

يا غزةَ العزة ..



قومى وانتقمى ...
وأمضى الى العلياءِ فى زهوةِ الرخمِ
لا ترتجى دعماً من الأممِ ..
لا ترقبى مدداً من العدمِ



ولا تخافى عدواً قد عاثَ مغتراً
فغداً سيسحب بالأغلالِ مجتراً



ولا تهابى الموتَ .. واكتمى الأنَّه
حسب المنايا أنَّ بعدها جنة


بقلمى

....
..
.
.
.
التعليقات مغلقة هنا فى البوست
وأى حد عاوز يعلق يروح يعلق في 
معلش بقى هنتعبكم معانا شوية
بس أكيد تعبي راحة .. 
ولا إيه ؟؟
~
رابط الموضوع
...
.....
وكمان ليا موضوع تاني ..
بالمرة يعني
يعنى هتكلفوا نفسكوا وتروحوا لحد هنااااااااااك
وتاكسي رايح وتاكسي جاي
علشان تردوا على بوست واحد
..
.
أوعو تكسلو وتكسفوني قدام الناس بتوع المجلة
ويقولوا عليا معنديش أهل يردوا عليا

09 أبريل، 2009

الثقافة بين الوسائل والغايات2

إتكلمنا قبل كده عن
الثقافة بين الوسائل والغايات


لكن أنا فضلت إنى اقسمها لعلوم دنيوية وعلوم دينية
رغم إنى فى الأصل مبحبش التقسيمة دى
لأن كل حاجة فى الحياة لازم تبقى لله وتبقى لخدمة دينك

{
قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ}
(162) سورة الأنعام
لكن هنا التقسيم لمجرد التنظيم لا أكثر ..

نبدأ بقى فى موضوعنا
قراءات حضرتك وثقافتك الدينية غاية ولا وسيلة؟
أوضح تانى؟

يا سلام بس كده ..
(بس متاخدش على كده علشان بدأت أتخنق منك بجد)
يعنى حضرتك قرأت فى سير عظماء الإسلام أو فى الفقه أو فى العقيدة
وإتعلمت فى أمور دينك حاجات كثير
عملت بيها إيه بقى؟؟

أوعى تقولى لذة المعرفة ونهم الثقافة ومتعة التعلم والكلام ده
ده عند أمه يا أدهم

الكلام ده ممكن ينفع فى مجالات تانية .. لكن فى الدين أبسليوتلى نو
ركز معايا يا معلم وفكك من أى حاجة فى إيدك
وإنتى يا ماما سيبك من الموبايل .. لالا متشوفيش المسج دلوقت
هوه أنا مش هعرف أسكتكم فى المدونة بتاعتى ولا إيه


بص ياسيدى
ربنا سبحانه وتعالى علمنا إن كل حاجة لازم يبقى ليها هدف ونية
حتى وجودنا فى الحياة لهدف معين .. وهوه عبادته سبحانه وتعالى
{
وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ} (56) سورة الذاريات
والعبادة زى ما عرفها شيخ الإسلام بن تيمية :إسم جامع لكل ما يحبه الله ويرضاه ..
يعنى مش بس صلاة وصوم وزكاة وصدقة بس,
لالالا كل حاجة فى الحياة ممكن تبقى عبادة بالهدف والنية ..
وكلامنا إنهاردة عن الهدف
يعنى لما حضرتك بتقرأ فى الدين عبادة بلا شك .. ولو قرأت بليل ممكن تبقى قيام ليل
لو حضرتك بقى قرأت علشان بس تتعلم وخلاص ومش هتستفيد منه,
فده مش بس مش هينفعك .. لا ده ليه مضار

أول حاجه يا إنك حرمت نفسك من ثواب التعلم وطلب العلم
وده ثواب كبييييير جداً جداً .. كفاية بس إنك هتبقى فى سبيل الله

ثانى حاجة إنك هتضيع وقتك فى حاجة مش مفيدة بل ومضرة زى ما هتعرف كمان شوية
وربنا هيسألك عن وقتك

ثالث حاجة إنك بتكثر عليك الحجة يوم القيامة
يوم القيامة هيبقى جزاؤك أكبر من اللى مقرأش أصلاً ومعرفش إن ده حرام
ربنا عاب على بنى إسرائيل إنهم عندهم العلم وعارفينه ومش بيستخدموه

{مَثَلُ الَّذِينَ حُمِّلُوا التَّوْرَاةَ ثُمَّ لَمْ يَحْمِلُوهَا كَمَثَلِ الْحِمَارِ يَحْمِلُ أَسْفَارًا بِئْسَ مَثَلُ الْقَوْمِ الَّذِينَ كَذَّبُوا بِآيَاتِ اللَّهِ وَاللَّهُ لَا يَهْدِي الْقَوْمَ الظَّالِمِينَ} (5) سورة الجمعة

يعنى مثلاً إنك تبقى حافظ
{
قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ}
(30) سورة النــور
ومش سايب واحدة فى الشارع غير ما تبص عليها ..
(اظبط نفسك بقى عيب)
وإيه يا أختى فائدة إنك تبقى حافظة

{
وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ } (31) سورة النــور

ومع ذلك مش بتغضى بصرك ..
ولابسة حجاب صينى ومش أصلى (ياريته كان تايوانى)؟
إيه فائدة إنك تبقى عارف إن الأغانى حرام ومع ذلك بتسمعها؟
تسهر قدام أفلام مليانة أفكار مسمومة وفاسدة
وده فى نظرى أخطر من وجود العرى والإبتذال وباقى المخالفات التانية ..
وإنت عارف إن ده لا يجوز
إيه فائدة إنك تبقى عارف الإختلاط المحرم ..
ومع ذلك تفضل تختلط إختلاط محرم مع بنات؟
إيه فائدة إنك تبقى عارف سيرة الرسول والصحابة التابعين والسلف الصالح
وإنت بتنهج نهج غربى أو شرقى أو فحلقى؟


زمان كانوا بيرأفوا بحال طالب العلم اللى مبيطبقش الكلام اللى بيتعلمه
وكانوا بيمنعوه من حضور جلسات العلم .. علشان ميزيدوش عليه الحجة

هل تتصور أن النبي صلى الله عليه وسلم الذي غفر الله له ما تقدم من ذنبه وما تأخر، الذي فُطر على التوحيد، الذي عصمه الله جلّ وعلا، هل تتصور أنه كان يدعو الله تبارك وتعالى وكان يعوذ بالله من علم لا ينفع وروى مسلم وغيره من حديث زيد بن أرقم رضي الله عنه أن النبي صلى الله عليه وسلم يقول
(
اللهم إني أعوذ بك من علم لا ينفع

الرسول صلى الله عليه وسلم، هل استعذت أنت بالله من علم لا ينفع؟

طيب إيه هدف العلم بقى يا عم انت بقى؟
بطل زن وجيب من الأخر
شوف يا باشا .. شوفى يا أختى

العلم ليه هدفين
الهدف الأول العمل ..
يعنى لازم تعمل بأى حاجة تتعلمها ,وتبتدى بنفسك وبعدين بكل اللى حواليك
يعنى لو قرأت حديث للنبى صلى الله عليه وسلم تنفذه على طول وتعمل بيه
وزى ما قال و قال يحيى بن أبي كثير :
" العلم يهتف بالعمل فإن أجابه حلّ و إلا ارتحل . "

تانى هدف الخشية
لأن ربنا سبحانه وتعالى قال
{
إِنَّمَا يَخْشَى اللَّهَ مِنْ عِبَادِهِ الْعُلَمَاء إِنَّ اللَّهَ عَزِيزٌ غَفُورٌ} (28) سورة فاطر

والعلم زى ما هوه معروف ليس بكثرة الرواية ... ولكن نور يلقيه الله فى القلب
أو كما قيل العلم الخشية
والدليل على كده من هوه أعلم هذه الأمة؟
أعلم الأمة بلا خلاف سيدنا أبو بكر الصديق ...
ومع ذلك لم يعلم عنه إنه أفتى فى مسائل كثيرة زى سيدنا عبد الله بن مسعود أو عبد الله بن عمر أو بن عباس وده مصداق لكلامى بأن العلم مش بكثرة الرواية ودقة الحفظ.
وربنا يرزقنا وإياكم الخشية


علشان كده العالم لا يكون عالماً إلا بركنى العلم
الخشية والعمل


هننهى بحديث جميل
عن أبي موسي عن النبي صلي الله عليه وسلم قال
ان مثل ما بعثني الله به عز و جل من الهدي و العلم كمثل غيث أصاب أرضا فكانت منها طائفة قبلت الماء فأنبتت الكلأ و العشب الكثير وكان منها أجادب أمسكت الماء فنفع الله بها الناس فشربوا منها وسقوا ورعوا وأصاب طائفة منها أخري انما هي قيعان لا تمسك ماء ولا تنب كلأ فذلك مثل من فقه في دين الله و نفعه بما بعثني الله به فعلم و علم ومثل من لم يرفع بذلك رأسا ولم يقبل هدي الله الذي أرسلت به
( متفق عليه )

عاوز تبقى أنهى نوع؟


الكلام ده بوصى بيه نفسى أولاً ..
فكم من مخوف من الله وهوه لا يخشاه
وأعوذ بالله أن أكون جسراً تعبرون عليه الى الجنة ويلقى به فى النار
لو استفدتوا .. متنسوش أخيكم بدعوة

05 أبريل، 2009

الثقافة بين الوسائل والغايات


الثقافة بين الوسائل والغايات


إيه يا عم العنوان ده
إيه الكلام الكبير ده ..؟


متشغلوش بالكم ..
أصلى عقبال عندكم ناوى أتكلم عن الثقافة ولازم يبقى العنوان يبقى على مستوى القاعدة
أقعد بقى كده واستهدى بالله علشان تفهم
وأى حد مش هيقعد مش هيبقى على مستوى القاعدة ..
ومش هيفهم

طيب هنقعد بس الله يكرمك بلاش الكلام الكبير المجعلظ ده
يعنى إدينى فى الكلام السلس الشعبى الحلو بتاعنا
من عونيا التونين
ممكن أسأل حضرتك سؤال؟
أكيد طبعاً ممكن .. هوه إنت هترفض ليه يعنى؟
هوه العلم بالنسبة ليك غاية ولا وسيلة؟
(وهنا أقصد العلوم الغير شرعية يعنى اى قراءة فى أى مجال غير الدين)
أوضح شوية .. ؟
ياسلالالالالام بس كده .. ده إنت تؤمر
(بس متاخدش على كده علشان بتخنق بسرعة)

يعنى وإنت بتقرأ كتاب معين فى أى حاجة
هل بتقرأه علشان إنت بتحب تقرأ وتعرف وتتفشخرن قدام أصحابك بإنك
واد فاهم كل حاجة بس مدكن .. وبس
ولا بتقرأه علشان تستفيد منه وتوصل لحاجة تانى بعد القراءة
أظن كده بقى فهمت ..!!
طيب قبل ما سيادتك تجاوب تسمحلى أدلى بدلوى؟
أيون طبعاً هتسمحلى ..
دى المدونة بتاعتى ياعم انت وأعمل اللى أنا عاوزه
طيب أبعد شوية كده علشان دلوى ولمؤاخذة ميطرطرش عليك
سألت ناس كثير من أصحابى القريرة .. العيال الرخمة المثأفة دى
أيون أيون اللى مبروزين عيونهم بنضارات طخنية وظهرهم متنى
وبيقفلوا زرار القميص اللى فوق
واحد منهم بص لفوق للسما .. ويكأن فيه طيارة رش معدية
وبعدين عدل نضارته .. هنا بقى حسيت إنه هيتحول
قلتله أوعى تعملى أي مفأجة
قاللى القرااااااااءة دى فى حد ذاتها متعة كبيرة
والعلم والمعرفة نهم وغاية ولما تبقى عارف حاجات كثير ده فى حد ذاته شىء جميل جداً
ولازم تبقى ملم بمختلف فروع العلم
جمعااااااء جمعااااااااء جمعاااااااااء
(بالثلاثة)
 

واحد تانى قلتله إنت عملت ايه من يوم ما إتخرجت
قاللى بحضر ماجيستير وباخد كورسات ودبلومة مش عارف فين وبثقف نفسى عامةً
قلتله ده شىء جميل جداً .. طيب ليه؟
بصلى بصة غريبة ..
ويكأننى حمار ومش فاهم أى حاجة
(مفيش حاجة بتستخبى فى البلد دى)
وقاللى هوه ده سؤال ... العلم مش محتاج ليه .. أنا بحب العلم
... بحبه يا بابا بحبه ...
واحد ثالث قاللى أنا بدرس وبقرأ وبتثقف علشان أقدر أوصل لمركز كويس فى وظيفتى

ورابع لما سألته إنت بتحب تقرأ ليه؟

قاللى اصلها جميلة جداً ..

هههههههههههههههههههه

وبتضحكنى مووووووت

ههههههههههههههههههههه

بقوله ايه هيه دى ياض؟

قاللى مجلة ميكى ..

هههههههههههههههههه

وبرضه عمال يضحك

(الهى ربنا يشفيك)

قلتله لا أنا قصدى العلم والثقافة

قاللى لا والله دول مش فى مجلة ميكى

طيب بالنسبة ليا أنا بقى شايف إن العلم والثقافة يحتمل الوجهين

(بأكد تانى إن كلامى هنا بعيد عن القراءات الدينية)

يعنى وإنت بتقرأ فى حاجة معينة بتحس بلذة عجيبة ومتعة ما بعدها متعة,

لأنك ببساطة بدات تفهم الحياة وتشوف الدنيا بمنظور مختلف

لكن بصراحة يبقى حرمان كبير جداً إنك متطبقش ده

إيه فائدة صينية البطاطس فى الفرن باللحمة لو مشبعتكش؟

وإيه فايدة البدلة السودة الجديدة اللى فى الدولاب .. لو ملبستهاش؟

لازم علمك تنتفع بيه .. وثقافتك توجهها صح

لكن أنا لا أعيب على أصحاب الرأى الأول

لأن كون الواحد منهم بيساير أخر تطوارت الدنيا ويكون ملم بأنماط الحياة المختلفة فشىء مفيد

كمان هوه كده بيقدم خدمة جليلة لنفسه ..

(مين جليلة دى..؟؟)

ألا وهيه إكسابها لذة وسعادة وراحة وسلام نفسى

يمكن كثير فى الدنيا بيبحثوا عنها فى الحشيش والأفيون والبانجو

أو فى الخمور أو فى علاقات محرمة ومشبوهة

(بطل ضرب بقى يا صايع)

ده رأيى .. إيه رأى سعادتكم
وانتظروا الجزء التانى اللى هتكلم فيه عن الثقافة الشرعية
القراءة فى الدين يعنى


إقعدوا بعافية
Image Hosted by ImageShack.us
الصورة أو اللوجو ده هدية من TiMMy