16 أغسطس، 2009

شقلوبستان : "حشيش" حاجة تيجي كده

شقلوبستان : "حشيش" حاجة تيجي كده

من تلك الغرفة النائية المنعزلة بإحدي المناطق البعيدة الغامضة من مدينة القادرة (قادرة أم عز) تترائي لنا من بعيد سحابات دخانية (زرقاء) وتتصاعد ضحكات متشابكة عالية تجعلك تشعر أن هناك شيئاً مريباً يحدث , حيث من النادر أن يضحك الشقلوبانيون بهذه الحماسة .

يبدو الموقف برمته كمشهد من المشاهد السينيمائية (العبيطة ) المتكررة والتي تمتلأ بها الأفلام الشقلوبانية , فهذا الجو يجعلك تقسم بأن هناك جريمةً ما تحدث أو علي أقل التقدير يبدو كمكان ملائم لجريمة قد تحدث قريباً.
(من يعرف مجرماً يبحث عن مكان مناسب لجريمة فليخبره عنه .. وهنيالك يا فاعل الخير والثواب)
ومن داخل تلك الغرفة _ والتي عرفنا بعد ذلك أنها قد أخذت إسماً حركياً جذاباً (موكنة) _تجلس (شلة ) من الشباب جلسة (أنس) بكل ما تحمله الكلمة من (سطلة) , حيث تتراص زجاجات (المية) أمامهم وتتناثر أيضاً بعضٌ من تلك الزجاجات الفارغة بلونها الأخضر المميز في كل مكان.

يقول أحدهم وإسمه (مسطول علي طول)
يا أخي فيه سؤال كده عمال (يروادني) اليومين دول
ومش عارفله إجابة ...!!
فيرد عليه (حمدي بورشام) بعد ان يلقي بمجموعة من الأقراص المتنوعة في فمه دفعةً واحدة
ثم (يبلبعها) بسائل بني في كوب نصف ممتليئ
لالا متخليش حاجة تراودك .. دي حتي تبقي عيبة في حقك
إيه السؤال ده .. قلنا عليه يمكن نعرف نجاوبه

فيهرش (مسطول) في قفاه ثم يقول
هوه الواحد بعد ما بيموت ..
بيلقي إيه؟

فرد عليه (مدحت كوباية) بصوت متقطع بطيء وبيده إحدي الزجاجات الخضراء سابقة الذكر
بينما تبدوا عينيه نصف مفتوحتين
ده سؤال ده ..!!
دي سهلة اوي
طبعاً هيلقي مصرعه
وبعض أحيان بيلقي حتفه
كر كر كر كر كر
(صوت الجوزة المميز)

فيردد الجميع في قناعة تامة فيما قال
أأأأأأأه عندك حق

ثم وبلا أدني سبب ينظر الجميع لبعضهم وتخرج منهم ضحكة عالية هستيرية
نياهاهاهاهاهاهاهاهاهاها
حتي اغرورقت أعينهم بالدموع من شدة (الهبل)

مسطول علي طول :
تصدق ياض يا كوباية إنت ريحتني أخر حاجة
ده الموضوع ده تاعبني من فترة ومكنتش لاقيله إجابة
إنت ياض شكلك مثأف وبتفهم علي فكرة

كوباية : ولا يهزك يا بوبس
أنا عنيا ليك يا معلم
هوه أنا صحيح مش فاكر أنا في كلية إيه ولا في سنة كام دلوقت
هيء (صوت فواق أو زغطة)
لكن العلم في الدماغ المتكلفة
مش في المناهج المتفلسفة

فرد عليه : عندك حق
ده حتي الكيف أصدق أنباءاً من الكتب
في سُطْلِهِ الحدُ و.. أأ
والإثنين والثلاث كمان
نياهاهاهاهاهاهاهاهاهاهاها
(نفس الضحكات المتخلفة)

ثم يصيح بورشام ببينما يحاول أن يمسك بناموسة ( غتتة ) فوق رأسه :
إيه يا عم الناموسة بنت التيتتتتت دي ..
عمالة تمص و(تشفط) في دمي من بدري

فيرد سيد قدره : نياهاهاهاهاها
لعلمك دي شوية ودمك هيتوهها ويسطلها وتقف تقول
أوعي النسر

فيضحك الجميع في هيستيرية مشابهة
نياهاهاهااهاهاهاهاهاها
هع هع هع هع هع هع هع هع

يهدأ كوباية ويصمت ويهرش في رأسه , حيث بدا وكأنه فكر في خطبٍ عضال قبل أن يتسائل :
همه ياتري سموا الناموس ناموس ليه؟

بورشام : هأو .. عاملي فيه مثأف ومش عارف
دي واضحة زي ال(كلوب) في قلب (الغرزة)
أكيد علشان بيخلي الناس مبيـ(ناموس)

فيردد الجميع في ثقة تامة وقناعة بإجابته اللولبية
أأأأأأأأأه عندك حق

ثم ينشغل كلٌ منهم في (ضرب ) شيءٍ ما.

وهنا يهتز موبايل (سيد قدره) ويشدو بأغنية المطرب الشهير (جوعارة)
شمييت قد إيه شميييييييييت .. وضربت (أفيون) في البيت

فيمسك الموبايل فزعاً:
يوووووووووووه ده أبويا

كوباية: وده إيه اللي جابه دلوقت؟
قدره : لا ده مجاش ده أنا اللي روحتله
كوباية : روحتله فين ياض .. ما إنت متنيل قاعد أهو معانا
قدره : أه صحيح .. امال فين بقي؟ وجه إزاي؟
أمال مين اللي راحله .. ولا مين اللي جابه هنا؟
هوه مين ده أصلاً؟
بورشام : يا عم إنت فوق .. ده أبوك بيتصل بيك
رد عليه
قدره : أأأأأأأه بيتصل ...
أه منك يا بابا با خبيث!!
هع هع هع هع هع هع هع
هيئ هيئ هيئ هيئ هيئ هيئ

كوباية : طيب وهوه عاوز منك إيه دلوقت؟
قدره : اااااااااه أصله كان قالي إمبارح :
أنا عاوزك (بودره) في مشوار خاص
وأنا قولتله والشهامة هتموتني
(حشيش) مانع عندي
ده حتي (حقنك) علينا تطلب اللي إنت عاوزه

بس للأسف نسيته خالص
هوه أنا يعني دماغي لاب (توف)

مسطول : طيب وهتعمل إيه دلوقت؟
قدره : هقوله إني مت وخلاص .. !!
بورشام : يا عبيط مينفعش ..
اصلك لو إنت مت مش هيرضي يديك فلوس تاني
مهو إنت ميت بقي ..!!
هتعمل إيه بالفلوس وإنت ميت؟

قدره : عندك حق يا بورشام
طيب هقله إني نايم

كوباية : برضه مينفعش ..
لأنه ممكن يمد إيده عن طريق (البلودوس) ياكلك بالشالوت ويصحيك
وياخدك معاه برضه

قدره : يوووووووووووه
متفصلونيش بقي
خلاص خلاص أنا هتصرف

مسطول : طيب يا فالح ..
بس أوعي ترد من هنا أحسن يشم الريحة وتروح في داهية
كوباية : أه إطلع رد عليه من بره أحسن
بورشام : وبالمره تبقي (لف) النوبايل الناحية التانية علشان ميشوفش الدَخَنَة
وممكن كمان يعرف مكان (الموكنة) بتاعتنا وتبقي مصيبة
قدره : طيب طيب طيب
ده إنتم رغايين أخر حاجة
كل ده كلام ..!!
(فرغتولي) دماغي بعد ما (عمرتها)

قدره : أيوه يا بابا
معلش اصلي تعبت ومش هقدر أجي معاك
أبوه : تعبان عندك إيه يا موكوس
قدره : لالا مفيش
انا بس (وسكي) مكسر وبيوجعني
وعيني (خمرا) شوية
تقريباً ده الدور اللي بيجيلي كل سنة .. و (بانجو) منه بالعافية
أبوه : طيب لو تعبان تعالي استريح في (فرشتك) ..
وبطل صياعة يا ابن (الدايخة)
قدره : حاضر يا بابا هاخد أول (ماكس) وأروح البيت.
_____________
المخدرات
الإدمان
الضرب
السُكر
السطلة
الكيميا
..الخ
كل دي أسامي بيطلقها الشباب علي العملية اللي بتودي بيهم لمود (الهيبرة) أو (الدمااااغ)
فيه حقيقة واضحة دايماً الشقلوبانيون بيحبوا يخبوها
المخدرات بقت منتشرة جداً في كل حتة في شقلوبستان
ومبقتش تقتصر علي فئة عمرية معينة كمان

-----------
مين المسؤل عن انتشار المخدرات وتداولها بالطريقة الرهيبة دي؟
بقي سهل جداً إنك تجيب مخدرات أو إنك (تقضي) زيما بيسميها الشباب
طيب فين الدور الرقابي؟
ليه بقي فيه نغمة دلوقت في كل حتة
سواء في النكت أو الأفلام أو أو..
بتظهر الناس دي علي إنهم دمهم خفيف وبيضحكوا وسعداء؟
(حتي أنا نفسي عملت كده..!!)
وبعد كده بيسغربوا إن الشباب بقت بتدمن
سؤال لواحد بيحب يعمل دماغ
إيه الجميل في إنك تايه وعبيط ومسطول؟

طبعاً مش هقول اللي يعرف الإجابة والكلام ده
لأن للأسف الأسئلة دي ملهاش إجابة
shaklobstan@hotmail.com

هناك 90 تعليقًا:

بنجاواتى يقول...

ايه ده ؟؟!!!!
بوست جديد

انا مش مصدق نفسى ههههههههههه
مش تقول يا راجل

اما اقرا كده

بنجاواتى يقول...

اعذرنى بقى يا دكتور علشان انا عامل دماغ مهيبرة فلو لقيت اى حاجة غلط فى الكلام كلم الرقابة وقولهم ان فى واحد هنا بيعمل دماغ لما بيقوم بشغله كويس ولما بيعمل خير ما عملهوش قبل كده ولما بيسمع الشيخ مشارى وساعتها الرقابة مش هتتأخر وهتيجى بأقصى سرعة وهياخدوا قرارات حاسمة بإنهم يمنعوا الاجتماعات التى لا يبدو عليها المجون والانحراف وكمان هيعطلوا اى حاجة شكلها كده فيها خير ده غير انهم هيمنعوا شرايط الشيخ مشارى من الوصول الينا
ده غير الدور الجبار اللى هتقوم بيه اسرتى لما تعرف بانهم هينصحونى بكل ليييييين وفى أعماق أعماقهم بيقولوا ان ده سلوك كل الشباب المهيبر زيى

وأخيرا أنا عارف ومتأكد ان اى مجهودات هتتعمل من الرقابة او من الاسرة مش هتأثر معايا ما دمت معنديش الرغبة والعزيمة انى ابطل اعمل الدماغ المهيبرة دى

تحياتى على البوست الرائع

واحده من الناس يقول...

كل ده
اللهم لاحسد ولا قر ولا حقد مثلا يعنى
احنا لا بنحسد ولا حاجه
بس مشاء الله الصحه سعداك تفتكر ايه اللى كتبته
هههههههههههههههههههههه
ايه ياعم الجمال ده
روقان ومزاج عالى ايه
ياترى ضربتلك كام حجر قبل التدوينه دى
طاب ايه ياعم قلنا دى خلطه ولا جوان كده من كوالالمبور
اقرا بتمعن
بس اصبر اعمل كوباية شاى بلبن كده اعدل بيها دماغى
وارجع اعلق بمززززززززززززززززززززززاج

واحده من الناس يقول...

بص يا سيدى انا بعد كوباية شاى بلبن تمام قريت بتمعن..حلوه بتمعن دى..ولقيت مايلى..مايلى جديده ما يلى
اولا انت بتلوم على مين بالظبط ع الشباب ولا ع الاهل ولا الحكومه ف شقلوبستان؟
اقولك انا بالنسبه للشباب متعملش دمغ ليه؟.ها؟بتذاكر ومابتنجحش وتنجحش لما متذاكرش وتتخرج تترمى الشهادرات ع الارصفه
تحلم واحلامك تموت كلها
تحب بنت وتموت فيها سنين الجامعه بحالها وتتخرج عشان تحضر فرحها على قفل غيرك
والطموحات
مقولكش ع الطموحات..لو نفسك تبقى دكتور يبعتك مكتب التنسيق لمعهد خدمه
ولوعايز تبقى صحفى انت عارف طبعا لو كتبت ف ايه هتروح فين ههههههههههه
يبقا الشباب اللى مش لاقيه اى حاجه ف اى حاجه هتعمل ايه قول انت تعمل ايه
تعمل عبيطه وتبلبع اى حاجه
بالنسبه للاهل
اللى خلف يستحمل دى مقولة ستى وستك
دلوقتى معدش فى حد بيستحمل حتى الاهل
الاب من دول يلاقى ابنه هيفشل يديله زقه للفشل عشان يفشل بضمير
لا بيفكر ابه نفسه يدخل كلية ايه ولا بيحب مين
كله همه افلوس وازاى يطلع ابنه فالح ف جيب الفلوس
بالنسبه للحكومه فربك حليم ستار
انا بنت بردو ومش وش بهدله

ثانيا ياعم الصيدلى مانتو اكتر ناس بتبيع كيميا وفيزيا واحياء كمان
ولا مش واخد بالك حضرتك
تقعد بالعافيه بقا
وتعالوا زورونا
باىباى

hager za3bal يقول...

انت بني ادم فظيع .. خلتني اضحك بجد مع انني في موود مش تمام ..

تسلم بجد :)

حلم بيعافر يقول...

ايه يادكتور القد ده؟!!
ماتسيب اللى يهيبر يهيبر دا حتى دمهم خفيف قوى
ههههههههههههههه(ضحكة بعبط)
بص يادكتور اقولك على حاجة هى سبب كل حاجة
اسلوب التربية فى السنين الاولى من حياة الطفل مسئول بشكل كبير عن استعداد الافراد للانحراف(والله بجد ومش كلام كتب انا مدرس وعارف ومجرب واسال مجرب ولا تسال دكتور ههههههههههههه)
وطبعا الاستعداد هو اهم حاجة لان انا لو قدامى شكارة بانجو ومعنديش استعداد لانى اشرب مش هشرب ولا هاجى جنبها
يبقى السبب الاولانى التربية
السبب التانى بقى اننا عايزين الارض تبقى خضرا وبسم الله ماشاء الله بقت خضرا وزراعة امخدرات انتشرتن بشكل رهيب فى سينا وفى الصعيد يعنى بقينا بلد منتج وطالما احنا بلد منتج يبقى لازم نجرب اللى بننتجه دجحتى طباخ السم بيدوقه ياراجل
طبعا لما تيجى تتكلم عن الرقابة يبقى لازم تبدا من الاسرة هتلاقى بلاااااااااوى لان الاسرة فى المدينة بيكون فيها الاب مشغول طول اليوم تقريبا بالجرى ورا لقمة العيش وبيرجع البيت مش شايف قدامه ومش هيسال عن ابنه عمل ايه
فى الريف بطبيعة الحال فيه فجوة ثقافية وفكرية واسعة شوية بين الاباء والابناء فعشان كده غالبا الاباء مبيقدروش يسيطروا على عيالهم اللى بيطلعوا كارهين عيشتهم وبيتجهوا للمخدرات.....
اوعى يادكتور عقلك يوزك وتقولى ان الحكومة هتراقب حد لانها مهتمةة بحاجة واحدة بسي ...ياعم اسكت وديتنا ف داهية..هسسسسسسسسسس..يجعل كلامنا خفيف عليهم

القدر و انا يقول...

د. ياسر
بجد بوست واقعى جدا
وعجبنى رد واحدة من الناس
ضيف عليه ان كل حاجة فى شقلوبستان بتغلى ماعدا
المخدرات والناس الاثنين متوفرين حاجة ببلاش كده
تحياتى يا دكتور

adel يقول...

علي فكرة اسلوبك الساخر حلو
و غرضك كمان حلو
بس خدها نصيحة صغنونة
متسالش في اخر البوست كده سبها لفهم الناس

الادمان بقي سوء تربية علي فقدان مثل اعلي علي فشل علي احباط علي قلة ايمان (ودي اول نقطة اساسا)
للاسف احنا الحاجات دي عندنا دلوقتي اكتر من ماية النيل الملوثة

عاشقة الأحزان يقول...

السلام عليكم


كل سنه وحضرتك طيب

ههههههههههههههههههه

وربنا دمك زى العسل بتفكرنى بيا وانا مهيسه
هايل قووووووووووووووووووى
ربنا يوفقك دمت مبدع

تحياتى

بدراوى يقول...

بوست جميل يا دكتور
و ساخر اوووى
ما شاء الله عليك

بخصوص الأسئلة للأسف مفيش رقابة فى البلد
و لا فيه تربية
و المخدرات فى الساحل الشمالى منتشرة و الخمور دليفرى بالتليفون

للأسف البلد المفروض تنضف بقى

mohamed ghalia يقول...

ربنا يهدى شبابنا يادكتور
السلسلة كلها هايلة
ربنا يكرمك ويعزك
كل سنة وانت طيب

ستيته حسب الله الحمش يقول...

تسئلة مين يا عم
هو انا ها ابص للأسئلة
انا عيطت من كتر الضحك
و"الجرجير بالجزر" أن هذا نفس اسلوب سيد ابو حفيظة بالضبط
ها ارفع عليه قضية لأنه مؤكد بيتلصص ع المدونات وبينقل طريقتك
لأ المرة دي حاجة مفرقعة خالص

انتم بتلوموا على حكومة شقلوبستان؟
دي بتكيف الشباب علشان توصل الدعم ل"مستكيفيه" تسلم ايدك

المعتصم يقول...

السلام عليكم ورحمة الله وبركاته
ازيك يادكترة
عامل ايه ؟ يارب تكون بخير وفى احسن الاحوال
وكل سنه وانت طيب بمناسبة رمضان
بس انا مكنتش اعرف انك بتروح غُرز ياياسر
بقى تروح كده من ورايا
طب كنت قولى وانا اجى معاك
ايه ايه
بتنكر اومال يعنى عرفت الحاجات دى كلها منيييين ؟؟ اعترف ؟؟؟
بس قول بقى الحقيقه
انت دماغك ايه ؟؟؟ رز بلبن ؟؟ ولا شاى تقيل ؟؟
ولا اكيد هيبقى نوع جديد وجامد
صح ؟؟؟؟؟
قووووووووووووووووول
وبعدين ياعم انت زعلان ليه على الناس المتكيفه دى ؟
دى ناس زى الفل واخر حاجه
والدنيا عندهم عنب
بس نطلع احنا منها
ههههههههههههههههههه
بوست جميل يادكتور
واجابة اسئلتك انها كده علشان هى شقلوبستان
ســـــلام ياعم اروح اعمل دماغ انا كمان

المعتصم يقول...

وكمان التعليق رقم 13 شوفتش حظ زى الفل كده قبل كده ههههههههههههههههههههههه

الشعب لابد له من حكومه تشكمه يقول...

حلوه جدااااااااا بجد:)
بس للاسف مش العيب بس فى الشباب دى منظومه كامله متكامله من اول التربيه والبيت لحد اللى سمحوا ان الحجات دى تكون زى المصاصات فى ادين الشباب وبقصد عيون الامن المفنجله وفى اقاويل اخرى الساهره:)

إيمان يقول...

ههههههههههه
هههههههههههههههههههه
بجد بوست تحفه ما شاء الله عليك
انتشار المخدرات له معاني كتيييييييييير وأسباب أكتر
الانسان اللى بيستصغر المعصيه وبيرتكب كبيره بالبساطه دي شوف كام حاجه وصلته لمستوى زى ده محدش يقلي الاحباطات والحاجات والمحتاجات انت لو انسان عارف ربك سواء مسلم او مسيحي الاحباطات والازمات هقربك اكتر من ربك لكن الاساس فى اللى بيحصل ان الناس مبقاش عندها مانع وحبه فوق وحبه تحت مين وصلهم لكده وازاي وصلوا لكده هو ده السبب الحقيقي لإنتشار المخدرات وزي ما بنجواتي قال الدماغ اللى الواحد ممكن يعملها بشريط مشاري ممكن تكون اعلى من دماغ الكميا لكن متهيألي لو حد اتمسك بشريط مشاري هيتاخد تحري وممكن يلبس تهمة تعاطي

تامر علي يقول...

لاء حلوه صحييييح :)))
الكيف مش مهم المهم الكم :))

مشكلة الادمان بتتزايد للهروب من الواقع الاليم أو للبحث عن متعة اخرى غير معروفة

معكش حاجه كده :)))

على عبدالله يقول...

السلام عليكم

كيف حالك يا دوك ؟
كل عام وانت بخير
مبارك عليكم شهر رمضان
اهله الله علينا وعليكم بالخير والبركات

مسدس صغير يقول...

ايه يا عم بالراحة علينا
ايه الدماغ الجامدة اللى انت عاملهالنا دى
حشيش فايده فيك
بانجو انت تانى
بجد روعة يا دكتور
احييك على دماغك العالية

الازهرى يقول...

يااااااااااااااااه

فكرتنى بايام زمان
والدماغ الحلوه
اه صدقنى
بس روح انت جربه كده وانت تدعى لى
يا عم دا حتى الواد س بتاع الكورة المحترف بيشربها
والا شوفت الواد ع فى الفيلم الاخير بتاعه كان اخر دماغ
والا البت العسوله اياها فى االفيلم اياه كانت حاجه اخر جنان

ولا تعليق

mero90 يقول...

هههههههههههههههههههههه
بوست جامد والله خلتني اضحك من قلبي
بس عاوزة اقول حاجة ديه سياسة ال..... عاوزة تخلي الناس مسطولين ومهيبرين علشان ميحسوش بالي بيعملوه فيهم بس مش كل الغلط على الشباب لان ممكن الواحد يدمن غصب عنه وده يرجع لرفقاء السوء

اللؤلؤة يقول...

السلام عليكم
المخدرات يا صديقى مصيدة للشباب
وهى تغيب العقل بشكل غريب جداً
فعلينا أن نبعد عنها كل البعد
لأن ديننا يحرمها
وجهد مشكوووووووور
خالص تقديرى

اللؤلؤة يقول...

السلام عليكم
المخدرات يا صديقى مصيدة للشباب
وهى تغيب العقل بشكل غريب جداً
فعلينا أن نبعد عنها كل البعد
لأن ديننا يحرمها
وجهد مشكوووووووور
خالص تقديرى

حياتى نغم يقول...

السلام عليكم / بداية تحياتى لكتابتك الساخرة المتميزه .
للأسف المخدرات انتشرت بشدة وشرائها أسهل من شراء رغيف العيش وأغلب الشباب عندهم ضعف إيمان وغياب للقدوة ورغبة فى الهروب من الواقع والمسئوليه ورغبة فى التجربه والجرى وراء الشهوة والمتعه كل هذا وأكثر عمل على زيادة نسبة الإدمان والمدمنين .
وكفايه رعاية الحكومه للمخدرات وكأنها دواء وعلاج للتخلف والتراجع اللى احنا فيه .
حسبنا الله ونعم الوكيل .

إسراء توكل مسعود يقول...

تذكرت شيئاً وأنا أقرأ البوست ده ... كنا في زيارة لأبي في سجن الغربينيات ببرج العرب .. الإعتقالة الماضية .. ووجدنا على حائط ساحة الزيارات مكتوب عنوان ورقم تليفون موبايل عن أماكن بيع الحشيش والبانجو وبالأسعار .. يعنى إعلان بيع المخدرات في السجن نفسه ... يبقى يا ترى المشكلة فين ؟؟!!

Dr Ibrahim يقول...

مفهمو خاطىء "للسعادة" بأنها توهان وسطل...

لاسع افندى يقول...

انت اكيد كنت قاعد معاهم
الكلام ده مش تأليف ابدا



تحياتى اللاسعه

قلم رصاص يقول...

لأ بصراحة انت عامل دماغ عالية جدا في البوست ده
فعلا احنا في مصر .. حشيشي حشيشي انت متميز في البوست جدا ههههههههههههههههههه

رمضان كريم وكل سنة وانت طيب يادكتور

شمس النهار يقول...

ازيك
ايه يادكتورالابداع ده
مش ممكن ضحكتني جدا
وللأسف ده الواقع الشباب بيبتديها تهريج وبتختم غم فعلا
ياريت تقرا نص جرام هتعجبك جدا
والقصيده اللي في البوست السابق لطيفه وكلامها قوي
بس استقبال الاشلاء في صالة كبار الزوار فوقتني وفكرتني بالرحله الطوووووووووويله اللي رجعتها 27 ساعه بالتمام والكمال عربيه تشيلني وطياره تطيرني ومطار يستقبلني وطياره تانيه ترجعني اخيرا للوطن
بس مش اشلاء الحمد لله:)
كل سنه وانت طيب وفي احسن حال

محمد سعد القويري يقول...

الأخ الفاضل :: د.ياسر عمر عبدالفتاح ::
السلام عليكم ورحمة الله
وبركاته

رحلة ماتعة وطريفة وساخرة
في عالم التحشيش والحشيش
***إن الفراغ والشباب والجدة
مفسدةٌ للمرء أي مفسدة ***

رمضان مبارك
وكل عام وأنت إلى الله أقرب

ست البنات يقول...

السلام عليكم
:)))))))))
جميلة جدا
دمت بإبداع

سلوى يقول...

اسلوبك حلو أوى ما شاء الله
وساخر جدا

اعتقد انهم بيلجأوا للتوهان عشان ما يفكروش في حالهم

وكل ده لأن مفيش دين ولا تربيه ولا احترام للنفس

ربنا يعافينا جميعا

كل سنه وحضرتك طيب انت وكل الأسر
دمت بكل خير

Beram ElMasry يقول...

رمضان كريم
أعاده الله عليكم وجميع الأهل والأحبة باليمن والخير والبركة

الحب بين العرب فطرة وشئ مألوف
ولا يحسدوه من الخلق غير القرد والحلوف

د. ياسر عمر عبد الفتاح يقول...

بنجاواتى

جديدة دماغ مشاري دي
يا سلام لو كل الشباب تعمل دماغ من النوعية دي
دي تبقي حاجة زي الفل

د. ياسر عمر عبد الفتاح يقول...

واحده من الناس

وربنا ما عملت أي دماغ من أي نوع
إنت ناويين تحبوسني أنا عارف

بالنسبة لكل الأسباب دي ,, فهيه حقيقية
لكن دي أسباب ,, لكن مش مبررات
زي ما فيه موجة فساد بتوديك للإدامن
لازم يبقي فيه عزيمة تودينا للنجاح

وفعلاً الإخوة الصيادلة فيه منهم فئة ضالة مسوءة سمعتنا وبتبيع أدوية الجدول ,, سوق سودة
ربنا يهديهم

د. ياسر عمر عبد الفتاح يقول...

hager za3bal

أنا ببقي سعيد جداً لما بخلي الناس تضحك
لأني بعتبر الضحك سلعة ,, لازم تدعم

د. ياسر عمر عبد الفتاح يقول...

حلم بيعافر

كلامك مظبوط
وكل دي أسباب وصلتنا للحالة السيئة دي من انتشار المخدرات

وبعدين يا عم مال الحكومة بتاعتنا بالحاجات دي
حكومة شقلوبستان هيه المسئولة
حكومتنا 100 فل و14

د. ياسر عمر عبد الفتاح يقول...

القدر و انا

ربنا يكرمك
فعلاً ,, حاجات كثير حوالينا بتخلينا نروح للإتجاه ده
ومدام عجبك رد واحده من الناس
اقرأي ردي عليها بقي

د. ياسر عمر عبد الفتاح يقول...

adel

عندكم فين؟
هوه إنت في شقلوبستان؟
أصل عندنا في مصر مفيش الحاجات دي نوهائياً ,, خالص

شكراً علي النصيحة
بس لو معملتش كده هحس إني بهرتل
لازم حتي السخرية تبقي هادفة

د. ياسر عمر عبد الفتاح يقول...

عاشقة الأحزان

وحضرتك بالصحة والسلامة
الحمد لله إني خليت "عاشقة الأحزان" تضحك
ربنا يكرمك

د. ياسر عمر عبد الفتاح يقول...

بدراوى

ربنا يبارك فيك يا لماضة
كلامك مظبوط جداً

د. ياسر عمر عبد الفتاح يقول...

mohamed ghalia

اللهم ءامين

ربنا يكرمك يا محمد
شكراً علي المرور

د. ياسر عمر عبد الفتاح يقول...

ستيته حسب الله الحمش

عندك حق والله
دي حكومة ليها نظريو مبعدية
وبتحب تريح الشعب ,, وتعليه لفوووووق

ياريت كل الحكومات تسير علي نفس النهج
من أجل عالم أفضل ودماغ أعلي

د. ياسر عمر عبد الفتاح يقول...

المعتصم

والله يا زعيم عمري ما قعدت علي أي غرز
وعمري ما كنت حتي مدخن

لكن جبت الكلام ده منين؟
ده جبته من الناس ,, والشارع

د. ياسر عمر عبد الفتاح يقول...

الشعب لابد له من حكومه تشكمه

فعلاً الموضوع كبير كبير كبير كبير يعني
وليه أسباب كثيرة ,, ونتائج خطيرة

ربنا يحفظ بلدنا مصر من كل المصايب اللي بتحصل في شقلوبستان

د. ياسر عمر عبد الفتاح يقول...

إيمان

كلام حضرتك مظبوط جداً
والله يمكن تهمة دماغ مشاري ,, أصعب من تهمة دماغ هروين
ربنا يهدي

د. ياسر عمر عبد الفتاح يقول...

تامر علي

ازاي الكيف مش مهم ,,
الكيف أهم من الكم يا أستاذ


معايا ,,
عندك مكنة؟

د. ياسر عمر عبد الفتاح يقول...

على عبدالله


الحمد لله بخير
اللهم ءامين
ولك المثل

د. ياسر عمر عبد الفتاح يقول...

مسدس صغير

هههههههههه
ازيك يا صلاح
عامل إيه
منووووووووور والله

د. ياسر عمر عبد الفتاح يقول...

الازهرى

زمان إيه بس يا راجل
لا زمان ولا دلوقت يا عم
وهدعيلك إن شاء الله من ما أجربها

د. ياسر عمر عبد الفتاح يقول...

mero90

مفيش حد بيدمن غصب عنه
دي أكذوبة ومبررات واهية

شكراً علي المرور

د. ياسر عمر عبد الفتاح يقول...

اللؤلؤة

جزاك الله خيراً
وربنا يبعدها عننا جميعاً

د. ياسر عمر عبد الفتاح يقول...

حياتى نغم

تحياتي لحضرتك كمان
كلامك مظبوط
وحسبنا الله ونعم الوكيل

د. ياسر عمر عبد الفتاح يقول...

إسراء توكل مسعود

هههههههههههههههه
وكمان عاملين مينيو؟
والله دي حاجة زي الفل

أه يا بلد

د. ياسر عمر عبد الفتاح يقول...

Dr Ibrahim

فعلاً مفهوم خاطيء

د. ياسر عمر عبد الفتاح يقول...

لاسع افندى


هههههههههههه
لا مكنتش قاعد معاهم
وعمري ما قعدت القعدات دي بجد
شكراً يا لاسع

د. ياسر عمر عبد الفتاح يقول...

قلم رصاص

هههههههههههه
ربنا يكرمك
رمضان كريم ,, الله أكريم
بعودة الأيام يا باشا

د. ياسر عمر عبد الفتاح يقول...

شمس النهار

تعليق إتنين في واحد
تعليق واحد لبوستين

المهم حضرتك نورتي مصر من تاني
ألف حمد الله علي سلامة حضرتك

د. ياسر عمر عبد الفتاح يقول...

محمد سعد القويري

شكراً علي مرافقتك لنا في تلك الرحلة
هوه التحشيش وصل عندكم؟

الله أكرم

د. ياسر عمر عبد الفتاح يقول...

ست البنات

ربنا يكرمك :)
جزاكِ الله خيراً

د. ياسر عمر عبد الفتاح يقول...

سلوى

ربنا يكرمك
فعلاً ,, ناس كثير بيروحوا للإدمان للأسباب دي
ربنا يحفظنا جميعاً

موناليزا يقول...

أحييك جدا على هذا الموضوع
---
كل عام وانت بخير

سارة احمد يقول...

:)))))بجد حلوة اوى يادكتور ياسر استاذ ورئيس قسم يلا خد دي فال حلو...رغم اني مش بحب اعمل دماغ وعمري مجربت الصنف بس انا حقول لحضرتك حاجة غريبة اوى بجد انا جربت اعمل دماغ من غير ماخد حاجة!!:))) والاحساس بتاع انك مسطول وعبيط ده احساس في منتهي اللذة التوهان في دنيا بقيت عاملة زي اللعبة ايها دي الي هي عبارة عن خطوط كدة مكعبلة ومتداخلة ويقولك وصل الفار الي تحت ده الي حتت الجبنة الي فوق ونقعد نجرب طريق1و2و3و4 لحد منوصل الفار للجبنة...طب بقي لو الفار كل سككة مقفلة يعمل اية ؟؟؟يفلفص قبل مايموت...اهو التوهان دة هو فلفصة ماقبل الموت...حلاوة روح يعني فكرين ... المصيبة انهم ياحرام بجد فكرين انوا مفتاح الحياة غلابة بجد ومساكين...يادكتور ياسر ساعات العقل والتفكير بيكون مضر...المهم الوصفه السريه للوصول للدماغ من غير ماتاخد حاجة...اشتغل نفسك بس مش بلوفر:))مثل دور المسطول لمدة 5دقائق وبعدها حتتسطل بجد:)عن تجربة والله جرب يعني هي دي عليها سيئة واهو بدل متسال المساطيل وتتحوج حتجرب وبالحلال:)))...علي فكرة كلنا بننقد التوهان وكلنا مش عجبنا بس عمرنا مااخدنا خطوة اكتر من النقد علشان نحسن ظروف الغلابة المساطيل:(((((((((((

سارة احمد يقول...

كل سنة وحضرتك طيب

norahaty يقول...

ايه ياصيدلى دا؟
انت كنت معاهم ولا أيه؟
اصل مش ممكن (الـــواكعية )
فى الكلام !بجد وكأنك كنت هناك
مش انت اللى كنت هناك ؟ولا مين ؟
ولا فـــــين ؟ ولا أمتى يــــــــعنى؟

norahaty يقول...

أما عن السؤال اللولبى العبقرى
(إيه الجميل في إنك تايه وعبيط ومسطول؟)
فالاجابة هى:لان أحياناً بل كثيراً صراحة يعنى
الهروب من المشكلة اسهل من حلها
ولو بالادمان اوبالانتحار حتى !
مش فيه ناس بتنتحر لماّ
ما تعرفش تحل مشكلة
فى حياتها!
كذلك الادمان :هروب.

سمسم/سما يقول...

السلام عليكم
كل سنة وانت طيب
ربنا يعيدو علينا جميعا واحنا بالف خير
ومش عارفة اقةل ايه عن الادمان
بس مفيش رقابة ولا توعية ولا تربية من اساسو

Me7'o يقول...

إيه يا عم الدماغ العالية دى

البوست ده المفروض الواحد ياخده على صدره ومايطلعوش إلا من مناخيره

بجد تسلم دماغك

تحياتى ليك
كل سنة وإنت طيب ورمضان كريم

Shimaa Esmail يقول...

الأستاذ الفاضل الدكتور: ياسر عمر عبد الفتاح.
صاحب مدونة: ومضات.
اعتذر عن الخروج من موضوع التدوينة، لقد أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية تشتمل على البيانات التي تساعدك على الإجابة عن الاستمارة.
أرجو الاهتمام والرد سريعا.
تحياتي وتقديري.
شيماء إسماعيل عباس.
باحثة بالماجستير- كلية الآداب جامعة القاهرة.

مصطفى ريان يقول...

بص يا دكتره انا هقولك وابقى كسبت فيك ثواب انت عارف انت عارف ان فى وعي ولاوعي الوعي بيكون مقيد بالعرف والعادات والتقاليد وكل هذه الاشياء الحشيش بيغيب الوعى فالانسان بيقدر يقول ويعمل كل الاشياء اللي مابيقدرش عليها فى وعيه واللي بتكون اصلا رغبه دفينه فى اللا وعى ... علشان كده فى رجاله بتدي ستاتها حشيش قبل المعاشره الزوجيه علشان تنطلق وتنفك من كل القيود اللى جواها .. مش معتى كده انك تفهم غلط انى حشاش اوبقعد فى القعدات دي انا بتعب من ريحه السجاير لكن بحاول افكر معاك بصوت عالى وربنا يصرف عنا شر المستخبى
كل سنه وانت طيب

تأثير الفراشة يقول...

:) :) :)

إنما مع حضرتك حق المخدرات للأسف بقت منتشرة جدا و أكيد بنلمس ده جدا بحكم المهنة ، ده طبعا فى شقلوبستان

ربنا يصلح حالنا و حال المسلمين أجمعين

كل سنة و حضرتك طيب و إلى الله أقرب

رمضان كريم

mimi يقول...

الدولة دي انا عارفاها كويس

ربنا يعين سكانها ... واللي بيحبوها

رمضان كريم

وكل سنة وانت طيب

انا متابعة كل المدونات ان شاء الله في رمضان

بس مش هكتب

ان شاء الله هشوفك في افطار المدونين

GiGi world يقول...

كل عام وحضرتك يارب بالف خير
والاسره الكريمه
يارب يبقى احلى رمضان مر على حضرتك فى الطاعات وفى رضا الله وفى تحقيق كلامنياتك يارب
اللهم تقبل دعاءنا
اللهم بلغنا رمضان

فكرة من الزمن ده يقول...

دكتر عمر كل سنة وانت طيب وبالف خير ومدونتك متألقة وجذابة
تحياتي

آه من قلبي يقول...

هههههههههه
دة انا فطست على نفسي من الضحك
دة غير ان دي مبقاش اسمها جلسة انس
دي بقت
غرزة
ومعتقدش انا الشخص المناسب اللي يرد على سؤالك
اتمنى تشرفني في مدونتي المتواضعة

عاشق الحور يقول...

كلام جميل وحقيقة واقعية
اسال الله ان ينفع بة الجميع
على فكرة انت اول شخص اقرأله لاننى لسة بادىء مدونة جديدة ياريت تزورنى

د. ياسر عمر عبد الفتاح يقول...

موناليزا

ربنا يكرمك
وحضرتك بالصحة والسلامة

د. ياسر عمر عبد الفتاح يقول...

سارة احمد

حمد الله علي السلامة
إيه الغيبة دي كلها

كلام حضرتك مظبوط جداً جداً
وفعلاً عن حضرتك حق في كل كلمة

كل عام وحضرتك بخير
وربنا يتقبل

د. ياسر عمر عبد الفتاح يقول...

norahaty

وربنا ما كنت معاهم
ولا عمري في يوم حضرت أيتها جلسة من الجلسات دي
شكلكم هتحبسوني

حضرتك بتتكلمي عن الأسباب
لكن عمرها ما كانت مبررات

كل سنة وحضرتك طيبة
وربنا يتقبل مننا صالح الأعمال

د. ياسر عمر عبد الفتاح يقول...

سمسم/سما

اللهم ءامين
جزاكِ الله خيراً
وربنا يهدي الجميع

د. ياسر عمر عبد الفتاح يقول...

Me7'o

بلدياتي وجاري
نورت المدونة يا باشا والله
كل سنة وإنت طيب

د. ياسر عمر عبد الفتاح يقول...

Shimaa Esmail

الإيميل وصل
وكل اللي حضرتك طلبتيه اتعمل
ولو فيه أي خدمة تاني أنا موجود

د. ياسر عمر عبد الفتاح يقول...

مصطفى ريان

مصطفي بيك
وجهة نظر برضه
وأخوك والله برضه نفس الكلام
مقدرش أقعد جنب واحد بيشرب سجاير أصلاً

المهم إنك رجعت تنور المدونة تاني من جديد
كل سنة وانت طيب يا درش

د. ياسر عمر عبد الفتاح يقول...

تأثير الفراشة

أيوووووووووووووه
في شقلوبستان
مش هنا
همه اللي بيلمسوا ده
أنا وربنا ما لمست حاجة خااااااالص

د. ياسر عمر عبد الفتاح يقول...

mimi

كويس إن حضرتك عافاها
أجازة سعيدة ,, وترجعي بالسلامة إن شاء الله

د. ياسر عمر عبد الفتاح يقول...

GiGi world

اللهم ءامين
جزاكِ الله خيراً
وربنا يتقبل منا جميعاً صالح الأعمال

د. ياسر عمر عبد الفتاح يقول...

فكرة من الزمن ده

دكتور عمر مين؟
الحاج عمر أبويا يعني
هوه صحيح دكتور برضه ,, بس معندهوش مدونة

د. ياسر عمر عبد الفتاح يقول...

آه من قلبي

أه هيه بقت حاجة شبه الغرزة فعلاً
ربنا يبعدنا عنها
ويهدي الشباب

د. ياسر عمر عبد الفتاح يقول...

عاشق الحور

ده شرف كبير ليا يا أخر
ومدونتك إن شاء الل هتنجح وتكسر الدنيا
ربنا يكرمك

غير معرف يقول...

حشيش فايده فيك
افيون مرة اقولك هيتقبض علينا
بوده تدمن ياجميل
لا بصراحه عسل اوى ودمك خفيف
ههههههههههههههه
انا بقت بنقراها وعمالة اضحك
انت كتبتها فى اى غرزة ديه ههههههههههه