28 مايو، 2009

قصيدة : أمُّ سِتِّ عُقُوْدٍ


بمناسبة الذكري ال 61 لنكبة الأقصي

قصيـــدة

 أمُّ سِتِّ عُقُوْدٍ
..
.
القافية بضم اللام وإشباع الضم .. وكأنها رجلو , طللو 
.
.
سِتُّـوْنَ عَاْمَاً قُدْسُنَا تَسَـلُ .. أَيْنَ المُـرُؤَةُ فِيْكَ يَا رَجُـلُ؟

.
.
أَقْصَـاكُمُ العِرْبِيْدُ دَنَسَـهُ .. وَأَتَيْ عَلَيْ أَرْكَانِـهِ الطَّـلَلُ

.
.
.بِتُّـم عَلَي الأَلحَانِ فِي طَرَبٍ .. وَمَـوَاكِبُ الأَشْـلاَءِ تَتَّصِلُ


كَمْ شَيَّعَ الأَشْيَـاخُ أَطْفَـالاً .. مِنْ غَيْرِ غُسْـلٍ بَعْدَمَا رَحَلُوا
.
.
وَابْكِوا عَلَي الأَعْرَاضِ تُغْتَصَبُ .. أَخَوَاتُكُمْ مِنْ رِجْسِهِمْ حَبَلُوا



...



كَمْ طُفْتُ فِي التَّارِيْخِ مُسْتَتِرَاً .. مِثْلَ العَذَارَيَ خِدْرُهَا خَجَلُ
.
.
فَاليَوْمَ عِرْضُ المَجْـدِ يُنْتَهَكُ .. وَأُسُـودَنَا يَرْعَاهُمُ الحَمَـلُ


يَا أُمَّتِي إنَّ السُّيـُوفَ نَبَـتْ .. وَجُيُوْشُنَـا عاثَتْ بِهَا العِلَلُ


بَـاتَ التَّدَيُّنُ تُهْمَـةً نُكْـرَا .. وَشَـرِيعَةُ الإِسْلامِ تُخْتَـزَلُ


فِي صَوْمِ شَهْرٍٍ أَوْ صَلاةِ ضُحَي .. وَفَضَائِلُ الأَخْلاقِ تُنـْتَعَـلُ


لِلْجَهْلِ آلافُ الـدُّرُوبِ هُنَا .. وَالعِلْمُ قَدْ ضَلَّـتْ لَهُ السُّبُلُ


الغَـرْبُ أَضْحَي قبلةً تُرْجَي .. وَمَنَـاهِجُ التَغْـرِيْبِ تُنْتَهَلُ


صِرْنَا أَحَـطَّ الخَـلْقِ قَاطِبَةً .. وَشَبَابُنَـا أَلَهَـاهُـمُ الغَزَلُ


وَتَمَـلَّك الـذُّلُ البَغِيْضُ بِنَا .. نَغْـدُو أُسَارَيَ , عَزْمُنَا كَلَلُ


أَضْنَي جُفُوْنَ هِـلاَلِنَـا أَرَقُ .. نَمْضِي سُكَارَي , خَطْبُنَا جَلَلُ




فَبِنَشْرَةِ الأَخْبَارْ

أَوْ سَمِّهَا الأَوْحَالْ

شَاهَدْتُ خِنْزِيْرَاً يُضَاجِعُ أُمَّةً

بِالعُهْرِ جَالْ ..

قَدْ قَدَّ ثَوْبَ الطُّهْرِ مِنْ دُبُرِ

فَفَزِعْتُ فِيْ لمَِحٍ مِنَ البَصَرِ

وَتَهَاوَت المُقَلُ

حَاْنَ النِّضَالْ ..

أَيْنَ الرِجَال؟

فَأَجَابَنِي الخُذْلانُ وَالوَجَلُ
.
هُمْ فَي سُبَاتٍ أَوْ لَدَي سَمَرِ

يَا أمَّ سِتِّ عُقُوْدٍ ..

بِاللهِ فَأْتَزِرِي

يَا أمَّ سِتِّ ذُنُوْبٍ ..

بِاللهِ فَاصْطَبِرِي

وَاخْفِي دُمُوْعَ العَيْنِ فِي المَطَرِ

وَارْجِي مَلِيَّاً مَشْرِقَ الفَجِرِ


----
بقلـمـــي
--------------

25 مايو، 2009

أكئب ليالي العمر

أكئب ليالي العمر
طبعاً من غير كلام دي ليلة الإمتحان
ودي هتوافق ليلة بكره إن شاء الله
وأنا كتبتها علشان أستدر عطفكم وتدعولي بضمير
حلوة أستدر دي ..!!
إن شاء الله حلوة

.
.
 
::
التجهيزات::
أنا قبل ما أذاكر ليا طقوس
أولاً لازم أروق الأوضة كويس أوي أوي
وامسك الكمبيوتر أفككه مليون حتة
واخد الكي بورد والماوس أديهم لأخويا
وأقله زي أي مدمن عاوز يتعالج

لو جيت بكيتلك واترجيتك علشان تديني الكي بورد والماوس أوعي تطاوعني
وبعدين اقوله في مشهد تراجيدي سينيمائي عبيط
أوعي تضعف قدامي .. أنا عاوز أنجح يا محمد يا أخويا
ياخدهم مني بمنتهي اللامبالاة ويرميهم علي المكتب
وكأنه لم يشعر بمأساتي ولم يدخل في مود المشهد
ويتمتم ببعض كلمات من عينة
سايب السنة كلها وجاي تذاكر ليلة الإمتحان ..
لو نجحت تبقي تعالي توف عل..
قبل أنا ينهي صوت إرتطام الباب بأنفي هذه التمتمة


(كم هو ظريف أخي الصغير محمد)
ملحوظة : اخويا الصغير محمد جسمة أكبر مني مرتين
علشان كده تلاقيه واخد عليه شوية .. شوية صغيرين


وهنا فيه نصيحة لكل شاب وكل فيتاة
إدي الحاجات دي لأخوك أو أختك .. لكن أبوك لا
لأنه ببساطة مش هيديلك الحاجات دي تاني يوم .. ولا ثالث يوم .. 
ولا هتشوفهم تاني أصلاً


::
وقت المذاكرة :: 
انا وزي أي طالب مصري .. مبذاكرش غير لما بتزنق زنقة مهببة
حتي في ثانوية عامة كنت بذاكر من بداية شهر ثلاثة(مارس)
وده طبعاً بالنسبة لطالب عاوز يدخل كلية قمة .. مأساة

لكن في الكلية
الإيديولوجيات اتغيرت كثير
ليلة الإمتحااااااان .. وبس
هتقولولي إزاي؟
هقلكم ده سر من اسراري العسكرية
واللي هينزل إن شاء الله في كتابي القادم
(إزاي تنجح بجيد كمان .. ومتذاكرش غير ليلة الإمتحان)
انتظرووووووووووونا

كمان فشلت جميع محاولات المذاكرة النهارية منذ إنتهاء ثانوية عامة
المذاكرة تبدأ بعد صلاة العشاء ..

::مكان المذاكرة::
لازم أعمل كوباية شاي وزمان كان كاتشينو
(منه لله دمر معدتي)
وبذاكر علي ترابيزة أو علي السفرة
مش علي مكتب .. المكتب ده أحط عليه الكتب بس
وأرتب كل الورق جنبي 
وأحط كل حاجة محتاجها خلال عشر ساعات مثلاً في المتناول ..
قال يعني علشان مقومش .. هع هع هع هع


أهم حاجة الكرسي
لازم يبقي مريييييييح جداً ..
وأزنقه جامد في الترابيزة بحيث إن ظهري يكون مفرود
مش كفاية معدتي .. كمان ظهري هيبوظ


::البداية::
أسمي الله وأدعي شوية
وأمسك القلم
وأكتب علي الورق حاجة من إثنين
يا إما
هنجح غصبن عن التخين يا ولاد التييييييت
المنهج كله هيخلص دلوقت بعون الله

يعني شوية كلام حماسي من ده
أو الطريقة التانية (برضه مجربة)
أكتب
أنا خلاص ميهمنيش إني أشيل المادة
انا هذاكرها فور فن بس


ودي بتخليك تذاكر بأعصاب هادية
أهم حاجة إنك تشتغل نفسك ..!!

وأقسم المنهج
وابدأ بسم الله


طبعاً الناس كلها هتقول إني رزين وهادي وبحب أذاكر وأنا قاعد ومستقر
كل القواعد دي بتنتهي في خلال ساعة علي أقصي تقدير
لأني ببدأ أتحول
لذا منصحش اي حد يقعد جنبي وانا بذاكر
لأني بكلم نفسي كثير .. وبزعق .. 
واقعد أؤلف أغاني تفكرني بالمنهج
وبقوم أتنطط .. وأجري .

وأدخل أصحي أخويا أقله اسمع الحتة دي مهمة أوي ... 
هتيجي بكرة في الإمتحان إن شاء الله
واشرحله حتة في المنهج


طبعاً ليلة الإمتحان كله بيبقي مأمن نفسه مني
وحاطط عصاية جنبه وهو نايم
وأول ما أقرب .. طااااااخ

(والله أنا مسكين ... بيضربوني جامد)

وبعدين أذاكر وأنا واقف .. وبعدين أقعد علي الأرض
وبعدين اتمشي وأمسك الورق


أفضل كده لحد صلاة الفجر
أنزل أصلي في اي مسجد من مساجد رجال الأعمال
المسماة بمساجد الإكسبريس

وأرررررررررررجع بسررررررررررررعة علي المذاكرة
بس لازم كوباية شاي تانية
لأن الأولي بتكون فقدت تأثيرها
وأقعد أذاكر .. بس بيبقي بتركيز أكبر
وبكون تعبت من التنطيط والجري .. وبقعد مش بتحرك

أهم سمات المرحلة دي ... الحماااااااااام
باختصار .. بكون مزنوق أوي (في المذاكرة يعني يا خفيف) 
وطبعاً من القلق الجهاز الهضمي كله بيتلخبظ
فلما بحب أدخل الحمام باخد الورق معايا .. 
نياهاهاهاهاهاهاهاهاهاها

وقبل الإمتحان بساعة ونص
برمي كل الورق من إيدي
وأدخل أخد دش .. 
واشغل حاجة علي الجهاز وأعلي علي الأخر
واروق دماغي ..
وأقنع نفسي إني عملت اللي عليا .. وزيادة


وأروح الإمتحان ..
وبرفض فكرة المراجعة لحد باب اللجنة نهائياً
بحس إنها بتنسيني المعلومات

لازم أوقف مذاكرة قبل الإمتحان بساعتين مثلاً

وبس كده

أه نسيت أقلكم
أنا أول طالب في الدفعة بيطلع من اللجنة
أجعص إمتحان مياخدش معايا ساعة زمن


تحذير أخير
Don't Try IT

أنا بخلص ذمتي علشان محدش يقولي إنت سقطتني

شكلي كده هحسد نفسي ومش هعرف أحل في الأبلايد
دي تبقي مصيبة
دعواتكم معانا بقي
مش هوصيكم تاني
----------------
تهنئة حارة ل
مصطفي ريان
صاحب مدونة
علي صدور كتابه الأول

22 مايو، 2009

الدرر المنتقاة

الدرة انهادره بقى لرجلٍ من ملوك الدرر

قال بن القيم:

غرس الخلـــوة يثمـــر الإنــس



التعليــــــق

عمرك عشت الانس بالله ..؟؟؟؟

يعني عمرك حسيت انك متونس بربنا..؟؟؟

عمرك حسيت بجمال الطاعه .؟؟؟

عمرك دخلت جنة الدنيا؟؟؟

طيب عاوز تحس بيها؟؟

عاوز تعيشها.؟؟؟

منفسكش

تتونس بربك ..؟؟!!


بن القيم قالك الحل

الانس ده ثمرة ... تزرعها .. تكبرها .. تراعيها .. تسقيها

وفي النهاية تقطفها وتتمتع بيها

ثمره ... وازرعها ..!!!! 

طب ازاى ..؟؟؟؟

تزرعها فى الخلوه بينك وبين ربك

تسقيها بالصلاه .. تقويها بالدعاء ... تنميها بالقرآن

وتقطفها فى الثلث الاخير من الليل



عن أبي هريرة قال قال رسول الله صلى الله عليه وسلم


إذا كان ثلث الليل أو شطره ينزل الله تبارك وتعالى إلى سماء الدنيا
فيقول هل منسائل فأعطيه هل منداعي فاستجيب له هل من تائب
فأتوب عليه هل منمستغفر فأغفر لهحتى يطلع الفجر

ساعتها بس تجنى الثمرة


الانس بالله ..
.
.
.
.
أحد البوستات المكوكية لضيق الوقت
وأسألكم الدعاء
--------------
تحديث مهم
.
صدر عدد جديد من
.
.
ورجعت تاني للمجلة بعد فترة غياب بقصيدة
.

15 مايو، 2009

ومضات


*كما قيل ...
ليس كل ما يلمع ذهباً
.
فكلما تقدمت بك الحياه فى اتجاهها الصحيح

تزداد علماً .. تزداد وعياً .. تزداد درايةً
.
لتكتشف أنك كنت بين أحضان وهمٍ كبير

وأن كل ما يلمع حولك ليس إلا أضواء مساراتٍ كاذبةٍ
وُضِعت بكفاءة بالغة لتخفى جادة الصواب

فلا تنخدع بأقنعةٍ جميله باهرة
تخفى خلفها وجوهاً تعيسة قاتمة
 
وحدهم السفهاء هم من يصدقون كل ما يقال لهم


فتش عن الحقيقه بين خيالات السراب
فتش عن الحق بين ركام الباطل.


*فى بعض الأوقات يكون عليك أن تكف عن الثرثرة

وتصمت قليلاً

لتسمع وقع أقدام المارين .. ولتراقب الكون من حولك

لتحدد نقطة إنطلاقك الجديدة.


*قد يصير الإنسانُ حكيماً

وصاحبَ نظرةِ أكثر موضوعية

حينما يفقد شيئاً عزيزياً عليه

أو حينما ينخدع فيه.



*أحياناً يكون عليك أن

تلقى بكل الأدلة المادية للجحيم
وأن تسمتع بصدقٍ لذلك الصوت
الذى يتردد صداه داخلك.


*كونك إنساناً عادياً

فى مغبة هذا الزمن _ الغير عادى_

لشىءٌ يستحق الإشادة والتقدير.



*كن (أنت)

فمهما قلدت وغيرت
فلن تكون خيراً من أن تكون (أنت).

*أحيانًا ٌقد تحسد أناساً علي قدرتهم الرهيبة
على عدم التفكير

وأخذ الأمور ببساطةٍ وسطحيةٍ


فأعمارهم فى الغالب أطول ويعيشون أسعد منك بمراحل.


11 مايو، 2009

أنفلونزا الصراصير بشقلوبستان

دي حلقة جديدة من شقلوبسان بعنوان
أنفلونزا الصراصير
.
(نزلت هنا ومش علي مجلة رؤية زي كل مرة لأنها اتكتب متأخر أوي بسبب ظروف الإمتحانات)
.
.
يجلس مذيع النشرة الشقلوبانية ليتلوا أخر الأخبار ,
بينما ترتسم علي وجهه علامات قلق واضحة علي غير العادة ,
وقال بصوت أشبه بالهمس لينقل مع ذبذبات صوته الضعيف الرعب والقلق لكل مشاهدي النشرة


تزايدة نبرة التحذيرات العالمية من إنتشار مرض أنف .. أأأ .. ايهههه

ثم ينقطع صوته ليحاول جدلاً إبتلاع خصة وهمية في حلقه الجاف
مرض أنفلونزا الصراصير , وتواردت أنباء من جميع
بقاع العالم تؤكد تحول المرض إلي وباء فتاك ,

كما أعلنت أغلب دول العالم حالة الطوارىء القصوي ,

بينما أبيد شعب الفكسيك بأكمله ليحل بدلاً منه شعب من الصراصير بزعامة

(صي صيرصارا)
والمعرف بتوجهاته اليسارية الشيوعية .


وعلي صعيدٍ أخر يقام الأن مؤتمر صحفي للدكتور (خميس بعافية) وزير الصحة الشقلوباني


وستننتنتنضموا للمؤتمر الأن عبر كاميراتنا الحديثة  ... أوي
 

دي أحسن من بتاعة المويال زوكيا إف 95 علي فكرة


وفي المؤتمر


يدخل الدكتور خميس ممسكاً بمنديل ويضعه علي أنفه ,

ويقف أمام المنصة مخاطباً الشعب الشقلوباني بثقةٍ كبيرة من أجل
إعلان أخر تطورات المرض بشقلوبستان وكل الشعب ينصت له:


تك تك تك

واحد اتنين ثلاثة .. صلي
تك تك تك ... سامع ياللي ورا

هووووووووم


ينادي أحد مهندسي الصوت بالقاعة : المايك شغال يا باشا وزي الفل

قول إنت علي طول الكلمتين بتوعك , سمعنا جمال رنين أحبالك الصوتة.

(ثم يتمتم : ذلك الوغد أتو به من محل حلاقة حيث كان يعمل (مطاهراً) ليكون وزيراً للصحة) 



هنا يستكمل الوزير خطابه مرةً أخري

أيها السادة ,

أعلن بمليء في أن شقلوبستان خالية تماماً من مرض أنفلونزا الصراصير

وكل هذا بفضل جهود السيد (هاتشووووووو) الرئي (كح كح كح) الرئيس
ونحن لم نألوا جه

(أوووووووووع ..)

(ناوله أحد المساعدين كيس بلاستيك ليفرغ محتويات بطنه فيه) ,

ثم أكمل

أه أه (تلهث أنفاسه)

لم نألوا جهداً من أجل المحافظة علي صحة المواطنين ,
ونهيب بهم عدم الإنسياق وراء الشائعات التي انتشرت حول وجود حالات مرضية ف

(خخخخخ .. تفوووو)

في بلدنا الحبيب .


يقوم أحد الصحفيين

ممكن سيادتك تقولنا أعراض المرض

يرد السيد الوزير قائلاً

مثل أعناض أي منض أمفنونزا
يعني كحة وانتفاع دنجة الحنانة وإجهاد ووجع المفاصن (أه يا ركبتي ياني) وغثيان (تنجيع يعني)
بالإضافة إلي نمو قرني استشعار أعلي الرأس

(يمد يده ليتأكد من ثبات الباروكة)
ثم يصيح
شقلوبستان بخير يا جماعة
مفيش حاجة تستد ... تس


يضع يده علي جبهته ثم يترنح قبل أن يسقط دفعةً واحدة علي الأرض ميتاً
بينما يخرج من جيب قميصه صوريصار ليهرع الجميع في رعب شديد خارج القاعة

ويجري خلفهم هذا الصوريصار الجبار في شجاعةٍ نادرة.

 
ينقطع الإرسال علي الفور ليعودوا إلي الإستوديوا مرةً أخري

 
ويبدوا أن المذيع لم يكن علي استعداد كامل حيث أظهرت الكاميرات نزول مادة مخاطية من أنفه
بينما يبحث هو عبثاً البحث عن منديل (نضيف) فلم يجد ,

التفت يميناً ويساراً وفي خلسة رفع يده ومد كمه ليمسح أنفه ويزيل المخاط ,

وترتسم بعدها علي وجهه ابتسامة راحة بلهاء وكأنه يقول

(هه .. محدش شافني).


إنت بتعمل إيه يخرب عقلك إحنا علي الهواء ..
المؤتمر الصحفي خلص من بدري

كان هذا صوت المخرج من سماعة الموبايل الصيني المعلقة بشريط لحام أزرق(لون الجاكيت) في أذنه.

ينتبه المذيع

إحم إحم
أأأأأ .. إنننن الللل اييييه
ووو بب
إحم

وبهذا أثبت السيد الوزير بما لا يدع مجالاً للشك أن شقلوبستان بلد الأمن والأمان ,
وانها خالية تماماً من الأمراض والأوب ..

يشعر بشيئٍ يمشي علي كتفه يمد يده إليه ليجده صوريصار أخر من جناح المارينز
نظر إليه نظرةً سادية متوحشة ثم ضحك ضحكات شريرة متقطعة

قبل أن (يزفره) عطسة محملة برذاذ كيماوي فتاك لترديه قتيلاً في الحال.

وفي قرية (أبو قرصار) بأبر شقلوبستان يدخل وهدان علي أبيه بعد أن انتهت النشرة

 

يابا يابا يابا المادرسة كولاتها بتجول إن الإنفلوزة بتاعة الصراصير ملت البلد
وإننا لازمن وحتمن ولا بود نلبس فلاين حمالات جوتونيل يابا علي وشونشنا
علشان منموتش


فينتبه جعيدي أبو وهدان من (أصعته) علي المصطبة ليلزقه كف علي (جفاه)


 هيه دي أخرة تربيتي فيك يابن الفرطوس ..

عاوز تلبس فالنة حمالات وجوتونيل كمان
ياداهية دجي


أيتها السماء فلتومسكي بصواعقكي ..

ده عيل صوغيرومش فاهم حاجة (بتعطيش الجيم)
وبعدين بقي إنت يا وله هتفهم أكثر من الحاكومة والتلافزيون.

أجري يا وله نادي لامك تعميلنا لجمة ناكلها
إجري كتك خابط في نفوخك 

وعلي أرض الفكسيك بأنتيكا الجنوبية , معقل الثورات وأرض المغامرة ,


يقف (صي صيرصارا) ليحي الجماهير العريضة

عقب إنتصارهم المدوي وجلوسه علي سدة الحكم

ليلقي خطبةً حماسية تلهبت حماسة ملايين الجماهير الصرصورية الملتفة
حول زعيمهم القائد والرفيق والمناضل:


إننا اليوم نجني ثمرة كفاح ونضال أجيال من الصراصير علي مر العصور,

إن نصرنا هو في الحقيقة نصر لفكر كل قادتنا ومفكرينا الأوائل أمثال
(كارص صاركس) , (وصرصاديمير لينين) , ( صاو تصي يونج) ,
فلتباركهم السماء ,
وإننا أبداً لن نكون بعد اليوم مداساً لكل شوز باتا معفن ,
أبداً لن ننحني مرةً أخري تحت وطأة القهر الإنساني الحقير,
وأقولها اليوم عاليةً مجلجلةً لكل صرصورٍ فكسيسي ولكل صرصورٍ أنتيكي


أرفع رأسك يا أخي فقد مضي عهد البلاعات


وأوجه رسالةً لكل صوريصار مستضعف في العالم :

إنني لأشعر بكل لدعة شبشب تنزل علي قفاك ,

وحيثما كانت الثورات الصراصيرية البروليتارية ضد البرجوازية البشرية فذاك موطني.

وعلشان متضعش الحلقة من غير ما نستفيد حاجة
نطلع من كله ده بإيه
إن فيه فجوة كبيرة بين كلام المسؤلين وأرض الواقع(ده طبعاً في شقلوبستان)

وإننا لازم ولو لمرة واحدة في حياتنا ناخد فعل
وبلاش كل مرة يبقي رد فعل
مرض بينتشر في العالم كله ..
لازم ناخد كل إحتياطاتنا منه
مش نستني لما يجي وبعدين ندور علي طرق العلاج

وده لازم يبقي علي المستوي العام وكمان علي المستوي الشخصي

زي نظافة حضرتك الشخصية
(زي والعياذ بالله الحموم كده)

وإهتمامك بصحتك وصحة كل الناس اللي حواليك.

وبلاش افتكاسات في العلاج وفتاوي طبية لكل من هب ودب.

واقعدوا بعافية.


الحلقة فكرة المدونة

بسمة صلاح

وأي حد عنده فكرة لحلقة جديدة يكتبها هنا

أو علي الميل الرسمي للدولة

shaklobstan@hotmail.com

08 مايو، 2009

الدرر المنتقاة

قال الشيخ عائض القرنى


امس مات ، واليوم في السياق ، وغدا لم يولد ، وانت ابن الساعه ،


فأجعلها طاعه ،
تعد لك بأربح بضاعه.


التعليـــــق

سبحان الله .... ناس كتير مشغوله باحساسين

الإحساسين دول همه سبب الهسهس عند كثير مننا


الأول الحزن
..

وده بيبقى في الغالب على شىء عدى وانتهى

لكن بتقعد تبكي أطلاله وتكئب نفسهاوتكئبنا معاك

مع انك المفروض تاخد منه العبره والعظه .. لأن الحياة مبتقفش تستني حد

ولسه ياما هتشوف .. إنت لسه شوفت حااجة

و احتسب كل مآسيك الإغريقية عند الله سبحانه وتعالي

لأن أمر المؤمن كله له خير لنص حديث الرسول
صلي الله عليه وسلم

صلوا عليه

ولن يفيدك البكاء على اللبن المدلوق



وبعدين يا سيدي
ليس من الخطأ ان تخطأ .. وليس من الصواب الا تخطأ

كما انه لولا الخطأ .. ما عرف الصواب


الاحساس التانى الخوف


وده بيبقى عادة من المستقبل ..

وناس كثير شايلة هم بكرة ومبتقدرش تنام ولا تعيش يومها

طيب المستقبل ده بإيد الله

فالذى اعانك ويعينك الان هيعينك فى المستقبل


وقد تكفل الله سبحانه وتعالى به ..

وما شاء الله كان

وبعدين كيف تسأل الله عن رزق يومٍ لم تعشه ...

فهو سبحانه وتعالي لم يسألك عن يومٍ لم تعشه

وعن عملٍ لم تعمله

واعلم ان من توفيق الله ان يشغلك بما يهمك

فاغتنم يومك ولا تشغل نفسك بما كان .. او لم يكن


اشغل نفسك بيومك

هوه ده اللي تقدر تغير فيه فعلاً

ويومك ده كان في يوم من الأيام مستقبل مجهول بتحلم بيه ..

وبكره ...
لو مستغلتش يومك كويس يبقي ماضي أليم تندم عليه

وتفضل في نفس الدائرة المفرغة بلا نهاية


أسأل الله سبحانه
وتعالي أن ينفعني وإياكم بتلك الكلمات

إنه ولي ذلك والقادر عليه



حلقة سريعة لظروف إمتحانية صعبة ..

ومرضتش أغيب عنكم ..

لأني عارف طبعاً متقدروش تستغنوا عني ... أبداًاًاًاًاًاً

هع هع هع هع هع هع هع

04 مايو، 2009

ثلاثيات (( ترانيم بوح ))

ثلاثيات
ترانيم بوح

.

.

قَلَمِى يُرَاوِدُنِى لأكْتُبَ لِلوجُوْد

عَنْ بَعْضِ طُهْرٍ
ضَاْعَ  فِى زَمَنِ الجُمُوْد

عَنْ جُذْوَة
لِلشَمْسِ آلَتْ لِلخُمُود
 
.
.
.

عَنْ بَوْحِي وَكَلِمَاتِ أُغْنِيَتِي

بَعْضِ البَقَايَا مِنْ خَيَالاتِ أُمْسِيَتِي


وَوَأْدِ الصُّبْحِ عَلَى عَتَبَاتِ أْزْمِنَتَي
 
.
.
.


قَدْ كُنْتُ أَرْقُبُ أَنْجُمِي حِيْنَ المَسَاء

طِفْلاً
يُدَاعِبُ مُقْلَتِى نُورُ الضِّيَاء

تَسْرِي بِأَرْكَانِي الأمَانِي بِلا انْتِهَاء

 

.
. 



مَهْدُ العُيُوْنِ الَّذِى فِي القَلْبِ أَحْفَظُهُ

مِعْرَاجُ رُوحِي للمَدَى مَازِلْتُ أَرْقُبُهُ


وَالحُلْمُ فِى عَيْنِي ارْتَقَي فَجْرَاً قَدْ حَانَ مَشْرِقُهُ

.
.
 

وَتَأْخُذُنِي الحَيَاةُ مِنَ المَوَانِي لِلمَرَافِي

حَتَّي هَبْتْ رِيَاحٌ عَاصِفَةٌ بِأَحْلامِي

وَفِي لَحْظَةٍ بَاتَتْ أَمْوَاجُ التِّيْهِ عُنْوَانِي


  



وَتَقَطَّعَتْ بِى سُبُلُ التَّخَبُّطِ وَالشَّتَات
.
مُؤْنِسِي وَجَعِي وَأَقْتَاتُ الفُتَات
.
.وَطَفِقْتُ أَهْذِي بَاحِثَاً عَنْ لافِتَات

 



وَقَدْ بِتُ يَأْخُذُنِي الحَنِين

نَحْوَ
الرُّبُوعِ الخُضْرِ وَالجَدِّ الحَزِيْن

أُخْفِي دُمُوعِى لَكِنْ يَفْضَحُنِى الأَنِين



 

فَتُرَي هَلْ مِنْ رُجُوعٍ أَوْ إِيَاب؟

لِسَبِيلِ حَقِّ
عَنْهُ قَدْ طَالَ الغِيَاب

لبَقَايَا طِفْلٍ قَدْ تَاهَ مَا بَيْنَ الضَّبَاب


 

 

فَيَا قَارِىءَ الشَّعَرِ الَّذِي خَطَّتْ يَدَايَا

يَا مَنْ سَمِعَتَ البَوْحَ يَسْرِى مِنْ نِدَايَا

هَشّمْ ظَلالَ الزَّيفَ فِى كُّلِ المَرَايَا


 

 


وَاحْفَظْ حُرُوفِي البِكَرَ فِي زَمَنِ الغُوَايَة

وَامْقُتْ تِلالَ الكُفْرِ مِنْ قَبْلِ النِّهَايَة

وَامْضِي أَبْيَاً حَتَي تَرَانِيمِ الهِدِايَة

..

يارب الشخبطة دي تعجبكم.

ونقول تاني

.

مجلة رؤية مصرية نزلت وأخوكم كتب فيها حاجتين كده

أول حاجة كلمة العدد

والثانية

فيه هناك دفتر حضور(التعليق يعني) ولازم كله يمضي

01 مايو، 2009

المقامة الصيدلية


تحديث مهم
مجلة رؤية مصرية نزلت وأخوكم كتب فيها حاجتين كده
أول حاجة كلمة العدد
والثانية
فيه هناك دفتر حضور(التعليق يعني) ولازم كله يمضي
يلا بقي اقرأوا
المقامة الصيدلية

أولاً تعريف بسيط بفن
المقامات
: هوه فن نشأ في القرن الرابع الهجري علي يد بديع الزمان الهمذاني , والمقامات عبارة عن مجموعة من الكلام المحسن والبديع والمقفي ويعتبر فن قصصي علشان بيحكي قصة معينة أو فيه نصيحة.

لو تفتكروا أخدنا المقامة الحلوانيةلبديع الزمان الهمذاني في ثانوي.


ثانياً : ياريت نخلي بالنا من التشكيل الموجود علي الكلمات الأخيرة حين النطق وخاصة هل فيه تنوين أو لا علشان القافية تتظبط.


المقامة الصيدلية



فِيْ لَيْلَةٍ قَدْ كُنْتُ فِيْهَا نَائِمَا , أَفْتَرِشُ الأَرْضَ وأَلْتَحِفُ السَمَا , وَعَيْنِيَّ يَمْلَؤُهَا القَرِيْر , وَتُرَدِدُ الأَفَاقُ أَصْدَاءَ الشِّخِيْر , حَتَي سَمِعْتُ أَصْوَاتِ الهَرَج , وَتَعَالَتِ الحَرَكَاتِ وَاشْتَدَ المَرَج , فَصَحَوْتُ فَوْرَاً فِي فَزَع ,  وَجَرَيْتُ نَحْوَ أَهْلِي فِيْ جَزَع , مَاذَا دَهَاْكُمْ يَا تُرَي؟ , وَلِمَ الصَّرِيْخُ وَالْبُكَا ؟ , نَادَوا بِإِسْمِي فِيْ فَرَح ,تَعَالَي قَدْ زَالَ الطَّرَح , ظَهَرَتْ نَتِيْجَةُ ثَانَوِي , فَطَفِقْتُ رُعْبَاً أَهْوِي , حَتَي أَتَانِي صَوْتُ أُمِّي فِيْ سَعَادَة , حَصِلْتُ عَلَيْ مَجْمُوْعِ طِبٍ وَزِيَاْدَة , وأَخْذُتْ أُمِّيْ فِيْ عِنَاقي , وَقَدْ كُنْتُ فَرِحَاً لانْعِتَاقِي , مِنْ سِجْنِ الدِّرَاْسَةِ الثَاْنَوِيْة ,وَبِمَجْمُوْعِي ذِي الطَلَّةِ البَهِيَّة .

ولَمَّا ذَهَبْتُ لأَسْحَبَ الوَرَقَاتِ , مِنْ قِسْمِ تَنْسِيْقِ الرَّغَبَاتِ , وَضَعْتُ أَوَّلَهَا الصَّيْدَلَة , فَغَيْرَهَا كُلِّيَةً لَنْ أَدْخُلَ (تُنطَق أدخلا) .



ذَهَبْتُ أَوَّلَ يَوْمٍ مُوْقِناً , بَأَنَ حُلْمِي أَضْحَي وَاقِعَاً , وَأَنَنِي سَأُصْبِحُ صَيْدَلِيَا , مَهِيْبَ الخَطِوِ فِيْ الدُنْيِا ثَرِيَّا ,  فَلَمَّا دَخَلْتُ لِلْمُدَرَجِ بَابَا , عَانَيْتُ فِيْ التَّوِ إِكْتَئَابَا , فَمَا رَأَتْ عَيْنِي مُحَاْل , وَجَالَ فِيْ ذِهْنِيْ سُؤَاْل , أَتِلْكَ كُلِّيَةٌ عِلْمِيْة؟ , أَمْ أَنَّهَا فُصُوْلُ مَحْوٍ لِلأُمِّيَة , كُلُّ الوجُوْهِ تَنْظُرُ فِي اقْتِضَاْبِ , وَقَامَاتُهُمْ لِضِيْقِ الدُرْجِ فِيْ انْتِصَابِ , فَوَقَفْتُ بُرْهَةً مِنَ الزَمَن , أَخْطَأْتُ وَدَفَعْتُ الثَمَن ..!! , قَدْ قَاْلَ لِيْ الدُكْتُوْرُ بِاحْتِقَاْر , اطْلَعْ بَرَه يَاض يَا حُمَاْر , فَدُرْتُ عَلَي عَقِبَيَّ , وَأَطْلَقْتُ لِلْرِيْحِ قَدَمَيَّ , لأَنْفُدَ وَلَوْ بِبَعْضِ جِلْدِي , وَنَحَوَ الكَافِيْتِرْيَا كَانَ قَصْدِي ,
وَمَنْ يَوْمِهَا طَلَّقُتَ ذَا المُدَرَج , وَقَدْ قَارَبْتُ اليَوْمَ لِلْتَخَرُجِ , وَلَمْ أَحُضُرْ وَلا مُحَاضَرَة , وَقَدْ أَسْمَيْتُهَا مُهَاتَرَة .

وَمَرَ العَاْمُ الأَوَّلُ فِيْ عِنَاْدِ , وَكَمْ صَاْدَفْتُ فِيْهِ مِنْ مَوَاْدِ , نَجَحْتُ فِيْهَاْ بِالدُّعَاْءِ , وَذُقْتُ الوَيْلَ مِنْبُؤْسِ العَنَاْءِ , وَجَاْءَ العَاْمُ الثَاْنِي عَلَي عَجَل , وَمِنْهُ القَلْبُ يَخْفُقُ فِيْ وَجَل ,
وَأَرْسَلَ لِيْ عَقْلِي اسْتِغَاْثَة , أَرِحْنِي مِنْ هَمِّ الدِرَاسَة , وَأَضْحَتِ الحَيَاْةُ كَالِهَبابَا , وَطَارَتِ الأَمَانِي كَالذُبَابَا ,  وَجَائَتْ النَتِيْجَة كَالقَضَاْءِ , لِيُعْلَنَ ضَمِّيْ فِيْ كَشْفِ الغَبَاْءِ ,

أَبَعْد كَلِ هَذَا الهَمِّ ..!!

أُدَبْلِرُ ..!! فَيَا وَيْحَ أُمِّي؟


فَكَمْ مِنْ مَاْدَةٍ ذَاْكَرْتُهَا , وَطَوْلَ الليْلِ قَدْ رَاْجَعْتُهَا ,
وَلَمَّا أَشْرَقَ الفَجْرُ وَلاَح , ذَهَبْتُ لِلَجْنَتِي أَرْجُو  النَّجَاْح , وَفِيْهَا جَلَسْتُ طُوَالَ الوَقْتِ أَهْذِي ,
أَهَذَا إِنْجِلِيْزِي يِا وِاْدْ يِا مُرْسِي؟ .

وَمَرَّتِ السُنُوْنُ فِي رَتَاْبَة , أَقَاسِي كَأَنِي وَسْطَ غَاْبَة , فَكَمْ شَرَّحْنَا فَي الفَارَمَا ضَفَادِع , وَكَمْ  رَسَمْنَا مَاكِيْنَاتِ المَصَانِع , وَكَمْ حَرَقْنَا فِي المَعَاْمِلِ مِنْ ثِيَابِ , وَشَاْبَ الشَّعْرُ فِي سِنِّ الشَبَاْبِ , وَعَانَيْنَا المَرَارَةَ فِي المَسَاْئِل , وَكَشَفْنَا الجَوَامِدَ وَالسَّوَائِل ,
وَكَمْ شَرِبْنَا فِي البيبت كُلَّ حِمْضٍ , وَكَابْدَنَا مَعَ الفِئْرَانِ سُوْءَ عَضٍ , وَذُقْنَا فِي البَيْو ذَلَ المَهَانَة , وَتَعِبْنَا أَكْثَرَ مِنْ شيل الحِجَارَة , وَنَطْقْنَا فِي العَقَاقِيرِ اللاتِيْنِي , وَضِعْنَا فِيْ حِفْظِ المَارِيْنِ , وَفَارَقْنَا السِيُوْتِكَال بَعْدَ وَيْلٍ , لِتَلْقَانَا الكِوَالِيْتِي بِكِل غِلٍّ .


فَهَلْ لِيْ مِنَ الكُلِّيَة .. بِوَشْكِ البَيْن* ,

بِحُسْنِ السَيْرِ .. وَحِفْظَاَ لِمِاءِ العَيْن.

وَلَكِنْ
لِمَنْ أَشْكُو وَأَنْعِي سُوْءَ حَالِي
وَمَنْ يُصْغِي ؟
وَهَلْ يُجْدِي سُؤَالِي؟.


-------

(بقــلمي)

*وشك البين : سرعة الفراق

وزي ما قال عمرو بن كلثوم في معلقته

قِفِي نَسْأَلْكِ هَلْ أَحْدَثْتِ صَرْمَاً .. لِوَشْكِ البَيْنِ أَمْ خُنْتِ الأَمِينَا

اقعدوا بعافية