25 مايو، 2009

أكئب ليالي العمر

أكئب ليالي العمر
طبعاً من غير كلام دي ليلة الإمتحان
ودي هتوافق ليلة بكره إن شاء الله
وأنا كتبتها علشان أستدر عطفكم وتدعولي بضمير
حلوة أستدر دي ..!!
إن شاء الله حلوة

.
.
 
::
التجهيزات::
أنا قبل ما أذاكر ليا طقوس
أولاً لازم أروق الأوضة كويس أوي أوي
وامسك الكمبيوتر أفككه مليون حتة
واخد الكي بورد والماوس أديهم لأخويا
وأقله زي أي مدمن عاوز يتعالج

لو جيت بكيتلك واترجيتك علشان تديني الكي بورد والماوس أوعي تطاوعني
وبعدين اقوله في مشهد تراجيدي سينيمائي عبيط
أوعي تضعف قدامي .. أنا عاوز أنجح يا محمد يا أخويا
ياخدهم مني بمنتهي اللامبالاة ويرميهم علي المكتب
وكأنه لم يشعر بمأساتي ولم يدخل في مود المشهد
ويتمتم ببعض كلمات من عينة
سايب السنة كلها وجاي تذاكر ليلة الإمتحان ..
لو نجحت تبقي تعالي توف عل..
قبل أنا ينهي صوت إرتطام الباب بأنفي هذه التمتمة


(كم هو ظريف أخي الصغير محمد)
ملحوظة : اخويا الصغير محمد جسمة أكبر مني مرتين
علشان كده تلاقيه واخد عليه شوية .. شوية صغيرين


وهنا فيه نصيحة لكل شاب وكل فيتاة
إدي الحاجات دي لأخوك أو أختك .. لكن أبوك لا
لأنه ببساطة مش هيديلك الحاجات دي تاني يوم .. ولا ثالث يوم .. 
ولا هتشوفهم تاني أصلاً


::
وقت المذاكرة :: 
انا وزي أي طالب مصري .. مبذاكرش غير لما بتزنق زنقة مهببة
حتي في ثانوية عامة كنت بذاكر من بداية شهر ثلاثة(مارس)
وده طبعاً بالنسبة لطالب عاوز يدخل كلية قمة .. مأساة

لكن في الكلية
الإيديولوجيات اتغيرت كثير
ليلة الإمتحااااااان .. وبس
هتقولولي إزاي؟
هقلكم ده سر من اسراري العسكرية
واللي هينزل إن شاء الله في كتابي القادم
(إزاي تنجح بجيد كمان .. ومتذاكرش غير ليلة الإمتحان)
انتظرووووووووووونا

كمان فشلت جميع محاولات المذاكرة النهارية منذ إنتهاء ثانوية عامة
المذاكرة تبدأ بعد صلاة العشاء ..

::مكان المذاكرة::
لازم أعمل كوباية شاي وزمان كان كاتشينو
(منه لله دمر معدتي)
وبذاكر علي ترابيزة أو علي السفرة
مش علي مكتب .. المكتب ده أحط عليه الكتب بس
وأرتب كل الورق جنبي 
وأحط كل حاجة محتاجها خلال عشر ساعات مثلاً في المتناول ..
قال يعني علشان مقومش .. هع هع هع هع


أهم حاجة الكرسي
لازم يبقي مريييييييح جداً ..
وأزنقه جامد في الترابيزة بحيث إن ظهري يكون مفرود
مش كفاية معدتي .. كمان ظهري هيبوظ


::البداية::
أسمي الله وأدعي شوية
وأمسك القلم
وأكتب علي الورق حاجة من إثنين
يا إما
هنجح غصبن عن التخين يا ولاد التييييييت
المنهج كله هيخلص دلوقت بعون الله

يعني شوية كلام حماسي من ده
أو الطريقة التانية (برضه مجربة)
أكتب
أنا خلاص ميهمنيش إني أشيل المادة
انا هذاكرها فور فن بس


ودي بتخليك تذاكر بأعصاب هادية
أهم حاجة إنك تشتغل نفسك ..!!

وأقسم المنهج
وابدأ بسم الله


طبعاً الناس كلها هتقول إني رزين وهادي وبحب أذاكر وأنا قاعد ومستقر
كل القواعد دي بتنتهي في خلال ساعة علي أقصي تقدير
لأني ببدأ أتحول
لذا منصحش اي حد يقعد جنبي وانا بذاكر
لأني بكلم نفسي كثير .. وبزعق .. 
واقعد أؤلف أغاني تفكرني بالمنهج
وبقوم أتنطط .. وأجري .

وأدخل أصحي أخويا أقله اسمع الحتة دي مهمة أوي ... 
هتيجي بكرة في الإمتحان إن شاء الله
واشرحله حتة في المنهج


طبعاً ليلة الإمتحان كله بيبقي مأمن نفسه مني
وحاطط عصاية جنبه وهو نايم
وأول ما أقرب .. طااااااخ

(والله أنا مسكين ... بيضربوني جامد)

وبعدين أذاكر وأنا واقف .. وبعدين أقعد علي الأرض
وبعدين اتمشي وأمسك الورق


أفضل كده لحد صلاة الفجر
أنزل أصلي في اي مسجد من مساجد رجال الأعمال
المسماة بمساجد الإكسبريس

وأرررررررررررجع بسررررررررررررعة علي المذاكرة
بس لازم كوباية شاي تانية
لأن الأولي بتكون فقدت تأثيرها
وأقعد أذاكر .. بس بيبقي بتركيز أكبر
وبكون تعبت من التنطيط والجري .. وبقعد مش بتحرك

أهم سمات المرحلة دي ... الحماااااااااام
باختصار .. بكون مزنوق أوي (في المذاكرة يعني يا خفيف) 
وطبعاً من القلق الجهاز الهضمي كله بيتلخبظ
فلما بحب أدخل الحمام باخد الورق معايا .. 
نياهاهاهاهاهاهاهاهاهاها

وقبل الإمتحان بساعة ونص
برمي كل الورق من إيدي
وأدخل أخد دش .. 
واشغل حاجة علي الجهاز وأعلي علي الأخر
واروق دماغي ..
وأقنع نفسي إني عملت اللي عليا .. وزيادة


وأروح الإمتحان ..
وبرفض فكرة المراجعة لحد باب اللجنة نهائياً
بحس إنها بتنسيني المعلومات

لازم أوقف مذاكرة قبل الإمتحان بساعتين مثلاً

وبس كده

أه نسيت أقلكم
أنا أول طالب في الدفعة بيطلع من اللجنة
أجعص إمتحان مياخدش معايا ساعة زمن


تحذير أخير
Don't Try IT

أنا بخلص ذمتي علشان محدش يقولي إنت سقطتني

شكلي كده هحسد نفسي ومش هعرف أحل في الأبلايد
دي تبقي مصيبة
دعواتكم معانا بقي
مش هوصيكم تاني
----------------
تهنئة حارة ل
مصطفي ريان
صاحب مدونة
علي صدور كتابه الأول

هناك 49 تعليقًا:

beautiful mind يقول...
أزال المؤلف هذا التعليق.
هذه حياتي يقول...

السلام عليكم ورحمة الله وبركاته


د يااااااااااااسر


ربنا معاك

من نام واستراح أتاه النجاح


ربنا ييسرلك الخير يارب ويذلل لك كل عسير

خالص مودتي وصادق دعائي

تامر علي يقول...

أضحك الله سنك يا د/ياسر ... والله أضحكتني :)

تصدق في تشابه كبير بين طقوسك وطقوسي لحد كبير فأنا لازم فعلاً أروق المكان كويس جداً .... وبعدين أنظم الورق ... وأعمل خطة المذاكرة ... وبعدين أكون تعبت فاقول لنفسي أنان شوية وأقوم أقطع الكتب تقطيع ... وهي دي نهاية فرقة بديعة مصابني:)

تحياتي وأطيب تمانياتي بالنجاح والتوفيق

Adam يقول...

د ياسر كيف حالك مدونتي تشتاق الي تعليقاتك جدا

موضوعك اليوم جميل اوي اد ايه حسيت انك بتتكلم عليا انا بعمل كل اللي بتعملوا وكمان بخرج من اللجنه اول واحد وده طبعا مش شطاره انا بس حليت اللي اعرفوا

تحياتي مع خالص دعواتي

ادم

beautiful mind يقول...

ههههههههههههه ربنا معاك يا دكتور والله فكرتني بايام المذاكره والامتحانات ووجع البطن الحمد لله ربنا لا يعودها ايام
اهم حاجه ادخل اي امتحان وانت ضاربه ستين جازمه والله هتلاقي نفسك شغال تمام دي نصيحة واحد مجرب

أحمد سعيد بسيوني يقول...

انت عارف لو كنت ذاكرت في الوقت اللي كتبت فيه البوست ده

كنت جبت امتياز

يالله قوم ذاكر يا طالب وماتكملش قراية التعليق

انت لسه بتقرا

قوم يالله

بقلم
احمد سعيد
اللي لسه قدامه خمسة اشهر على الامتحانات
نياهاهاهاهاهاهاهاهاهاها

beautiful mind يقول...

انا ضفت مدونتك عندي يا دكتور ياسر يارب تقبل الاضافه وانا متشرف جدا بحضرتك

بنجاواتى يقول...

ربنا معاك يا دكتور

بس مفيش مانع لو تجرب تراجع لحد باب اللجنة

لا لا قصدى لحد ما تقعد فى مكانك

لا لا قصدى بعد ما تاخد ورقة الاجابة

لا لا بعد ما تاخد ورقة الاسئلة كمان

نصيحة :dont try it

سلام وبالتوفيق يا رب

Nour يقول...

السلام عليكم..

ربنا يوفقك يا دكتور ويسر لك كل عسير.. ويكون امتحانات يسيره عليك بغض النظر عن المذاكرة الرهيبه !!

بالتوفيق والنجاح.. دمت بخير

تلميذة سلمان الفارسى يقول...

إزاي تنجح بجيد كمان .. ومتذاكرش غير ليلة الإمتحان)
ازاااااااااى؟؟؟
فى صيدله بس الكتاب اللى هتنزله ده على فكره
ربنا يعينك وينجحك

MaNoOoSh يقول...

ههههههههههههههههههههه
بتعمل كل حاجة فى الطقوس وتنسى المذاكرة بسسسسسسس
هههههههههههه


ربنا معاك ان شاء الله ويوفقك بتقدير امتياز كمان

المعتصم يقول...

بسم الله الرحمن الرحيم
وزير صحتنا الهمام
السلام عليكم ورحمة الله وبركاته
ضحكتنى بجد يادكترة
بس انا عاوز اعرف ايه العلاقه الوطيده بين الترتيب والترويق والمذاكرة
لان اى حد بيحاول يذاكر لازم يقعد يروق الدنيا من حواليه ييجى اربع ساعات كده على الاقل
ههههههههههههههههههه
فكرتنى بايام زى الفل
المهم
تركز كويس وتنام كويس
وان شاء الله ربنا هيكرمك ويوفقك وينجحك
تحياتى ودمت بكل خير وود
والسلام عليكم ورحمة الله وبركاته

لقد خلقنا الله احرارا يقول...

وجعت قلبى والله
لانى عندى امتحانات كمان شهر فى 8 مواد ولسه مافتحتش كتاب
بس انا قبل الامتحان بفترة بحط خطط ايه---حكايه لو اتنفذت اخلى زويل ده يسرح بمناديل فى الاشارات مع انى ادبى
وكانت اعصابى هاديه حقيقى لغايه سنه تالته فى الجامعة وبعدها اجارك الله على القلق والتوتر والبكاء
لكن برده ماينفعش اذاكر وافهم غير لما اتزنق اوى
هيييييييييه دنيا فكرتنى بالذى مضى
ربنا يوفقك ونسمع عنك كل خير

بنت أبيها يقول...

:D

انما شكلك كده بتكون عامل حسابك ومعاك نسخة احتياطية من الكي بورد والماوس

عشان بتشغل حاجة قبل ما تروح الامتحان ع الجهاز

وشاي ايه ده الى ليلة الامتحان

هوه بيكون ليه اي تاثير اصلا

:)

ستيته حسب الله الحمش يقول...

ههههههههههههههههههههههههههههه
طقوس البشر كلها واحدة
في سرك
خالتك ليها سرين مهمين

أولهما اني كنت كده بس بما اني كنت بنت روشة فمش بعمل كده بس
لأ بقوم احط مكياج وبرفان واغني بصوت "جعوري" لحد ما اتهد واقعد
ثم اقوم عند صلاة الفجر اعمل شعرية بالسمن والسكر اضربها واروح بقى ع الامتحان ولا بنتهدد ياباشا

ثاني سر
لو دفعوا لي فلوس محترمة علشان امتحن المواد اللي انا شخصيا بدرسها تاني .. اقسم بالله ما ارضى
ههههههههههههههههههههههههههه

اللي نجحنا زمان ييسر لك النهاردة

بس محمد ده عسل وحلوة حكاية مساجد الإكسبريس
وارسى يا عزيزي في اللجنة وبلاش المركز الأول في الخروج ربنا يسترك

معلش معلش استحمل بدل ساعة ساعة وتلت فقط لا غير

ربنا يجبر بخاطرك يا ياسر ويكرمك بتخرج يكون جميل جمال ان شا الله حتى يكون له مثال

بدعي بضمير متخافش بس ذااااااااااااااااااااااااكر

موناليزا يقول...

ياااه فكرتنى باللذى مضى:)
ربنا معاك وينجحك يارب بتقدير محترم كمان

حنعيش يعنى حنعيش يقول...

اقولك على طريقة مجربة ...اتفرجى او اسمعى اى حاجة كوميدى قبل ماتروحى الامتحان ...واوعى تفتحى ورقة اول ماتوصلى الكلية ...خديها ضحك وهزار ...وشوفى النتيجة والله حتبقى فلة

أبو العريف يقول...

السلام عليكم
ازيك يا دكتور
انا اولا بدعيلك بضمير ان ربنا يوفقك
وتعمل تقدير جامد قوي

ثانيا بقولك
ايه دا يا راجل انا كنت افكر ان الناس اللي مش بيزاكروا غير قبل الامتحانات دول الفشله امثالي
مش الداكاتره امثالك
اما عن الطقوس الخاصه بيك
صدقني تهلك من الضحك
بس كل واحد فينا ليه طقوس
برضو غريبه
زيي انا كنت بشغل التلافزيون
وما اهتمش بيه خالص وانفضله واقعد ازاكر
ال ايه عشان اقيس تركيزي
طالما منفض للتلافزيون ابقي مركز

مره تانيه ربنا يوفقك

حياتى نغم يقول...

السلام عليكم / وصايا مفيدة لا فعلاً طريقة جيدة للمذاكرة بس تكون أفضل لو قبل الإمتحان بفترة ، بالتوفيق ربنا ييسر لك أمورك .
لا تنسى دعاء الخروج من المنزل ودعاء دخول اللجنه واستلام الورقه والنسيان والخطأ وبالنجاح إن شاء الله .

ايوشة يقول...

ياااااه فكرتنى بالذى ماضى نفس السيناريو معاد الحمام طبعا ههههههه
بس انا كنت كلية نظرية يعنى مش بتفرق معايا بقول هدخل الف وان شاء هعدى انا مفيش ورقة تقف فى وشى
بس 2 شاى بس انت لسه مبتدئ جديد فى المذاكرة فى يوم الامتحان جديد شكلك مش اقل من عشر كوبايات ده مبرر تتهرب بيه من المذاكرة
ربنا معاك ويوفقك يارب بس فكرة حلوة موضوع تفكيك جهاز الكمبيوتر :)

صمت المشاعر يقول...

ايدك علي الكتب اللي هتنزله دا ينوبك ثواب فيا

لاني مبذاكرش غير قبل الامتحان بردوه بس بجيب مقبول

هنق عليك اما نشوف هتجيب تقدير ايه السنه دي

وبعدين لازم تقول جيد انت عارف في ناس عنيها وحشه ههههه


ربنا يوفقك ويوفق الجميع في الامتحانات

اللؤلؤة يقول...

د/ ياسر عمر
السلام عليكم
أضحكتنى كثيراً أنا كنت فاكر إن طلبة الصيدلة والطب لا يملون من المذاكرة .
ربنا معاك
أسأل الله لك أن ينور لك بصيرتك وأن يجعل لك الصعب سهلا
آمين

الشعب لابد له من حكومه تشكمه يقول...

بالتوفيق ان شاء الله وبعدين على فكره لعلمك يعنى كل بتوع كليات القمه كده ,الناس بس هم اللى مخدوعين فينا على اعتبار يعنى انى خريجه كليه قمه زى مبيقولوا...
وكنت بعمل نفس طقوسك بالظبط مع الفارق انى كنت مغتربه ومينفعش اذاكر بصوت فى الاوضه فكنت بذاكر على السلم ههههههه وهى ساعه بالظبط...واكون ظبطت الامور ومعنديش اختراع مراجعه نهائيه ولا اصحى بدرى اراجع...نوووو انا على لجنه الامتحان عدل وارمى الكلمتين ونص ساعه وتلاقينى بره..وتلاقى نظرات الحقد من كل زمايلى انى خلصت بدرى هههه وعلى فكره بجيب تقدير كمان..استمر استمر لا تقلق دى طريقه مجربه ومضمونه

ghorBty يقول...

السلام عليكم

ربنا يوفقك ان شاء الله ويسدد خطاك وجميع الطلبه

مادام بتذاكر علي السفره يبقي خير اسال مجرب وابشرك كمان التقدير العام جيد جدا اسمها لوحده بتفتح النفس علي المذاكره

ضــى القمــر يقول...

ياسيدى على الطرق الرائعه .. بجد انصح الجميع انهم يجربوا طريقتك :)
خاصه لو هنفرط فى الكيبورد والماوس .. يبقى يقابلنى لو شافهم تانى .. ههههههه

الله يعينك يارب ويقويك يا د/ ياسر
وان شاء الله نسمع اخبار كويسه عن النتيجه .. وتحميلنا هناا وقعها عليك ان شاء الله :)

بوست رووووووووعه والله :)
اجمل ما فيه انه اتكتب بأسلوب خطير بجد :)

والف مليون مبروك لمصطفى .. هو بالفعل انسان يستاهل كل خير
اجمل تحيه لك

Soul.o0o.Whisper يقول...

السلام عليكم و رحمة الله و بركاته

هههههههههههههههههههه
والله ميته على نفسى من الضحك
مش قادرة أمسك نفسى نهائيا

لالالالا
مش بأضحك عليك

أصلك فكرتنى بنفسى
تقريبا نفس الشئ

و القصص و الاغانى و التنطيط
ههههههههههههه
اه والله
و بردوا بيكونوا مأمنين نفسهم
بس مش بالعصاية

هما بيدخلوا اوضهم و يقفلوا عليهم
و يسيبونى أكلم نفسى
هههههههههههه

بس دا من أول الامتحانات ما تبدا
لحد آخر يوم
مش ليلة الامتحان بس

بس عاوزة أقولك
الامل فى ربنا كبير ان شاء الله




لا تقلق

و كل ابلاااااااااااااايد و انت طيب

مصري جدا يقول...

بالنجاح والاتفوق أن شاء اللة

فكرة من الزمن ده يقول...

يارب ينجحك ان شاء
والوصفة سهلة لكن مش هننفذها

شمس النهار يقول...

تصدق ونعمه المذاكر:)

دعني اقول لحضرتك ان دي الحرب العالميه الخامسه

اي والله

وانا لو من اهل البيت اسيب لك البيت مطربق علي اوراقك واهرب


وبعدين هندعي لك من غير ماتصعب علينا والاحاجه

الهي وانت جاهي قادر ياكريم
يا دكتور ياسر عمر ياحفيد عبدالفتاح
تنجح وبتفوق وترجع المدونه وانت
والهي مايضيعلك ماوس والا كي بورد

أم مالك يقول...

والله يابنى بندعى بضمير وقلب وبكل الجوارح
ان ييسر لك الامر انت وكل اللى زيك
ويكتب لكم النجاح
والله ضحكتنى ونادت احمد ابنى يقرأ البوست
اصله من حزب المذاكرة ليلة الامتحان
وياريت ليلة الامتحان من اولها
حتى وهو فى الثانوية العامة مفيش حاجة بتغير النظام
المصيبة انك بتجد نجاج وبتقدير
مش مصسية ولا حاجة ربنا يصلح احوالكم
البوست ده يؤكد ان الشاب الملتزم
مش متزمت ولاحاجة لا روش برضه اهو
دعواتى

فارس عبدالفتاح يقول...

الموضوع ظريف بس للاسف مقرأتوش كله هارجع تاني واقراه كله ان شاء الله لان الان لدي بعض الاعمال الهامة

سلام عليكم

ن يقول...

السلام عليكم
د / ياسر
والله يا ابنى أنا ضحكت كتير من البوست ده .
بس على فكرة دا تمرد العباقرة على الوقت وكأن عقلك عاوز يقول سبونى أفكر وأستوعب برحتى .
ربنا ينجحك ..
دائما مبدع ومتألق
مع خالص تحياتى

سارة احمد يقول...

د\ياسر تصدق ان انا كمان كنت من الناس الي بتذاكر ليلة الامتحان بنفس الطريقة والاسلوب وكنت بنجح صافي كل سنة وتخرجت من كلية الحقوق...ومعرفش لحد النهاردة ليه الناس كانوا بيقولوا عليها صعبة!...ربنا معاك ويوفقك وتنجح علي خير وتجيب اعلي التقديرات:))))بصرة يادكتور

MǿиY El-Shreef يقول...

هههههههههههههههه

اول مره اضحك عندك كده

ماتجرب العاميه دي حلوه عليك :D

لا رجعتك شباب تاني هههههههههههههههه

والله يابني انت هتجيب لنفسك العين بالكلمتين الي قلتهم ف الاخر

ربنا يحفظ

مستنيين حكايه جيد دي ماشي :D

ايومي يقول...

ربنا يوفقك يادكتور,
وان شاء الله تخلص على خير.

مذكرات مشاغب يقول...

ههههههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههه
هههههههههههههههههههههههههههههههههههههههه
هههههههههههههههههههههههه
هههههههههههههههههه

رهيبه جداااااااااااااااااااااااااااااااا يا د.ياسر والله
انا فطست من الضحك
حاجات كتييييييييييير من اللي انت قولتها دي انا بعملها
بقعد اختي الصغيره قدامي(خامسه ابتدائي) واقعد اسمعلها حاجات هي اصلا مش فاهماها بالعافيه
وبخليها تسمعه كمان
ولما مبتعرفش بضربها(بفش غلي والسلام)

بجد بوست كوميدي رهييييييييييييييييييييييب جدا
وفي انتظار كتابك في الاسواق
تحياتي

أحمـــــــــــــد أبو العلا يقول...

دكتور ياسر الجميل
ربنا معاك ياجميل ان شاء الله

مش عارف اقولك ايه يعني, طب ماكان من الأول ولا ازم يعني نتزنأ
ههههههههه

ان شاء الله ياعسل تعدي على خير

ومعلش انت عارف ان علاج الادمان صعب شويه
هههههههههه

مجرد مدونة يقول...

والله عسل يا ابو اليسر ربنا يكرمك يا باشا ويوفقك كده وتطلع دكتور مدون قد الدنيا إن شاء الله وينزل كتاب حلو كده ان شاء الله :))

ستيته حسب الله الحمش يقول...

جاية امسي
وحتى لو مدخلتش وكنت فرطت في أعز ما تملك "الكيبورد والماوس" برضه انا بدعي لك من مصاميص قلبي
شد حيلك
ولو كنت لسه قدام الكمبيوتر قووووووووووووووم
وصلي على النبي يالا شد حيلك

كل اللي له دين او ملوش دين لقى له هدف ووصل وعدى
واحنا فين بقى
ولا ملتزمين شكلا؟
يالا انا بشعللك

تحياتي

Mo7ammed يقول...

"وبرفض فكرة المراجعة لحد باب اللجنة نهائياً
بحس إنها بتنسيني المعلومات
"

انت بتتكلم بلسانى وربنا
طب تصدق
انا كنت كمان يومين هكتب بوست شبه ده
ااما ينزل هحجزلك اول تعليق ياعم

مدونة زى العسل
اول مرة ادخلها
تسلم يادوك

د/عرفه يقول...

لكل منا تقاليده
يا دكترة

انا برضه معدتى باظت من الشاى

بس بجد
طقوسك عجيبة

ومش هقولك انا بعمل ايه دى سر
ههههههههههههههههه
وربنا يوفقك

د.على خميس يقول...

السلام عليكم و رحمة الله و بركاته
أضحك الله سنك يا دكترة
و الله عسل
ربنا يوفقك
مستنيين الكتاب ...اه صحيح ده انا اتخرجت خلاص ..
خلاص ..مش مستنين الكتاب

واشغل حاجة علي الجهاز وأعلي علي الأخر
واروق دماغي ..

جهاز ايه ؟؟؟؟
انت شكلك بتشتغلنا ...انت مش لسه مديه لمحمد اللى أصغر منك و ادك مرتين من شوية ...
هتقولى لأ ده انا قصدى جهاز الكاسيت ...
العب غيرها
هههههه


أسأل الله العظيم رب العرش العظيم أن ييسر عليك كل عسير و أن تنجح يا ياسر يا ابن عمو عمر يا رب

تقبل تحياتى

ست البنات يقول...

جامدة جداااااااااا
ربنا ينجحك وينجح كل طالب

همسة يقول...

ههههههههههههه
بسم الله ماشاء الله تقنيات رائعة دا حتى حضرتك كدا ممكن تنجح بإمتياز.بس انا أحجز اول نسخة من كتاب (إزاى تنجح بجيد كمان ومتذاكرش غير ليلة الامتحان)
بالتوفيق ان شاء الله

hager za3bal يقول...

هههههههههههههههه

والله انت زي العسل
البوست دمه خفيف اوي جني من مود الامتحانات اللي انا فيه

بس حاسب علي نفسك من محمد لاحسن ياخد عليك اكتر من كدا
نيهاهاهاهاها

امممم
بص بقي
انا همشي علي نصايحك وهستني اجيب جيد
بس عارف لو مجبتهاش
هخلي الومضات دي ضلمات

هههههههههههههه

ربنا معاك ويوفقك يارب
ومعانا كلنا

تحياتي

don don يقول...

السلام عليكم


هههههههههههههههههههههه بج بوست يموت من الضحك

ربنا يوفقك يارب امين
بس بتوع الكليات العملية يعملوا ايه لازم تطلع عينهم طول السنة عملى وبرضة نلاقينا مزنوقين ومخلصناش المشاريع
قولنا كدة على وصفة يمــــــــــــــــكن تنجح

بـسـمـــة صـــــلاح يقول...

ههههههههههههههههههههههههههههههههههههههههههه
لا لا لا انا مش قادرة امسك نفسي من الدحك
بجد لذيذه طريقتك بالعاميه
عامل زيي لازم ارتب الدنيا حواليا
بس مش بشرب شاي
دا انا بشرب بلاوي انا بردو كنت هكتب بوست عن الامتحانات بس مش عارفه اكتبه امتى اصل امتحاناتي لسا فاضل عليها 3 اسابيع وربنا يستر

بس نصيحه من اختك اتوكل على ربنا
وزي ما المثل بيقول:

تأتي الامتحانات بما لا تحتوي الكتب..
ههههههههههه
شد حيلك يا دكتور وارفع راسنا
عشان لما يبقى عندك صيدليه هاجي اخد منك ببلاش
ربنا معاك ويوفقك وييسرلك كل عسير
ومتنساش دايما الاذكار والادعيه قبل الامتحان

تقبل مروري ورغيي الكتير

أم مالك يقول...

الابن الدكتور ياسر
موفق باذن الله
ربنا ييسر لك امرك ويسهل عليك كل عسير
والله لك وحشة يادكتور
بس برضه معلش اوعى ترجع الماوس والكيبورد من محمد
واجمد واوعى تضعف
والله المستعان
دعواتى

د. ياسر عمر عبد الفتاح يقول...

الحمد لله إ، طقوسي عجبتكم
بلاش تجربوها علشان شكلها أصلاً مبقتش بتجيب نتيجة معايا أنا ضخياً

معلش مش كان نفسي أرد عليكم واحد واحد دلوقت
لكن بجد راجع تعبان جداً من الإمتحان
ربنا يكرمكم علي كل الدعاء ده
ده أنا أهلي مدعوليش كده ..!!

ربنا يبارك فيكم
ونردهالكم في أقرب لجنة إن شاء الله