11 مايو، 2009

أنفلونزا الصراصير بشقلوبستان

دي حلقة جديدة من شقلوبسان بعنوان
أنفلونزا الصراصير
.
(نزلت هنا ومش علي مجلة رؤية زي كل مرة لأنها اتكتب متأخر أوي بسبب ظروف الإمتحانات)
.
.
يجلس مذيع النشرة الشقلوبانية ليتلوا أخر الأخبار ,
بينما ترتسم علي وجهه علامات قلق واضحة علي غير العادة ,
وقال بصوت أشبه بالهمس لينقل مع ذبذبات صوته الضعيف الرعب والقلق لكل مشاهدي النشرة


تزايدة نبرة التحذيرات العالمية من إنتشار مرض أنف .. أأأ .. ايهههه

ثم ينقطع صوته ليحاول جدلاً إبتلاع خصة وهمية في حلقه الجاف
مرض أنفلونزا الصراصير , وتواردت أنباء من جميع
بقاع العالم تؤكد تحول المرض إلي وباء فتاك ,

كما أعلنت أغلب دول العالم حالة الطوارىء القصوي ,

بينما أبيد شعب الفكسيك بأكمله ليحل بدلاً منه شعب من الصراصير بزعامة

(صي صيرصارا)
والمعرف بتوجهاته اليسارية الشيوعية .


وعلي صعيدٍ أخر يقام الأن مؤتمر صحفي للدكتور (خميس بعافية) وزير الصحة الشقلوباني


وستننتنتنضموا للمؤتمر الأن عبر كاميراتنا الحديثة  ... أوي
 

دي أحسن من بتاعة المويال زوكيا إف 95 علي فكرة


وفي المؤتمر


يدخل الدكتور خميس ممسكاً بمنديل ويضعه علي أنفه ,

ويقف أمام المنصة مخاطباً الشعب الشقلوباني بثقةٍ كبيرة من أجل
إعلان أخر تطورات المرض بشقلوبستان وكل الشعب ينصت له:


تك تك تك

واحد اتنين ثلاثة .. صلي
تك تك تك ... سامع ياللي ورا

هووووووووم


ينادي أحد مهندسي الصوت بالقاعة : المايك شغال يا باشا وزي الفل

قول إنت علي طول الكلمتين بتوعك , سمعنا جمال رنين أحبالك الصوتة.

(ثم يتمتم : ذلك الوغد أتو به من محل حلاقة حيث كان يعمل (مطاهراً) ليكون وزيراً للصحة) 



هنا يستكمل الوزير خطابه مرةً أخري

أيها السادة ,

أعلن بمليء في أن شقلوبستان خالية تماماً من مرض أنفلونزا الصراصير

وكل هذا بفضل جهود السيد (هاتشووووووو) الرئي (كح كح كح) الرئيس
ونحن لم نألوا جه

(أوووووووووع ..)

(ناوله أحد المساعدين كيس بلاستيك ليفرغ محتويات بطنه فيه) ,

ثم أكمل

أه أه (تلهث أنفاسه)

لم نألوا جهداً من أجل المحافظة علي صحة المواطنين ,
ونهيب بهم عدم الإنسياق وراء الشائعات التي انتشرت حول وجود حالات مرضية ف

(خخخخخ .. تفوووو)

في بلدنا الحبيب .


يقوم أحد الصحفيين

ممكن سيادتك تقولنا أعراض المرض

يرد السيد الوزير قائلاً

مثل أعناض أي منض أمفنونزا
يعني كحة وانتفاع دنجة الحنانة وإجهاد ووجع المفاصن (أه يا ركبتي ياني) وغثيان (تنجيع يعني)
بالإضافة إلي نمو قرني استشعار أعلي الرأس

(يمد يده ليتأكد من ثبات الباروكة)
ثم يصيح
شقلوبستان بخير يا جماعة
مفيش حاجة تستد ... تس


يضع يده علي جبهته ثم يترنح قبل أن يسقط دفعةً واحدة علي الأرض ميتاً
بينما يخرج من جيب قميصه صوريصار ليهرع الجميع في رعب شديد خارج القاعة

ويجري خلفهم هذا الصوريصار الجبار في شجاعةٍ نادرة.

 
ينقطع الإرسال علي الفور ليعودوا إلي الإستوديوا مرةً أخري

 
ويبدوا أن المذيع لم يكن علي استعداد كامل حيث أظهرت الكاميرات نزول مادة مخاطية من أنفه
بينما يبحث هو عبثاً البحث عن منديل (نضيف) فلم يجد ,

التفت يميناً ويساراً وفي خلسة رفع يده ومد كمه ليمسح أنفه ويزيل المخاط ,

وترتسم بعدها علي وجهه ابتسامة راحة بلهاء وكأنه يقول

(هه .. محدش شافني).


إنت بتعمل إيه يخرب عقلك إحنا علي الهواء ..
المؤتمر الصحفي خلص من بدري

كان هذا صوت المخرج من سماعة الموبايل الصيني المعلقة بشريط لحام أزرق(لون الجاكيت) في أذنه.

ينتبه المذيع

إحم إحم
أأأأأ .. إنننن الللل اييييه
ووو بب
إحم

وبهذا أثبت السيد الوزير بما لا يدع مجالاً للشك أن شقلوبستان بلد الأمن والأمان ,
وانها خالية تماماً من الأمراض والأوب ..

يشعر بشيئٍ يمشي علي كتفه يمد يده إليه ليجده صوريصار أخر من جناح المارينز
نظر إليه نظرةً سادية متوحشة ثم ضحك ضحكات شريرة متقطعة

قبل أن (يزفره) عطسة محملة برذاذ كيماوي فتاك لترديه قتيلاً في الحال.

وفي قرية (أبو قرصار) بأبر شقلوبستان يدخل وهدان علي أبيه بعد أن انتهت النشرة

 

يابا يابا يابا المادرسة كولاتها بتجول إن الإنفلوزة بتاعة الصراصير ملت البلد
وإننا لازمن وحتمن ولا بود نلبس فلاين حمالات جوتونيل يابا علي وشونشنا
علشان منموتش


فينتبه جعيدي أبو وهدان من (أصعته) علي المصطبة ليلزقه كف علي (جفاه)


 هيه دي أخرة تربيتي فيك يابن الفرطوس ..

عاوز تلبس فالنة حمالات وجوتونيل كمان
ياداهية دجي


أيتها السماء فلتومسكي بصواعقكي ..

ده عيل صوغيرومش فاهم حاجة (بتعطيش الجيم)
وبعدين بقي إنت يا وله هتفهم أكثر من الحاكومة والتلافزيون.

أجري يا وله نادي لامك تعميلنا لجمة ناكلها
إجري كتك خابط في نفوخك 

وعلي أرض الفكسيك بأنتيكا الجنوبية , معقل الثورات وأرض المغامرة ,


يقف (صي صيرصارا) ليحي الجماهير العريضة

عقب إنتصارهم المدوي وجلوسه علي سدة الحكم

ليلقي خطبةً حماسية تلهبت حماسة ملايين الجماهير الصرصورية الملتفة
حول زعيمهم القائد والرفيق والمناضل:


إننا اليوم نجني ثمرة كفاح ونضال أجيال من الصراصير علي مر العصور,

إن نصرنا هو في الحقيقة نصر لفكر كل قادتنا ومفكرينا الأوائل أمثال
(كارص صاركس) , (وصرصاديمير لينين) , ( صاو تصي يونج) ,
فلتباركهم السماء ,
وإننا أبداً لن نكون بعد اليوم مداساً لكل شوز باتا معفن ,
أبداً لن ننحني مرةً أخري تحت وطأة القهر الإنساني الحقير,
وأقولها اليوم عاليةً مجلجلةً لكل صرصورٍ فكسيسي ولكل صرصورٍ أنتيكي


أرفع رأسك يا أخي فقد مضي عهد البلاعات


وأوجه رسالةً لكل صوريصار مستضعف في العالم :

إنني لأشعر بكل لدعة شبشب تنزل علي قفاك ,

وحيثما كانت الثورات الصراصيرية البروليتارية ضد البرجوازية البشرية فذاك موطني.

وعلشان متضعش الحلقة من غير ما نستفيد حاجة
نطلع من كله ده بإيه
إن فيه فجوة كبيرة بين كلام المسؤلين وأرض الواقع(ده طبعاً في شقلوبستان)

وإننا لازم ولو لمرة واحدة في حياتنا ناخد فعل
وبلاش كل مرة يبقي رد فعل
مرض بينتشر في العالم كله ..
لازم ناخد كل إحتياطاتنا منه
مش نستني لما يجي وبعدين ندور علي طرق العلاج

وده لازم يبقي علي المستوي العام وكمان علي المستوي الشخصي

زي نظافة حضرتك الشخصية
(زي والعياذ بالله الحموم كده)

وإهتمامك بصحتك وصحة كل الناس اللي حواليك.

وبلاش افتكاسات في العلاج وفتاوي طبية لكل من هب ودب.

واقعدوا بعافية.


الحلقة فكرة المدونة

بسمة صلاح

وأي حد عنده فكرة لحلقة جديدة يكتبها هنا

أو علي الميل الرسمي للدولة

shaklobstan@hotmail.com

هناك 71 تعليقًا:

ستيته حسب الله الحمش يقول...

اولا اكتب عنوان الحلقة ع البوست

ثانيا هيه دي أخرة تربيتي فيك يابن الفرطوس ..

عاوز تلبس فالنة حمالات وجوتونيل كمان
ياداهية دجي

ثالثا انا بضحك متواصل وربنا يعزك

رابعا عملت ميل رسمي للدولة يا داهية دجي
هههههههههههههههههههههههه

ربنا يكرمك يا دكتور ياسر يا نفوخ

تحياتي

ست البنات يقول...

ههههههههههه
فطست ضحك
بس بلاش المخاط والقرف ده رغم ان كل شيء وارد

ربنا يعزك
ويوفقك

ايوشة يقول...

هههههههههه بصراحة اجمل حلقة تحفة بجد ودمها خفيف جدا وبصراحة كلها عجبتنى ومش هقدر اكمل بئا كوبى لبعض الجمل لانها كلها عجبتنى
تسلم ايديك ودماغك بجد

رؤية يقول...

يا خبر
دى بقيت جمهورية الصراصير المتحدة

^_^

على الرغم من ان حركة المذيع دمها خفيف لكن بينى وبينك انا كنت باشرب نسكايه وقتها
تفتكر احساسى اييييييه وقتها؟!!!

تحياتى

ريمان يقول...

هههههههههههههههههههههه


ههههههههههههههههه


ايه ده

كمان الصراصير جاتلها انفلونزا

هههههههههه

ربنا يستر ع الباقى يا رب

اسلوبك حلو اوى

تحياتى يا دكتور

Soul.o0o.Whisper يقول...

السلام عليكم و رحمة الله و بركاته

هو رغم خلو شقلوبستان من الانفلونزا
تماما تماما و الدليل وزير الصحة المحترم

إلا بردوا كان دايما الدكتور يقولنا
درهم وقاية خير من قنطار علاج

و بلاش قر يا دكتور
و هتعدى سنتين و زيادة و هتلاقى نفسك لسه بتكتب بردوا إن شاء الله
بلاش حقد الانسان على اخيه الانسان دا :)


دمت بود

بـسـمـــة صـــــلاح يقول...

رووووووووووووووووووووووعه الحلقة يادكتور ياسر
تجنن بجد
ماشاء الله تبارك الله انا أول ماجتلي الفكرة جه في بالي حضرتك على طول لإني متاكده انك هتعملها جميله
بجد دمها شربات وكنت هموت على نفسي من الضحك
والأساميي اللي حضرتك ابدعت فيها..كارص صاركس) , (وصرصاديمير لينين) , ( صاو تصي يونج)

ولا الجزء بتاع ابو قرصار
والله يادكتور تستاهل تحية جامده أوي
ربنا يباركلك في موهبتك
ويعينك وييسرلك امتحاناتك
وتفرحنا بنتيجتك
ربنا معاك
وسوري ان كنت بتأخر على حضرتك بس والله المزاكرة
وربنا يعين ونجيب نسبه ومجموع يرفعوا الراس
دعواتك

تقبل مروري

دمت بكل ود
تحيـــ بسومةــاتي(:

بـسـمـــة صـــــلاح يقول...

بما ان البوستين اللي فاتوا ضاعوا عليا فأنا قراتهم
وبجد احنا منقدرش نستغنى عن حضرتك وعن قلمك

بجد موضوع رائع ومهم جدا وعرضته بشكل جميل وحتى ولو كان عالسريع

اما ترانيم البوح فدي بقى معجزة جميلة فعلا
بجد حاسه الكلام مش ممكن يوفيك حقك

تبارك الله

دمت كما تحب أخي
تقبل مروري

لقد خلقنا الله احرارا يقول...

روعة حقيقى
ويمكن تكون دى فرصة اعبر فيها عن اعجابى بموهبة حضرتك الادبية
يمكن انا ماعلقتش فى مجلة رؤية
لكن حقيقى اسلوبك رائع
ياريت الحلقة الجاية تجيبوا وزير الصحة وهو بيرمى بلاه على منظمة الصحة العالمية

الفقيرة إلى الله أم البنات يقول...

ممكن يا ياسر تبعت لسيد أبو حفيظه تكتب له بعض الحلقات (نشرة اخبار الخامسه والعشرون)
أكيد هتعمل قلبان فى النشرة

ايومي يقول...

فكرة الحلقة واخراجها ممتاز,
والهدف من ورا الكلمات جميل,
بس بصراحة كده انا اتقرفت اوي وبطني اتقلبت وجالي غثيان
ربنا يستر ميكنش المرض اتنقلي.

هذه حياتي يقول...

السلام عليكم ورحمة الله وبركاته

جميل تعبيرك يا دكتور

هتبقي أروع من الساخر جاهين إن شاء الله

تقدم
الي الأمام

وادفع بالتي هي أحسن


هههههههههه

خالص مودتي وصادق دعائي

بنجاواتى يقول...

السلام عليكم

حلقة جميلة جدا يا دكتور

انا كنت مفكر ان الحاجات والاجراءات -المشددة دى-مش بتحصل الا عندنا فى الهند
لكن الحمد لله طمنتنى على شقلوبستان

بس حلوة اوى الانواع الجديدة من الكمامات دى
وكمان ما كنتش اعرف ان الجزم الباتا عندنا احنا بس طلعت منتشرة فى دول صديقة كمان

وتقبل تحياتى

اللؤلؤة يقول...

د/ ياسر عمر
السلام عليكم
أضحك الله سنك يا د/ ياسر ومتابع معاك إن شاء الله جمهورية شقلوبستان وإنفلونزا الخنازير رأقصد الصراصير
دمت بكل الخير

د.آيه يقول...

ههههههههههه
أنا خايفة لحسن أكون اتعديت ربنا يستر
هتشوووووو

MǿиY El-Shreef يقول...

هههههههههههههههه

ربنا يستر لا نلقط المرض احنا وطالعين

ايه كميه الكوميديا الرهيبه دي

بجد يادكتور انت دايما بتخالف التوقعات وبتعلى بكرف الحلقات دي اوي

ربنا يبعد عننا المرض ويرحمنا ويلطف بينا

تسلم ايدك

وربنا معاك ف اكزماتك

تامر علي يقول...

شقلوبستان دي فيها شبه من بلد أنا زرتها قبل كده ... بس مش فاكر اسمها :)

وكمان مرض انفلوانزا الصراصير ده علشان نقاومه صح لازم الحكومات توزع مصل + طقم غيار قطونيل 2 قطعة (التانية احتياطي)

تحياتي على الاسقاط البريء :))))

fnoonh يقول...
أزال المؤلف هذا التعليق.
fnoonh يقول...

لا لا بجد تسلم ايدك
حقيقي كلام جميل رغم انه فيه سيرة السوريسار والقرف ده بس حقيقي يجنن
نشرة اخبار ايه تحفه مش عاوزة غير مبيد حشرات ويقضي عليها هههههههه
بس انت عارف فعلا عشان نقاوم الامراض كلها لازم يكون عندنا ارادة
انا سمعت امبارح على الtv

انهم منعوا القبلات في مصر بين الناس عشان المرض لو موجود مش ينتشر ولما اخدوا اراء ناس الناس عارضت جدا قال ايه ازاي لما اقابل صحبتي في الشارع مش ابوسها
لا فعلا صعبه
عموما موضوعك جميل بس هيا ايه الحكاية انفلونزا انفلونزا
الطيور والخنازير والصراصير مش هندخل بئه في السخونه



تحياتي(((((:

أحمـــــــــــــد أبو العلا يقول...

ههههههه

ضحك متواصل صادق من القلب من زمان مضحكتش كده
ربنا يعزك ويفرح قلبك دايما زي دخلت الضحكه ديه في قلوبنا

بس انا قاعد دلوقتي جسمي مقشعر من اي حركه كده ولا كده احسن يطلعلي صرصار هربان يمين ولا شمال
هتشوووووووووو

ايه ده؟
هتشششوووو

يظهر أن فيه واحد وصل هنا

سارة احمد يقول...

:)))))))تسلم ايدك دكتور ياسر

د. ياسر عمر عبد الفتاح يقول...

ستيته حسب الله الحمش

ربنا يكرمك يا خالتي
الحمد لله إنها عجبتك
عملت ميل رسمي علشان يبقي فيه تواصل مع رؤساء الدول التانية
ولا أنا رئيس هفأ يعني؟؟

د. ياسر عمر عبد الفتاح يقول...

ست البنات

طيب الحمد لله إن عرفت أضحك حضرتك
أصل الضحك ده بقي عملة صعبة أوي دلوقت

د. ياسر عمر عبد الفتاح يقول...

ايوشة

ربنا يكرمك
الحمد لله إنها عجبتك
ويارب أعرف أواصل بعد كده

د. ياسر عمر عبد الفتاح يقول...

رؤية

ربنا يكرمك
طيب وانا كنت أعرف منين إن حضرتك بتشربي نسكافيه
انا بعد كده هكتب ممنوع اصطحاب المأكولات والمشروبات داخل المدونة
المهم إنها عجبتك

د. ياسر عمر عبد الفتاح يقول...

ريمان

ربنا يستر علي بقية الحشرات
ويستر علينا إحنا كمان
ده إحنا غلابة

د. ياسر عمر عبد الفتاح يقول...

Soul.o0o.Whisper

طبعاً خالية خالص
خالية جداً
ولا إنتم مش بتصدقوا كلام الحكومة؟؟
يا داهية دجي..!!!

وبعدين مين الدكتور ده
وقال لمين؟
ويقول ليه؟
وامتي قال؟

أما بالنسبة لموضوع السنتين
فأنا مش واثق إني هكمل للشهر الجاي اساساً
ربنا يسهل
نفوخي أقفر

د. ياسر عمر عبد الفتاح يقول...

صاحبة الفكرة

بـسـمـــة صـــــلاح

اللهم اميــن

الحمد لله إني عرفت أسد فيها
أنا عمال أفكر فيها من زمان
لحد ما اتخمرت في دماغي كده ولقيت نفسي فاضي وقعدت كتبتها

د. ياسر عمر عبد الفتاح يقول...

مرة كمان
بـسـمـــة صـــــلاح

طيب الحمد لله إن كمان البوستين اللي فاتوا عجبوكي
ومش مهم تتابعي المدونات دلوقت
أهم حاجة المذاكرة
شدي حيلك

د. ياسر عمر عبد الفتاح يقول...

لقد خلقنا الله احرارا

ربنا يكرمك
ده بس من ذوق حضرتك
إسلوب أدبي إيه بس .. خليها علي الله
وزير الصحة خلاص مات
لقي حتفه علي يد الصوريصار الجبار

د. ياسر عمر عبد الفتاح يقول...

الفقيرة إلى الله أم البنات

ههههههههههههههه
سيد أبو حفيظة مرة واحدة
طيب حد معاه نمرة موبايله علشان أديله ميسد
ولا تبقي بايخة
خلاص هبعتله كلمني شكراً
أه أصلي فنجري أو يعني
ربنا يكرمك يا أمنا يا أم البنات

د. ياسر عمر عبد الفتاح يقول...

ايومي

ربنا يستر فعلاً
هوه أنا نسيت أكتب في الأول
أحذروا الإنقراف اللي ممكن يحصلكم
وكمان إن البوست ده فيه صوريصار قاتل
لو اتصاب أنا مليش دعوة

د. ياسر عمر عبد الفتاح يقول...

هذه حياته

منور
ضحكتني والله
اروع من جاهين ..!!
في حياتك إن شاء الله

وبعدين إيه ادفع دي
هوه أنا داخل سوبر ماركو مكيف الهواء

منوووووووووور

د. ياسر عمر عبد الفتاح يقول...

بنجاواته

إيه يا عم ده إنت طلعت مكنتش تعرف حاجات كثير أوي أوي أوي
لا حاول تثأف نفسك شوية

هوه إنت من الهند؟
هند ولا منال؟
هههههههههه

معلش بقي عندي إمتحان الصبح ومهيس شوية

د. ياسر عمر عبد الفتاح يقول...

اللؤلؤة

الحمد لله إني قدرت أنتزع من حضرتك ضحكتين
الضحك بقي صعب دلوقت

متابعتك ليا شرف كبير
منور المدونة كلها

د. ياسر عمر عبد الفتاح يقول...

د.آيه

اتعديتي ... يا ستير يا رب
أرد ولا مردش ..!
ارد ولا مردش..!!
خايف أرد أتعدي أما كمان
معلش مش هقدر ارد بقي

د. ياسر عمر عبد الفتاح يقول...

MǿиY El-Shreef

كده ولا كده كله هيلقط
هذا البوست فيه سم قاتل
نياهاهاهاهاهاهاهاها
ده فخ أنا عامله

وبعدين مش عارف الكرف هيفضل يعلي لحد إمتي
شكله ده أخره
وبعد كده هيقع علي جذور رقبته ينكسر

د. ياسر عمر عبد الفتاح يقول...

تامر علي

أنا مليش دعوة
أي تشابه بينها وبين أي دولة تاني مش مسؤليتي
أه ... العمر مش بعزقة
حلوة الفكرة دي
طقم كوتونيل قطعتين .. واحدة منهم ستبن

منور يا أستاذنا والله

د. ياسر عمر عبد الفتاح يقول...

fnoonh

الحمد لله إنها عجبتك
وبعدين يمنعوا القبلات إزاي بقي؟
يعني وهدان الطفل البريء ده
لما يجي جعيدي أبوه ينيمه
مش لازم يحضنه حضن جميل كده ويطبع قبلة علي خده
مينفعش طبعاً يمنعوا القبلات
ده حتي وهدان ميجيلوش نوم

د. ياسر عمر عبد الفتاح يقول...

أحمـــــــــــــد أبو العلا

الحمد لله إني عرفت أضحكك
وبعدين مهو إنت طول عمرك بتضحكنا
أخدنا حقنا منك ولو لمرة

أه خلي بالك
لازمن تبقي حاطط فالنة جوتونيل حمالات مقاس 3 علي وشك
ولول طلعلك علج من علوج الصراصير
لازمن تتصرف بشجاعة
وتجري
إجري بسرعة
ولو معرفتش تجري ومسكك
الله يكرمك .. أبوس إيدك
متجيش المدونة دي تاني
نفسي أعيش لحد ما أشوف شهادة التخرج بعيني
هههههههههه
منور يا
مش بيقولولك برضه يا أبو العيليه
ولا يا عم الإنجينير

د. ياسر عمر عبد الفتاح يقول...

سارة احمد

الله يكرمك

محمد فلفل يقول...

د.ياسرهذه اول زيارة لمدونتك الرائعة ولا اكتمك سرا اننى استطيع ان اواجه اسد ولكنى ارتعد خوفا من الصرصار وقد دفعنى هذا الخوف ان اشترى اغلى الموبيدات الحشرية حتى لا افاجا بهذه الحشرة اللعينة فى بيتى وكما اضحكتنى اغضبتنى حين اجلست الصرصار على عرش الرئاسة ده احنا مش خالصين منه وهو جوه البلاعة..وعندى اقتراح للقضاء على انفلوانزة الصراصير وهو ان نسد جميع البلوعات وبذلك نقضى على مراكز التدريب الحاصة بالصراصير وعلى مصادر رزقهم ـ ابادهم الله ـ وبجد اسلوبك الفكاهى اكثر من رائع فلك تحياتى..
كما انى ادعوك لزيارة مدونتى(واحة الزجل)حتى يدوم التواصل بيننا والى اللقاء..

mosooz يقول...

ياحسرة عليها يا حسرة عليها
حتى الصراصير بيجيلها انفلونزا
ربنا يستر....بس بجد حلقة رائعة وجامدة
واعجبتنى بشدة

تحياتى

بـسـمـــة صـــــلاح يقول...

ايه دا يادكتور حضرتك مش حاططني في القائمه عندك
هدعي عليك يجيلك انفلونزا صراصير
ههههههههههههههههههه

لا بس تعبك جه بنتيجه والله طلعت رائعه جدا
تسلم ايدك

صيدلانيه طالعه نازله يقول...

هههههههههههههههه عاجبك كده يعنى عماله اضحك و قربت اصحى الولاد من النوم منكتر الضحك
بصراحه حلوقوى الوزير الاخنف بتاع منبه يا معنمى ده
و بعدين مالها الفلاين الجوتونيل يعنى كفرت و لا يعنى كفرت
و بعدين ادعيلنا احنا كمان بجلوس الضفادع على سده الحكم
حلوه سده دى زى ما يكون الحكم ماسوره مثلا
هههههههههههههه

د.توكل مسعود يقول...

السلام عليكم ورحمة الله.. وبعد

فاستوقفتنى آخر عبارة

"اقعدوا بعافية"

من أين تأتى العافية بعد كل ماذكرت...

اللهم إنا نسألك العافية
تمامها.... ودوامها... وشكرها...ولا حول ولا قوة إلا بك.

واقعد بعافية.

همسة يقول...

هو دا إللى كان ناقص انفلونزا الصراصير
بس بجد تحفة
تحياتى
تقبل مرورى

د/عرفه يقول...

الدراما السودا دى فكرت فيها كتير
دراما شبيهة بالافلام الاجنبى

لازم الواحد يتخيل علشان يقدر يلاقى حلول

ربنا يستر الايام اللى جاية

dr aly khamis يقول...

السلام عليكم و رحمة الله و بركاته
تسلم ايدك يا دكترة .. يا رافع راسنا معشر الصيادلة(فينا موهوبين جامدين كده....شوية عنصرية)


إننا اليوم نجني ثمرة كفاح ونضال أجيال من الصراصير علي مر العصور,

إن نصرنا هو في الحقيقة نصر لفكر كل قادتنا ومفكرينا الأوائل أمثال
(كارص صاركس) , (وصرصاديمير لينين) , ( صاو تصي يونج) ,
فلتباركهم السماء

حلوة أوى الأسامى كده ... هو ده فعلا مقامهم و لو إن الصراصير أحسن منهم...بس فلتباركهم السماء مش راكبة ..دول ملحدين يا عم

أسأل الله أن يديم عليك موهبتك و أن يستخدمك فى خدمة دينه و أن تبقى على ثغر من ثغور الإسلام تنافح عنه بكل همة و نشاط و إبداع طبعا..

بارك الله فيك
تقبل تحياتى

hamada يقول...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com

أرجوا إرسال مواضيعكم لأختيار الأفضل لنشره العدد القادم
http://www.facebook.com/inbox/readmessage.php?t=1069922064069&f=1&e=-12#/group.php?gid=78080770039

شمس النهار يقول...

يانهار ابيض يارجاله

مش ممكن كل الضحك ده

بس انا خايفه ان المون واحد من العمال اللي تبع كاز يجيب السفاحين بتوعه قتلت الصراصير ويبيدوا البوست
اقول لك امن علي البوست

وبالمره امن علي دماغك الجامده دي وروحك الجميله اللي ترجموا مع بعض البوست الرائع ده

يانهار ابيض علي الاسامي دي لوحدها كارثه ضاحكه

ghorBty يقول...

السلام عليكم

بسم الله ما شاء الله بجد ابداع من نوع خاص بارك الله فيك

عجبني جدا اسلوب الحوار وخصوصا وهدان وابيه :)

ربنا يوفقك كمان وكمان ومن تقدم اٍلي تقدم

أبو العريف يقول...

انا مش شايف في كلامك همز ولمز
ليه
اصل شقلوبستان دي شبه بلد اعرفها بالضبط

تحياتي

م/ الحسيني لزومي يقول...

61 عاما علي النكبة
ونحن أقرب للعودة
والعودة حق لا عودة عنه
شارك في الحملة الالكترونية لإحياء الذكري ال 61 للنكبة ( عائدون)
ضع شعار الحملة علي مدونتك

أنترنتاوي يقول...

حلوة جدا
بالتوفيق

مذكرات مشاغب يقول...

ايه ده؟؟
المدونه دي غريبه جدا
انا بتهيالي اني رديت على الموضوع ده مرتين قبل كده
ودلوقتي فوجئت اني مليش ولا تعليق
انا بتسرق هنا يا جدعان ولا ايه
ولا يكونش جالي انفلونزا الصراصير انا كمان
لما نشوف المرادي كمان

د. ياسر عمر عبد الفتاح يقول...

محمد فلفل

منور يا محمد والله
بقي يارجال بتخاف من الصراصير
بالشوز ودوس عليه ولا يهمك

فكرتك دي إن شاء الله هقولها لأجنحة المقاومة الإنسانية المناضلة من أجل الحفاظ علي شقلوبستان

تسلم يا محمد
ويارب دايماً في تواصل

د. ياسر عمر عبد الفتاح يقول...

mosooz

دي مش يا حسرة علينا
دي يا حشرة علينا
ههههههههههه

ربنا يعافينا
ربنا يكرمك
منور كالعادة

د. ياسر عمر عبد الفتاح يقول...

بـسـمـــة صـــــلاح

دي كانت غلطة وتم تداركها
الحمد لله

د. ياسر عمر عبد الفتاح يقول...

صيدلانيه طالعه نازله

هههههههههههههههه عاجبك كده يعنى عماله اضحك و قربت اصحى الولاد من النوم منكتر الضحك
--------------
اضحكي
ده الضحك بقي عملة صعبة دلوقت
بس بلاش الولاد يصحوا .. حرام



بصراحه حلوقوى الوزير الاخنف بتاع منبه يا معنمى ده
و بعدين مالها الفلاين الجوتونيل يعنى كفرت و لا يعنى كفرت
-------------
مكفرتش ولا حاجة
بس أصل فيه سوء تفاهم بينها وبين جعديي



و بعدين ادعيلنا احنا كمان بجلوس الضفادع على سده الحكم
حلوه سده دى زى ما يكون الحكم ماسوره مثلا
هههههههههههههه
-------------
لا دي غير دي
دي سدة بضم السين
لكن التاني سدة بريحة وحشة
وبعدين تصدقي ينفع
مش مهمه برضه صراصير

د. ياسر عمر عبد الفتاح يقول...

د.توكل مسعود

أهلاً بك يا دكتورنا الكريم
علي رأي حضرتك
هتيجي منين ؟؟

د. ياسر عمر عبد الفتاح يقول...

همسة

ربنا يكرمك
ده بس من ذوق حضرتك

جزاكِ الله خيراً

د. ياسر عمر عبد الفتاح يقول...

د/عرفه

أفلام أجنبي ..
بس ده فيلم هندي

منور يا دكترة والله

د. ياسر عمر عبد الفتاح يقول...

dr aly khamis

وسع يا عم إنت وهوه لأبو الزمل
إزيك يا يا عمنا

ربنا يكرمك
ده بس من ذوقك


عندك حق والله
هوه ده مقامهم

موضوع فلتباركهم السماء ده جاي علي لسان واحد منهم
يعني مش أنا اللي قلته
وطبعاً لا يجوز إني أدعليهم لأنهم ملحدين
وأغلبهم لا يروا وجود للدين أصلاً
وبيصفوه إنه أفيون الشعوب

منور كالعادة

د. ياسر عمر عبد الفتاح يقول...

hamada

ماشي
هشوف الموضوع ده إن شاء الله

د. ياسر عمر عبد الفتاح يقول...

شمس النهار

ربنا يكرمك
ده بس من ذوق حضرتك
والله أنا سعيد إني قدرت أضحك حضرتك

وبالنسبة لواحد من العمال
فأكيد انضم دلوقت لسلك المقاومة

شكراً علي المرور والتعليق

د. ياسر عمر عبد الفتاح يقول...

ghorBty

ربنا يكرمك ويبارك في ضحرتك
جزاكِ الله خيراً

د. ياسر عمر عبد الفتاح يقول...

أبو العريف

مليش دعوة أنا ياعم
دي مشكلتك إنت
أنا مش شايف إنها شبه أي حاجة خااااااالص

د. ياسر عمر عبد الفتاح يقول...

م/ الحسيني لزومي

جزاكم الله خيراً علي التنبيه
ربنا ينصرنا علي اليهود

د. ياسر عمر عبد الفتاح يقول...

أنترنتاوي

ربنا يكرمك

د. ياسر عمر عبد الفتاح يقول...

مذكرات مشاغب

يا عم تلاقيك نسيت
تلاقيك بعد ما كتبتهم خدتهم معاك تاني ومشيت
طيب دور كويس في جيبك كده

أنا برضه هدور عندي علي الأرض
يمكن يكونوا وقعوا ولا حاجة

محدش شايف يا جماعة أربع تعليقات مشاين لوحدهم؟؟


منور يا زعيم