12 سبتمبر، 2009

خزعبلات : عبور الطريق في القاهرة

*عملية عبور الطريق في القاهرة الكبري أشبه بـ

العمليات الإنتحارية

الغير مضمونة العواقب

وغير مأمولة النجاح

فهي تتطلب الكثير من اللياقة والمرونة والرشاقة

والسرعة في اتخاذ القرار والمثابرة والتحدي

أيضاً يجب أن تكون في أقصي درجات التركيز للتعامل مع أية مستجدات تطرأ

هذا كله طبعاً لا يؤهلك للنجاح في تلك المهمة إلا بعد توفيق الله سبحانه وتعالي

لذا وجب عليك النزول لسجدة شكر بعد الوصول للجانب الأخر_إذا وصلت_

فما فعلته للتو يضاهي أحد أهداف أبو تريكة روعةً وصعوبةً

فاجري مسرعاً وتمايل كما النسر المحلق في الآفاق , ثم اتبع هذا بسجدة شكر

ولا تستغرب إذا انهالت عليك أحضان وقبلات المارة والسابلة ليهنئوك علي إنجازك العظيم



أكثر ما يثير دهشتي أننا رغم كل هذا ..

لا نحصل علي حفنة من الميداليات في الجمباز في الأوليمبياد ..!!

مما يدفعني إلي أن أجزم أن أبطالنا في الجمباز ,,

لا يعبرون الطريق في القاهرة.





------------

ده مقالي علي

مجلة رؤية مصرية الإلكترونية

متنسوش تعدوا علي هناك

وكالعادة مستنين مشاركاتكم معانا في المجلة

خزعبلات : عبور الطريق

---------

ياريت كمان نرحب كلنا بصديقي الشاعر

أمجد الشعشاعي

انضم لكفر الحاج بلوجر

وكمان لفريق تحرير المجلة

هناك 33 تعليقًا:

Darsh Basha يقول...

اول تعليق

قبل اى حد


وهقرأ وارجع

كدة انا ليا عشرة جنية

Darsh Basha يقول...

ياسلام دا علىكدة هيبقى فى بطولات بقى
واللى يعدى ياخد جايز الدولة المعدية
اسيب بقى المدونة
علشان اشوف موصوع المجلة
يالا سلام

مسدس صغير يقول...

هههههه
يضاهى هدف من اهداف ابو تريكة طبعا
ههههه
حلو اوى المقال احييك عليه
واهنى صديقك امجد بالانضمام الى بلوجر

Yusuf يقول...

عبور الطريق في القاهرة
فقرة من فقرات السيرك القومي
الفارق الوحيد أنها بدون مدرب
لذا تمارس فيها العشوائية
من قبل جميع الحيوانات

مقال رائع
تحياتي

noon kiko يقول...

والله ياعمونا مقال تستاهل عليه كوباية شاى ابو فتله
ولا تقلق الفتله على حسابى
على فكره احنا بلدنا مافيهاش زحمه خالص ابدا يعنى الا يوم الخميس
تلاقى بشر ف الشوارع
ولازمن وحتمن ولابد لو نازل يوم الخميس تكون على درجة لياقه عاليه
زى ايام اسكندريه
كنت اسحب امى نص كيلو مشى عشان الاقى نفق نعدى منه للناحيه التانيه
واخر مازهقت بقيت اسيب امى ف السكن وانزل اعدى الطريق بكل جرأه وحدى
طبعا بجرأه قروديه
هه
ايام وعدت

♥نبع الغرام♥♪≈ يقول...

انا جايا بس عشان اقولك كل سنه وحضرتك طيب

وزعلانه منك قووى لانك مش بتزرنى من زمان

سلام

المعتصم يقول...

السلام عليكم ورحمة الله وبركاته
ازيك يادكتورنا
يارب تكون بخير وفى احسن الاحوال
بجد البوست دمه خفيف خااااالص
وحقيقى جدا على الرغم من انه كوميدى
بس تصدق محدش بياخد باله من الموضوع ده
وحلوة التشبيهات والتعبيرات المجازيه دى
((فما فعلته للتو يضاهي أحد أهداف أبو تريكة روعةً وصعوبةً))
ههههههههههههههههههههههههههههههههه
وياعم الف مبروك على المعلم بلوجر انضمام اخونا امجد
اكيد بلوجر هو اللى كسبان من الموضوع ده
ههههههههههههههه
على فكرة انا مكنتش قافل التليفون!!!!!!!!
ســـــــــلام يادكترة

Unknown يقول...

بسم الله الرحمن الرحيم
السلام عليكم ورحمه الله وبركاته
صدقني صديقي العزيز ...
الأصعب من ذلك ان تأخذ بالك.. ممن عبر الطريق بسلام .

غير معرف يقول...

الابن العزيز ياسر
ازيك وعامل ايه
ربنا يتقبل منك صالح الاعمال
وليك نصيب الاسد من دعاوتى فى رمضان
كلماتك دمها خفيف ووصفك ايضا لمرور الطريق
وطبعا بالنسبة لى انا شرحت لك اللى فيها
وعلشان كده مش بتحصل ابدا ليا ولكن بيحسها
اللى معايا
صحيح بالنسبة للمجلة انا كتبت عن السيدة عائشة
رضى الله عنها جزئين وسوف يتم ارسالهم للمجلة
وشوف انت بقى ينفعوا ولا ايه
وخلى بالك ياياسر انا مش بزعل من التوجيه
علشان كده حكون فى انتظار ملاحظاتك
يارب اطمن عليك بالف خير

Ahmed يقول...

ههههههههه

وحياتك ولا حتى اللي سايق
كله اصعب من بعضه

طب على الأقل اللي بيعدي بيحاسب على نفسه انما اللي سايق بيحاسب على عشره بيعدوا
هههههههه

الطريق عندنا معجزه تقف ادامها وتقول سبحان الله
كل الناس ديه بتستخدمه وهوا فيه المشاكل ديه وكلها ومع ذلك نسبه الاصابات بالنسبه لنسبه الستر والنجاح فليله جدا

ههههههه

مل سنه وانت بخير وربنا مايزنأك في طريق ابدا

ستيتة يقول...

بتحسسني انك لما بتنزل القاهرة ها تغني فدائي فدائي فدائي
ههههههههههههههههههههههه
محسسني اننا ابطال فيها
انا هركيوليز يا ولاد
بلاش زينة منفعش
كل سنة وانت طيب
ادعي لي معاك

شمس النهار يقول...

ازيك
يعني انت علشان اتخرجت وبقيت دكتور
عايز تعدي الطريق كده ببساطه
ده انت لازم تقرا الفنجال قبل ماتعدي الطريق وتحدد اي طريق المهم انه مايكونش طريق النصر والا الاووووتوستوراد
وتكتب وصيتك وتوصي ام العيال علي العيال
شوف انا مش عايزه اعقدك لكن هي دي الحقيقه
فطريقك ياولدي والا بلاش
انت لما تكون في القاهره كلمني وانا هاجي اعديك

غير معرف يقول...

بوست دمه خفيف اوي
:))))))

تسلم ايديك

-_- يقول...

هو اصلا خلاص خلوا اللى يتخبط في الطريق ملوش دية

الشعب لابد له من حكومه تشكمه يقول...

هههههههه البوست ده حلو جداااا اصلى مجرباه وحفظاه هههههههه..
بس على فكره نصيحه اخويه اوعى تفكر تعدى الطريق وفى عربيه واحده ست سيقاها اوعىىىىىىىىىىىى..:))

"أحلام حقيقية" يقول...

السلام عليكم يادكتور
انا كنت زمان بقول مفيش ازمة عندنا فى الصعيد دلوقتى الازمة وصلت لغاية عندنا بردو
هروح اقرا باقى العدد الجديد من المجلة

فاتيما يقول...

يا ياسر أصل إنت لسه بخيرك يا بنى
و مش قادر تاخد على المرمطة ..
أنا بعدى الشارع سعادتك من و انا فى اولى حضانة بنفس السيناريو اللى قولته دا تقريباً
فخلاص الواحد جتته نحست
الفكرة موجزة و مطروحة بشكل ممتاز
الله ينور و مبروك لصديقك

mimi يقول...

لا كله كوم ... ولما تيجي تعدي من علي خطوط عبور المشاه .. تلاقي الناس تقوللك " إنتوا إيه حد يعدي من هنا !!!!"

وكأنك فعلت فعل فاضح في الطريق العام

يلا ... معلش

كل يوم وأنت طيب

ومبروك انضمام صديقك للعالم البلوجري الرائع

أبو العريف يقول...

كالعاده يا باشا

بوست رائع

وهروح اقراه هناك بقي

ولسه مصر انك تنزل كتاب

شقلوبستاااااااااااان

د/ هالة(صيدلانية) يقول...

مررت لاترك اثرا

مدونة بديعه اخى الكريم

تقبل تحياتى

عمرو يقول...

عبور الطريق فى القاهره محتاج بهلوان أبن بهلوانات و يقظه و حرص بغير حدود ..
و الحقيقه أن سلوكيات قائدى السيارات أصلا تتسم بالقسوه و العنف و عدم الذوق و الرحمه فلا هم بيرحموا طفل و لا سيده و لا عجوز و حاجه يعنى تجيب الفزع بصراحه و المنظومه كلها محتاجه تتنسف و تبنى لدى الناس فكرة الرحمه بالسائرين ..
حلو أوى المقال و المجله نفسها قيمه ..
بارك الله فيك يا دكتور و تقبل تحياتى و تقديرى ..

Unknown يقول...

ايه يعنى ما عندك كل الشعب بيلعب كورة واللعبة الشعبية و مع ذلك شوف حالتنا فى الكورة

Unknown يقول...

انا شخصياً جالى
فوبيا من تعدية
الشارع من بعـــد
حوادث كتيرة لناس
اعرفهم راحوا مساكين
ضحية التهور (الارعن)
لقائدى السيارات.
ومبروك لبلوجر انضمام
صديقك اليه ونشوف المقالة
بعد ما نرجع من الشغل لو
ربنا سبحانه وتعالى كتب لىّ
السلامة وانا بعدى الشارع
ادعيلى ياصيدلى ربنا يخليك:)

fnoonh يقول...

الصراحة مش في القاهرة بس والله في الشرقية كمان الواحد بيحس انه بين الحياة والموت وهوه بيعدي الشارع مافيش احترام ابدا للمشاه حتى السيدات كل الدول الخليجية لو تشوف قد ايه
بتحترمهم وبتقفلهم عشان يمروا الشارع شتان مابين مصر وبينهم بصراحة

مقوله جميلة وواقعية جدا

تقبل خالص تحياتي

د/عرفه يقول...

كيفك يا دكتور
كل سنة وانت طيب

خلاص عندى فكرة نيجبلهم فى تراك الجرى عربيات علشان يعدوا ويجروا جنبها
هههههههههه

TIMMY !! يقول...

بيني و بينك يا ياسر أنا مش بتفرق معايا الحاجات دي ,

أنا سا عات و أنا بعدي بيبقى نفسي عربية تلطشني و أخلص !!

نهايته , أنا بدعيلك يا عم الحاج و إوعى تنساني في الدعاء ,

و كل عام و انت كويس :)

مصطفى محمود يقول...

السلام عليكم

أنا معاك طبعا إنه من الصعب جدا إنك تعدي بأمان في أي طريق عندنا في البلد دي !

بس انا لما خدت الرخصة وسقت عربية ومشيت بيها , شفتها من الناحية التانية .
وبصراحة كانت نظرتي عن الناس اللي بيعدوا (وانا كنت منهم طبعا) إنهم شوية ناس همج بيعدوا من أي حتة وفي أي لحظة
لأنك بسهولة جدا ممكن تلاقي شخص او عدة اشخاص نطوا قدامك فجأة مع إن العربية ماشية بسرعتها وانت ونصيبك بقى لحقت الفرامل ولا الفرامل بعدت عنك !!!

الشاهد من الكلام إن احنا اصلا عندنا حاجة غريبة في المواصلات , لا في طرق سليمة , الطرق عبارة عن شوية مطبات بينها بعض الأسفلت مش أكتر , دا غير إن الطرق غير مخططة , ومفيش حارات مرور مشاة , وإن وجدت محدش بيلتزم بيها , دا غير غياب عساكر المرور اللي احنا لازم نحمد ربنا ونسجدله شكر فعلا إنهم مش موجودين وإلا كانوا مصوا دم اي حد سايق عربية عشان ياخد 10 ولا 20 جنية !!

الموضوع كله ثقافة بقت متأصلة فينا - اللي سايق مفكر نفسه وراه الوزارة , واللي بيعدي مفكر اللي بيسوق العربية جايبها من مغارة علي بابا ولو عايز يوقفها في أي وقت هيقولها اوقفي يا سمسم هتقوم واقفة.

ولا حول ولا قوة إلا بالله !!

ربنا يهدي

وكل سنة وانت طيب :)

حفيدة عرابى يقول...

كل عام وحضرتك بخير

ليس فقيرا من يحب يقول...

السلام عليكم
كل سنه وحضرتك طيب يارب

وعيد سعيد عليك وعلى كل حبايبك

معذرة على التأخير

Unknown يقول...

كل سنة و انت طيب يا دكتور
و عيد فطر سعيد

أحمد سعيد بسيوني يقول...

بسم الله الرحمن الرحيم

تقبل الله طاعاتكم

وكل عام وانت بخير

جعله الله عيد حب وسعادة وهناء

دمتم بود

Maryama Qandil يقول...

كل سنة وحضرتك طيب
عيدك مباارك و سعيد عليك وعلى الاسرة الكريمة

عساكم من عوااده

♥نبع الغرام♥♪≈ يقول...

كل سنه وحضرتك طيب
عيد سعيد علينا جمعيا