27 يونيو، 2009

رسائل سريعة مريعة

السلام عليكم ورحمة الله وبركاته
ازيكم يا جماعة
عاملين إيه كلكم؟
يارب تكونوا كويسين
دي شوية رسائل سريعة  في مواضيع مختلفة
عاملة زي أهم الأنباء كده ,, ربنا يستر
.
.
1- لكل الناس اللي دعيتلي وسألت ليا .. ربنا يكرمكم بجد
الحمد لله خصلت إمتحانات يوم الخميس ,,
بعد فترة إمتحانات مبقتش عارف أحسب هيه استمرت قد إيه
وكمان بفضل اله سبحانه وتعالي حليت كويس في الإمتحانات
.
2-واجب عزاء لأمنا أم البنات لوفاة والدها
أحسن الله عزائك ,, إن لله ما أخذ وله ما أعطي وكل شيءٍ عنده إلي أجل مسميً
فلتصبري ولتحتسبي
أنا عارف إنها متأخرة شوية ,, ياريت حضرتك تعذريني
.
3- بشكر كل الناس اللي رشحتني للحصول علي المركز الأول في استفتاء الشهر الأول
واختياركم ده حقيقي أسعدني جداً جداً جداً
ده أنا حتي ازبهليت لما لقيت نفسي في القايمة بس ,, مش مركز أول كمان ..!!
وبدعو كل الناس للتفاعل مع المدونة ,, والترشيح كل أسبوع
دي حاجة بتخلق جو جميل من التنافس وبتخلي للتدوين طعم تاني
.
4- شايف موضة كده غريبة شوية ,, كل الناس بتغيب عن التدوين
وأنا مش فاهم ليه حقيقي ,, يعني إيه نغيب عن مدوناتنا
وأنا من مدونتني بعلنها صراحةً
إني ناوي أغيب أنا كمان :)
أنا كنت مقصر معاكم في الفترة اللي فاتت
والجديد بقي إني ناوي كمان أقصر الفترة الجاية
.
أنا حاسس إني عاوز أعمل ريستارت لنفسي ,,
وعلي رأي عمدة التدوين الزعيمة المناضلة (خالتي ستيتة)
أنا بعاني من أعرض الإنسحاب من الإمتحانات
.
.
محدش يزعل مني ,, حقيقي غصب عني
أشوفكم علي خير إن شاء الله
مش هطول كلها أيام وهاجي تاني واقعد علي قلبكم
هتروحوا مني فين يعني؟

17 يونيو، 2009

اشتغالات الإمتحانات



اشتغالات الإمتحانات

أيام الإمتحانات بتبقي ايام غريبة جداً
ودايماً بتبيقي مليئة
بالغرائب والطرائف والعجائب
علشان كده بسميها اشتغالات الإمتحانات

::: اشتغالات شركة الكهرباء :::
دايماً ليلة الإمتحان النور بيقطع
ده شيء طبيعي جداً لا يدعوا أبداً للدهشة أو الإستغراب
بالنسبة ليا علي الأقل
وبقيت دلوقت مبسألش يا تري النور هيقطع ولا لا؟
بقيت بسأل ياتري النور هيقطع إمتي؟

ودي مش حالة فردية ليا بس علي فكرة
كثير بلاقي حد من أصحابي بيتصل بيا يقولي 
أنا هاجي أذاكر معاك لحد الصبح لأن النور قطع عندي
(خاصةً إن بيتي أشبه بالبنسيون , أو معسكر إيواء المشردين واللأجئين)

::: اشتغالات الدي جي :::
كمان ليلة الإمتحان بتبقي فرصة مناسبة جداً للتعرف علي 
أحد الجيران والذي تكتشف أنه يقطن قريباً منك جداً أو علي بعد عدة شوارع فقط

واللي كان طول عمره بيجهز نفسه , وبيدور علي بنت الحلال اللي تستاهله
وأخيراً لقاها علي حين غرة
وقرر فجأةً إنه يدخل دنيا ويتزوج
وطبعاً لازمن وحتمن ولا بود يعمل حنة ,,
فيه فرح من غير حنة؟
ده حتي يبقي حرام ولا يجوز ,, ولو المأذون عرف يرفض إتمام العقد

وساعات كمان المحل (المعفن) اللي مقفول من سنين طويلة تحت بيتكم
قرر صاحبه فجأة إنه يعمله سوبر ماركو أو مخبز فينو
وطبعاً لازم افتتاح
طيب إيه العلاقة الأثمة اللي بين الحالتين دول؟
إن في كلتا الحالتين هيبقي فيه دي جي
والدي جي بالمناسبة هو الإسم الحركي لجهاز الكمبيوتر
بتاع بن أخت العريس أو صاحب المحل غالباً يوم الحنة
ولكن مع إضافة عدة سماعات من الوزن الثقيل له.

ملحوظة : قد يكون أحد اصدقائي اللي وقع في الورطة دي
وطبعاً أنا اللي بتحمل مصيبة دي لأنه بيجي يذاكر معايا
((راجع النقطة الأولي .. :))

::: اشتغالات الفيفا :::
يتقمص الإتحاد الدولي لكرة القدم دائماً دور الوغد الجبان أيام فترة الإمتحانات
فلازم تلاقي ميعاد كأس أوربا أو تصفيات كأس العالم أو حتي النهائيات
أو أي بطولة مهمة تبقي أيام الإمتحانات
وهنا بقي بيبقي فيه صراع داخلي كبير بين
صوت الضمير (المذاكرة)
وبين صوت الكورة (الماتش)
وبينتهي غالباً الصراع بالضربة القاضية من أول جولة ,
طبعاً بتفرج علي الماتشات

::: اشتغالات التأمين الصحي :::
لو بقي الدنيا ماشية معاك أوي ,
تعيا يوم الإمتحان ,, مش مرض جامد
بس يكفيك شوية برد .. بس فول أوبشم
(يعني بالصداع بتاعه (بتاع بلاده) وتكسير العضم ورشح ودوخة .. واللذي منه)

أو حتي نزلة معوية برضه ودي مش لازم تبقي فول أوبشن
كفاية بس تكون نازلة بالمغص ,, والإزاز الكهربا .. 
نياهاهاهاهاهاهاهاها

::: اشتغالات العيال الصغيرة :::
برضه من اشتغالات الإمتحانات المتعارف عليها
إن عمتك وخالتك وتانتك وخالك وعمك ,, يقرروا يعملوا مفاجأة (سعيدة)
ويجيبوا الأولاد ويجوا يزورونا في يوم ما قبل الإمتحان
والمشكلة الحقيقية لا تكمن فيهم .. دول حتي طيبين
المشكلة في جحافل الجيوش الجرارة من الأطفال
وإذا ذكر الأطفال (جمع يعني) يبقي أكيد لازم نذكر
الرغي والزن والرخامة والتباتة والزيطة والتنطيط حواليك
واللعب في المناخير وإنت نايم , واحتلال الكمبيوتر
وطبعاً مش هتقدر تعملهم حاجة
لأنهم رد الفعل الطبيعي جداً .. إنه هيشغل السرينة
ويقعد يعيييييييييييييط ويصرخ ويقلب الدنيا عليك..
وطبعاً بيبقي نفسك وقتها ترميه من أي بلكونة 
لكن اللي بيمنعني إننا ساكنين دور تاني ...
فمش هيحصله حاجة

::: اشتغالات المونبه :::
اشتغالة أخري دايماً بتحصل
المنبه المقرف سواء في الموبايل (ابو مونبه منه فيه)
أو لو منبه منفصل
أيوه اللي بيفضل طول السنه قارفك ويصحيك من النوم وينكد عليك
المنبه ده بقي بتنزل عليه الطيبة والوداعة في اليوم ده
ولما بتظبطه علي ميعاد علشان يصحيك .. بتصعب عليه ومبيرداش يقلقك
فتصحي تلاقي الإمتحان تقريباً بدأ
وتصرخ تقول
سبق الإمتحان العزل ... اااااااااااااااااااه
....
وبناسبة ذكر المنبه
تعرفوا ليه بلدينا بيحط جنبه كوباية شاي وهوه نايم؟
علشان الشاي منبه
طيب وليه ساعات كوباية شاي وكوباية قهوة؟
علشان لو الشاي مرنش
(محدش يضرب)

::: الفجـــر :::
لما تنزل تصلي الفجر ,
تفاجيء إن نفس الشيخ اللي بيصلي كل يوم في ثلاث دقايق
وتبقي متضايق منه ساعتها ,, وتقول متنفعش الكروتة دي
فتتنزل عليه التقوي والإيمان والورع والخشية ..
كل ده مرة واحدة .. ربنا يزيده
فيأخر بين الأذان والإقامة ساعة إلا ربع
وبعدين يصلي بنصف القرآن (علشان ميطولش علينا يعني)
لكن بيعوض التقصير الجامد ده في الدعاااااااء
وهنا لازم يتذكر كل إخواننا المستضعفين والمغلوبين علي أمرهم في كافة بقاع العالم
ويدعيلهم بشدة .. نفر نفر
وفي النهاية يختم بقوله
اللهم وفق ابنائنا في الإمتحانات ..
بعد إيه؟
ما خلالالالالالالالالالاص


كل ده بقي والمفروض إن أنجح صافي
طب ازاي بقي؟
شوفتوا إن العيب مش فيا وإني مظلوم ..!!


طبعاً البوست ده برضه معمول علشان أستدر عطفكم وتدعولي
معلش استحملوني شوية ..
إنتم معندكومش اخوات بلاستيك؟

11 يونيو، 2009

ومضــــات جديدة


ومضــــات



ونـــقول تاني

لمعرفة أصل ومضات

وسبب تسميتها يرجى زيارة الرابط التالى


المقدمة



*الحب والشهوات كالجمرات

ينفخ الانسان فيها بنفسه فتستعر وتشتد نيرانها
.
لتحرقه فى النهايه.
.
.
*يرى الأطفال العالم كما يجب أن يكون
.
ويراه الشباب كما يتمنون أن يكون
.
ويراه الرجال كما هو حقيقة جامدة بلا رتوش
..
ويراه الشيوخ كما كان.

 

*نتمنى دائماً أن نكون ...

بنقاء وتطلع الطفولة

.وقوة وحيوية الشباب

.ورباطة جأش الرجولة.

وخبرة وهدوء الشيوخ.

 


*قمة اليأس أن تعيش لتموت

وقمة الأمل أن تموت فتعيش.


 
*قد تكون الحياة غير متكافئة 

ولكنها في المجمل عادلة.

 

*قالوا وما
.
الصمت ..؟؟
.
قلت: وكيف أصفه بالكلام
.
ألن يؤذي هذا مشاعره ..!!
.
فإنه مدينةٌ خاصةٌ لا تصفها الحروف
.
ولا تحتويها الكلمات.

 

*لا توجد تجربة فاشلة
.
توجد فقط تجربة لم تؤتي ثماراً واضحة لك.

 *الناجح يصنع من

حلمه .. واقعاً يُعاش

أما العظماء فيحيلون

واقعهم .. حُلماً خيالياً .

..

 خلو بالكم من دي بقي أوي


 *اللي هيدعيلي ربنا يوفقني في الإمتحانات

ربنا هيكرمه أخر كرم إن شاء الله

وهنيالك يا فاعل الخير والثواب

ودعوة قليلة تمنع بلاوي كثيرة.


 

بـقلــمي

05 يونيو، 2009

مَنْ أنَــا

لكل من تاه عن نفسه
ونسيَّ أنه لله عبد
خلق من أجل عبادته
ومن أجل حمل الأمانه
.
...
.....
مَنْ أنَــا

وأظل أسأل في غيابٍ مِنْ .. ( أنـا )؟

مَنْ أنا؟

قد بِتُّ منذ الحين أبحث في الدُنَي

 عنِّي أنا ..!!

لأُزيح كل التيه عني والعَنَا

 من ذا أنا؟

 هل ضحكةٌ للشمسِ أَوْرَقََهَا اللهبْ؟

 هل حرقةُ الأصداءِ في نار الغضبْ؟

 أو نطفـةٌ وُجِدَتْ بِلا أَدْنَي سَبَْب؟

...

.

 حتي أتاني الردُ  مِن صمتِ  الهدايةْ

 هلَّا طَرَقْتَ الباب ..!

 قَدْ تُهْتَ وازداد الغياب

 أبشر فقد حان الإياب

 أنت المُوَّكْلُ بالأمانةْ ..

ونسيتَ دربَكَ في متاهاتِ الغوايةْ

فابدأ طريقك من هنا .. حتي النهايةْ



----------------------------


كانت هذه بداية شيءٍ قد يتم .. أو لا

من يدري ..!!؟؟

.....

..

.

عــذراً


فـــاصل ونــواصل


بإذن الله

01 يونيو، 2009

شقلوبستان : السفالة والصعود إلي الهاوية

شقلوبستان
السفالة والصعود إلي الهاوية
.
.
.
  تن تن تن

  الساعة الأن التاسعة صباحاً بتوقيت مدينة القادرة 

  (قادرة أم عز)

  هكذا جاء الصوت عبر الأثير في تلك الساعة الصباحية , 

  قبل أن يخرج علينا مذيع(الراديون) قائلاً:

  كركركركركر ..
مسااااااااااااء الخييييييييييير

  نياهاهاهاهاهاهاهاهاهاهاهاهاهاها

  .

  .

  .

  لأننا في شقلوبستان العزيزة حيث التناقضات تجد لها سكناً مريحاً وحضناً دافئاً, 

  فكل شىء أصبح ضده

  ولأن شقلوبستان لها نصيبٌ من إسمها كما ذكرنا مراراً

  فكل شىء فيها أصبح 

  (متشقلب)

  حتي معايير النجاح والفشل والقمة والقاع

  فقمة المجد في شقلوبستان ليست إلا (الهاوية) , ومستقر قاعها هو في الحقيقة أعلي أعاليها.

  ولذا فإنك لن تصل لأي شىءٍ سوي بمعرفة القواعد وإتقان أصول اللعبة , 

  ويعتبر الأستاذ (عربيد السهتان) أحد هؤلاء المتربعين علي القمة .. 

  قمــة الهــاوية.

  الأستاذ عربيد ليس شخصاً بعينه ولكنه مثال بشري مستنسخ في شتي مجالات الحياة.

  فقد تجد نسخته مثلاً كأديب قد رأي أن الطرق الشريفة والكلمات النقية 

  لن تودي به إلا إلي (القاع) و(الضياع

  بينما أمانة القلم ومسؤلية الكلمات شعارات (يحسبها) خاوية , 

  ففكر وقدر فقتل كيف قدر 

  حتي رأي الحل يلمع أمامه كعين شيطانٍ حمراء بليل حالكٍ بهيم 

  (تحطيم الرموز وضرب الرؤس , والسير عكس الإتجاه)

  ذلك هو سبيل الصعود إلي الهاوية

  فكتب عن العري عن الإبتذال عن الفسوق عن المجون

  عن قتل الفضيلة بسهام الرذيلة , عن كل ما هو ساذج و(عبيط)


  (واديني في الهايف وانا أحبك يا .. فننس)

  فأصبح في غضون سنوات قليلة نجم المحافل الأدبية الأول 

  ثم زاد طموحه ونهمه وأصبح نصب عينه المحافل الدولية والجوائز العالمية.

  وهنا يجب أن يطور من تكتيكاته الهجومية (المنحطة)

  فتفتق ذهنه عن أسرع الطرق وأنجحها

  لا شيء أسهل من الدين تلك المرة.

  مقالات وقصص مليئة بالترهات والأكاذيب و(الإفتكاسات) الشخصية 

  والغمز واللمز علي أصول الدين وثوابت العقيدة , 

  عبثاً أراد أن يهدم بمعول كلماته أو أن يطفيء بفيهِ نور الله , 

  ويأبي الله إلا أن يتم نوره.

  نشأت بينه وبين مدام ( ساقطة ) الممثلة القديرة علاقةً قائمة علي (الإبتذال) المتبادل , 

  فهي الأخري تتقن أصول اللعبة جيداً وتتربع علي إحدي قمم (
الهاوية) الفنية بشقلوبستان العزيزة.

  فيكتب هو القصص والروايات , لتجعل منها هي واقعاً يُعاش علي شاشات السينما , 

  بارعة في أدوار الإبتذال والعري والإغراء

  لكن طبعاً الإغراء الموظف في السياق الدرامي للفيلم بشكل هادف 

  (مش أي إغراء يعني , هيه سايبة..!!).

  مشكلتها أنها (نساية شوية) , حيث تنسي دائماً (دون قصد طبعاً) إحدي قطع ملابسها أو أكثر في بيتها , 

  لذا فحينما تبدوا عارية فاعذرها (غصب عنها حقيقي). 

  وعلاقة أخري تربطه بالأستاذ (فاسد إمام) أو الزعيم

  وهوه بالفعل زعيم وقمة عالية من قمم (الهاوية)

  مع أول نظرة إلي وجهه تجذب إنتباهك تلك التجاعيد التي شقت طريقا في وجهه بفعل السنين 

  وكأنها (ترع صرف غير صحي وغير مغطي)

  وفشلت جميع أنواع المساحيق وعمليات الشد (والجذب) في محو أثرها

  كما تلاحظ بؤر سواد غريبة تلف عينيه بفعل شرب (المية) كثير

  رغم كل هذا يعتقد أنه (عنتيل) السينما الشقلوبانية الأول

  وأنه الرجل الذي يستطيع أن يغوي كل (البنات) .. بقوته وجبروته وعنفوانه

  وأهم من كل هذا .. بخفة دم (أمه) الطاغية

  حتي إنك تشعر أنه يحاول أن يكمل نقصاً ما لديه عبر الأفلام 

  يهوي إعادة صياغة الكلمات

  فللغرور عنده تعريف أخر (ثقة في النفس)

  والسفالة ... أصبحت (إبداع)

  التجرؤ علي الدين ... اضحي (فكر وحرية رأي)

  الدعارة .. (فن)

  الدياثة .. (تحضر وتمدن)

  قلة الأدب .. (خفة دم)

  الهبل ... (روشنة)

  ولا ينسي الأستاذ فاسد ان يتحفنا بين الفينة والأخري بخلاصة فكره في كل فروع الحياة

  فعلي إحدي القنوات كان يتحدث عن مفهومه عن (الوسطية) في الإسلام

  وأثناء كلامه عنها تشعر أنها أقرب ل (الأستكية) في الإسلام

  وتتخلص في جعل الدين كالأستيك .. يستطيع أن يتمدد ليسع ويبرر كل شيئ يفعله الزعيم

  وعلي قناةٍ أخري يمدنا بخلاصة فكره الرشيد في السياسة أو الكرة أو الفن أو الثقافة

  فهو (بسم الله ما شاء الله عليه ) موسوعة شاملة في كل مجالات الحياة

  وكأنه استقي حكمته الخاصة العالية من أحضان الغانيات.

  يهدف في النهاية من كل أفلامه لتوصيل فكرة

  أن كل متدين عبارة عن رجل بلحية كبيرة .. مكفهر الوجه

  يرتدي (جلابية) بيضاء قصيرة يبدو من تحتها سروال أبيض طويل 

  يتلفظ ببعض الأيات القرآنية بتنطع شديد 

  بينما تنشغل عينه بال(بصبصة) علي النساء الفضليات العاهرات

  وعلي استعداد تام أن يساوم كل مباديءه بطرف كحيل أو مبلغ كبير

  وهناك هدف أخر

علي ألناس أن تدرك أن
الحب (الزنا) شيء طبيعي وغير مثير (للإشمئزاز) ولا حاجة 

  فنعم الغايات السامية. 

  قد تجد أيضاً الأستاذ عربيد في صورة الشاب (سهوكة) المطرب العاطتشفي .. جداً.

  وهبه الله من المقومات ما يجعله نجم (الجيل) بلا منازع , 

  حيث يعاني من غزارة في نمو (شعر صدره) , وفي خفة دم (أمه) الطبيعية (أيضا), 

  ونعومة شعر رأسه , وعيون جريئة يجيد بها فن (التسبيل) ,

  وصوت ( حونين) , وبنطلون ساقط , وعضلات مفتولة بفعل الحقن , 

  ومشية متكسرة تجعلك تقسم أنه (هارب) من الجيش.

  وقلما تجتمع كل تلك الصفات في أحدهم , لذا فهو فتي احلام العذاري الأول , 

  حيث يبدوا دائماً في أحلامهن ممتطياً ذاك (الجحش ) الأبيض ليخطفهن عليه .. 

  علشان يغتصبهم ويرجعهم تاني صاغ سليم.

  ولأن البحر بيحب الزيادة , فإنه لا مانع أبداً من استحضار بعض الفتيات المدفوع لهن مسبقاً , 

  لتسخين جو الحفلات ...

  ولا ننسي طبعاً مجهوداته الخيرية العظيمة

  حيث أنه استغل كل ما حباه الله به من مواهي من أجل مناصرة

  الكتايا العربية .. والكهاد في سبيل الله 

  وهناك مثال أخر للأستاذ عربيد نعرفه جميعاً , وهو الواد ( حموءة العبيط ) المدون المشهور جداً ,

  فمنذ أن مد وصلة (دي إس إن) ب25 جنيه في الشهر وهوه (لاجيء) علي مدونته

  والتي تشبه مقالب ( الزبالة ) , ففيها كل ما لذ وطاب من فنون الهجص والتهبيل , 

  ولا أدري من أخبره أن دم ( أمه ) خفيف هو الأخر

  ولا مانع لديه هو الأخر (يعني جات عليه) من كتابة أراءه السديدة .. 

  ( السديدة خالث

  في مختلف نواحي الحياة 

  خاصةً الثقافة والحب والدين وثوابت العقيدة ,

  يناصر حرية الرأي ..
وهيه باختصار الحرية في ان يقول ( هو ) ما يريد

  بينما يكتب علي جانب مدونته ..
كلمات مثل
ممنوع دخول أكياس الزبالة
  هذا بالطبع لأنه يعشق (الزبالة) الغير مكيسة , لأنه يجد نفسه فيها أكثر

  (لسه هايفك بقي ويطلع) 
ممنوع دخول المتخلفين الأصوليين
أما الملحدين ..
فبالأحضان بالأحضان بالأحضاااااان


  وأنصح أي شخص واكل أكلة (مش ولا بد) بدخول مدونته فوراً , 

  لأنه سيفرغ محتويات بطنه (اللي مش ولا بد) مع أول بوست , 

  لذا فوزارة الصحة الشقلوبانية تفكر في توفير كتابه الشهير 

  ( اللؤلؤ النفيس .. في فن التهييس

  في استقبال المستشفيات العامة والخاصة لمثل هذه المواقف.

  حيث ثبت نجاحه بنسبة عالية في علاج التسمم الغذائي

  ولكنه للاسف يصيب بتسمم فكري بعدها. 

  سؤال الحلقة

  مين يقدر يجيبلي مثال علي كل عربيد من دول

  (في دولة شقلوبستان طبعاً)

  اللي يعرف الإجابة ..

  برضه يخليها في سره الله يستركم .. وميقلش لحد عليها

  ولعلمكم بقي مفيش خط ساخن خلاص

  ايوه مفيش خط (موحوح)

  العمر مش بعزقة 

  أي حد عنده أفكار 

  يبعتها علي الميل الرسمي للدولة

shaklobstan@hotmail.com
رابط الموضوع علي مجلة رؤية المصرية