09 أبريل، 2009

الثقافة بين الوسائل والغايات2

إتكلمنا قبل كده عن
الثقافة بين الوسائل والغايات


لكن أنا فضلت إنى اقسمها لعلوم دنيوية وعلوم دينية
رغم إنى فى الأصل مبحبش التقسيمة دى
لأن كل حاجة فى الحياة لازم تبقى لله وتبقى لخدمة دينك

{
قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ}
(162) سورة الأنعام
لكن هنا التقسيم لمجرد التنظيم لا أكثر ..

نبدأ بقى فى موضوعنا
قراءات حضرتك وثقافتك الدينية غاية ولا وسيلة؟
أوضح تانى؟

يا سلام بس كده ..
(بس متاخدش على كده علشان بدأت أتخنق منك بجد)
يعنى حضرتك قرأت فى سير عظماء الإسلام أو فى الفقه أو فى العقيدة
وإتعلمت فى أمور دينك حاجات كثير
عملت بيها إيه بقى؟؟

أوعى تقولى لذة المعرفة ونهم الثقافة ومتعة التعلم والكلام ده
ده عند أمه يا أدهم

الكلام ده ممكن ينفع فى مجالات تانية .. لكن فى الدين أبسليوتلى نو
ركز معايا يا معلم وفكك من أى حاجة فى إيدك
وإنتى يا ماما سيبك من الموبايل .. لالا متشوفيش المسج دلوقت
هوه أنا مش هعرف أسكتكم فى المدونة بتاعتى ولا إيه


بص ياسيدى
ربنا سبحانه وتعالى علمنا إن كل حاجة لازم يبقى ليها هدف ونية
حتى وجودنا فى الحياة لهدف معين .. وهوه عبادته سبحانه وتعالى
{
وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ} (56) سورة الذاريات
والعبادة زى ما عرفها شيخ الإسلام بن تيمية :إسم جامع لكل ما يحبه الله ويرضاه ..
يعنى مش بس صلاة وصوم وزكاة وصدقة بس,
لالالا كل حاجة فى الحياة ممكن تبقى عبادة بالهدف والنية ..
وكلامنا إنهاردة عن الهدف
يعنى لما حضرتك بتقرأ فى الدين عبادة بلا شك .. ولو قرأت بليل ممكن تبقى قيام ليل
لو حضرتك بقى قرأت علشان بس تتعلم وخلاص ومش هتستفيد منه,
فده مش بس مش هينفعك .. لا ده ليه مضار

أول حاجه يا إنك حرمت نفسك من ثواب التعلم وطلب العلم
وده ثواب كبييييير جداً جداً .. كفاية بس إنك هتبقى فى سبيل الله

ثانى حاجة إنك هتضيع وقتك فى حاجة مش مفيدة بل ومضرة زى ما هتعرف كمان شوية
وربنا هيسألك عن وقتك

ثالث حاجة إنك بتكثر عليك الحجة يوم القيامة
يوم القيامة هيبقى جزاؤك أكبر من اللى مقرأش أصلاً ومعرفش إن ده حرام
ربنا عاب على بنى إسرائيل إنهم عندهم العلم وعارفينه ومش بيستخدموه

{مَثَلُ الَّذِينَ حُمِّلُوا التَّوْرَاةَ ثُمَّ لَمْ يَحْمِلُوهَا كَمَثَلِ الْحِمَارِ يَحْمِلُ أَسْفَارًا بِئْسَ مَثَلُ الْقَوْمِ الَّذِينَ كَذَّبُوا بِآيَاتِ اللَّهِ وَاللَّهُ لَا يَهْدِي الْقَوْمَ الظَّالِمِينَ} (5) سورة الجمعة

يعنى مثلاً إنك تبقى حافظ
{
قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ}
(30) سورة النــور
ومش سايب واحدة فى الشارع غير ما تبص عليها ..
(اظبط نفسك بقى عيب)
وإيه يا أختى فائدة إنك تبقى حافظة

{
وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ } (31) سورة النــور

ومع ذلك مش بتغضى بصرك ..
ولابسة حجاب صينى ومش أصلى (ياريته كان تايوانى)؟
إيه فائدة إنك تبقى عارف إن الأغانى حرام ومع ذلك بتسمعها؟
تسهر قدام أفلام مليانة أفكار مسمومة وفاسدة
وده فى نظرى أخطر من وجود العرى والإبتذال وباقى المخالفات التانية ..
وإنت عارف إن ده لا يجوز
إيه فائدة إنك تبقى عارف الإختلاط المحرم ..
ومع ذلك تفضل تختلط إختلاط محرم مع بنات؟
إيه فائدة إنك تبقى عارف سيرة الرسول والصحابة التابعين والسلف الصالح
وإنت بتنهج نهج غربى أو شرقى أو فحلقى؟


زمان كانوا بيرأفوا بحال طالب العلم اللى مبيطبقش الكلام اللى بيتعلمه
وكانوا بيمنعوه من حضور جلسات العلم .. علشان ميزيدوش عليه الحجة

هل تتصور أن النبي صلى الله عليه وسلم الذي غفر الله له ما تقدم من ذنبه وما تأخر، الذي فُطر على التوحيد، الذي عصمه الله جلّ وعلا، هل تتصور أنه كان يدعو الله تبارك وتعالى وكان يعوذ بالله من علم لا ينفع وروى مسلم وغيره من حديث زيد بن أرقم رضي الله عنه أن النبي صلى الله عليه وسلم يقول
(
اللهم إني أعوذ بك من علم لا ينفع

الرسول صلى الله عليه وسلم، هل استعذت أنت بالله من علم لا ينفع؟

طيب إيه هدف العلم بقى يا عم انت بقى؟
بطل زن وجيب من الأخر
شوف يا باشا .. شوفى يا أختى

العلم ليه هدفين
الهدف الأول العمل ..
يعنى لازم تعمل بأى حاجة تتعلمها ,وتبتدى بنفسك وبعدين بكل اللى حواليك
يعنى لو قرأت حديث للنبى صلى الله عليه وسلم تنفذه على طول وتعمل بيه
وزى ما قال و قال يحيى بن أبي كثير :
" العلم يهتف بالعمل فإن أجابه حلّ و إلا ارتحل . "

تانى هدف الخشية
لأن ربنا سبحانه وتعالى قال
{
إِنَّمَا يَخْشَى اللَّهَ مِنْ عِبَادِهِ الْعُلَمَاء إِنَّ اللَّهَ عَزِيزٌ غَفُورٌ} (28) سورة فاطر

والعلم زى ما هوه معروف ليس بكثرة الرواية ... ولكن نور يلقيه الله فى القلب
أو كما قيل العلم الخشية
والدليل على كده من هوه أعلم هذه الأمة؟
أعلم الأمة بلا خلاف سيدنا أبو بكر الصديق ...
ومع ذلك لم يعلم عنه إنه أفتى فى مسائل كثيرة زى سيدنا عبد الله بن مسعود أو عبد الله بن عمر أو بن عباس وده مصداق لكلامى بأن العلم مش بكثرة الرواية ودقة الحفظ.
وربنا يرزقنا وإياكم الخشية


علشان كده العالم لا يكون عالماً إلا بركنى العلم
الخشية والعمل


هننهى بحديث جميل
عن أبي موسي عن النبي صلي الله عليه وسلم قال
ان مثل ما بعثني الله به عز و جل من الهدي و العلم كمثل غيث أصاب أرضا فكانت منها طائفة قبلت الماء فأنبتت الكلأ و العشب الكثير وكان منها أجادب أمسكت الماء فنفع الله بها الناس فشربوا منها وسقوا ورعوا وأصاب طائفة منها أخري انما هي قيعان لا تمسك ماء ولا تنب كلأ فذلك مثل من فقه في دين الله و نفعه بما بعثني الله به فعلم و علم ومثل من لم يرفع بذلك رأسا ولم يقبل هدي الله الذي أرسلت به
( متفق عليه )

عاوز تبقى أنهى نوع؟


الكلام ده بوصى بيه نفسى أولاً ..
فكم من مخوف من الله وهوه لا يخشاه
وأعوذ بالله أن أكون جسراً تعبرون عليه الى الجنة ويلقى به فى النار
لو استفدتوا .. متنسوش أخيكم بدعوة

هناك 58 تعليقًا:

غير معرف يقول...

الله يصلح لك الاحوال ان شاء الله

ويجزيك كل خير

ستيته حسب الله الحمش يقول...

كلام أكثر من رائع ووالله بأسلوب بديع

ربنا يقبله منك بارب ويجعله في موازين الحسنات

ووقع في نفسي آخر الكلام لأنه شبهي قوي
"زمان كانوا بيرأفوا بحال طالب العلم اللى مبيطبقش الكلام اللى بيتعلمه
وكانوا بيمنعوه من حضور جلسات العلم"

كمان الدعاء ده ها أدعيه كتير
فكم من مخوف من الله وهوه لا يخشاه
وأعوذ بالله أن أكون جسراً تعبرون عليه الى الجنة ويلقى به فى النار


بارك الله فيك
ونفعنا واياك بما نسمع ونرى ونعي
واقامنا على صحيح الدين ونهج الرسول صلى الله عليه وسلم
واصلح ما بنفوسنا ونفسك من عوج او اثم من وسوسة الشيطان وهوى النفس
آمين

ebn roshd 777 يقول...

علم بدون عمل؟؟
انا مش عايز اكرر كلامك لكن برايي
ان خير الكلام في هذا المقام هو الدعاء
اللهم لا تجعلنا ممن يقولون مالا يفعلون
وسخر اللهم لنا جوارحنا لنخلص في عبادتك واكفينا يا رب شرور السنتنا
اللهم اني اعوز بك من شر نفسي واعوز بك ان اقترف علي نفسي سوءا او اجره الي مسلم

د/عرفه يقول...

فعلا الموضوع تكملة للموضوع السابق
جميل فعلا دكتور

iBRAHiM sAllAM يقول...

السلام عليكم و رحمة الله ,

بص يا ياسر ,
أنا متفق معاك في كل النقاط تقريبا إلا في نقطة واحدة :
-----------------
زمان كانوا بيرأفوا بحال طالب العلم اللى مبيطبقش الكلام اللى بيتعلمه
وكانوا بيمنعوه من حضور جلسات العلم .. علشان ميزيدوش عليه الحجة
-------------------

أنا ما أظنش إنهم كانوا بيعملوا كده ,
أيام زمااااااااان لما ربنا كان هاديني كنا بنتكلم عن العذر بالجهل ,
فقلت للشيخ طيب ما الواحد يبقى جاهل أحسن , بدل ما يتحاسب على الحاجات الكتير اللي هو هيعرفها ,
يعني هو الواحد غاوي يقيم الحجة على نفسه و خلاص ؟؟
فقال لي أر مش فاكره قوي عن أبي هريرة تقريبا إن واحد قال له حاجة زي كده , إنه خايف يتعلم و يفرط فيما تعلم , فقال له : " كفى بترك العلم تفريطا " ,

كمان إن الواحد مش مخير في مسألة العلم و طلبه , لأنه مأمور بتعلم مسائل فروض الأعيان , يعني لا يعذر فيها بالجهل ,

كما قال مالك رحمه الله :
إن الجهل في الصلاة كالعمد ، والجاهل كالمتعمد لا كالناسي .


و كما قال ابن القيم رحمه الله :
فإن ما لا يعلمه العبد من ذنوبه أكثر مما يعلمه ، ولا ينفعه في عدم المؤاخذة بها جهله إذا كان متمكنا من العلم ، فإنه عاص بترك العلم والعمل


يعني ما أظنش إن حد يمنع حد من حضور مجالس العلم كي لا تزيد عليه الحجة ,


بس خلاص :) ,

و آسف عن الإطالة ,
بس حسيت إن الناس اللي هتقرأ موضوعك و توصل للنقطة دي , هيفضلوا الجهل و يظنوه طريقا لقلة الحساب .

تحيتي

مذكرات مشاغب يقول...

قريت الموضوع الاول كمان
والاتين بصراحه موضوعين مهمين جدا جدا
بس مينفعش باه كل شويه تقعد تقلنا هش وبتاع
احنا في فصل يا عم الحج ولا ايه
هتخلينا نهرب من الفصل بالشكل ده

موضوع مهم جدا والاهم انه يتحول من كلام الى نطبيق عملي
ربنا يقدرنا يا رب.

تحياتي

رئيس التحرير يقول...

أسجل تقدريري لما تكتب...
ولا تعليق...
وأسمع كلام ( مشاغب ) وبلاش تقولهم هش تاني.

MǿиY El-Shreef يقول...

ماشاء الله عليك بجد

انت كده بتفهمنا باسلوب مافهوش اي كلكعه ووصلت بينا (او انا عن نفسي) لاخر سطر بجد

ربنا يتقبل منك ويجعله ف ميزان حسناتك وينفع بيك احنا وغيرنا

تسلم ايدك يا دكتور

mohamed ghalia يقول...

مفيش كلام اضيفه انت قولت كل حاجة
تقريبا كتبت بوست بنفس الفكرة من فترة بعنوان استمتع بحياتك
دمت فى سعادة وربنا يرزقنا حسن العمل

اللؤلؤة يقول...

د/ ياسر
السلام عليكم
بوست أكثر من رائع وكلام يمس القلب ويخترقه
وأعوذ بالله أن أكون جسراً تعبرون عليه الى الجنة ويلقى به فى النار
ولكن لى سؤال
وإنت بتنهج نهج غربى أو شرقى أو فحلقى؟
غربى وعارفه شرقى وعارفه لكن ما معنى فحلقى
أرجو منك تفسير منى هذه الكلمة
بارك الله لك ولنا وجعله فى ميزان حسناتك
دمت بكل الخير

ملكة بحجابى يقول...

جزاك الله خيرا يا دكتور


سلمت يداك

تقبل مرورى
ملكة بحجابى

صفــــــاء يقول...

فتح الله عليك يا باشا
بس يعنى مش بالراحه علينا شويه؟
اللى ينصح حد يبقى بالشخط والنطر كدة

بس برضه أستفدنا ولك دعوات طيبات
سلامى لك
.

ghorBty يقول...

ما شاء الله

ربنا يبارك لك موضوع كالعاده جميل

وعندك حق والله

كتير بقعد افكر واقول لنفسي العلم دا ما لهوش نهايه وطول ما الواحد عايش بيتعلم وبيعرف وخسر كتير اوي اللي عاش عمره كدا بدون ما يسعي ويتعلم وبالذات الدين والشرع علي الاقل الاشياء اللي تخليه يعبد ربنا صح بدون بدع او انحراف وبيصعب علي اكثر اللي بيسعي يتعلم كل حاجه ويعرف في دا ودا وشرع ربه لا يفقه شئ حتي قرءاه القرءان اللي مفروض يتقرا باحكام مش زي الجرايد ربنا يفتح قلوبنا للتعليم ما ينفعنا يوم الحساب ولا نكون ممن قال فيهم

( يَعْلَمُونَ ظَاهِراً مِّنَ الْحَيَوةِ الدُّنْيَا وَهُمْ عَنِ الاَْخِرَةِ هُمْ غَـفِلُونَ )

والعلم يجب ان يتوج بالعمل فما معناه بدون عمل الا انه سوف يكون حجه علينا نسال الله السلامه

بوركتم

والسلام عليكم

موناليزا يقول...

الله ينور عليك
ونِعم التذكرة
أتذكر ان غالبية فهمى للدين كانت من خلال القراءة ومن ثم التطبيق وهذا بفضل الله الذى هدانى اليه وحبب الى القراءة
ايضا هذا الدعاء الرائع اللهم انى اعوذ بك من علم لاينفع
وعاجبنى ايضا قولك بان مانقرأة ونعلمه سيكون حجة يا اما لنا يا اما علينا يوم القيامة
اسأل الله لى ولكم ان يجعلنا ممن يستمعون الى القول فيتبعون احسنه
بالتوفيق دائما وجزاكم الله خيرا على الموضوع

القدر و انا يقول...

الله عليك يا دكتور
بوست رائع
فعلا ايه فائدة ما قرانا وتعلمنا ان لم نعمل به
خشية الله والعمل بتاعليم الاسلام
ربنا يبارك فيك
تقبل مرورى دائما

يــوم جــديد يقول...

تقديري ودعائي

الشموع البيضاء يقول...

الموضوع حلو جدا فى الصميييييم
خاصة بقا فموضوع العالم العامل والعالم الى لا يعمل بما يعرف وطبعا بردو يمشى علينا كطلبة علم او بنحاول نتعلم لان ربنا سبحانه وتعالى قال كبر مقتا عند الله ان تقولوا مالاتعملوا
والاكتر بقاااا ان فى ناس تقرا كتابين او كتاب ونص وتبقا عالمه وعلامة زمانها وبتقول رايها وبتفتى كمان لكل الى حواليها
يارييييييت نتعلم فى دينا ولو نص او ربع السنوات الى قضيناها فى علوم الدنيا فى كلياتنا ومدارسنا

Hossam يقول...

سلام عليكم يا مستر ومضات
ايه الاخبار؟
مدونتك لذيذة اوى وعجبنى الموضوع فعلا واستفدت منه ربنا يديك على اد جهدك اللى تعبته فى عمل البوست ده
بس كان ليا تعليقيين
الاول-موضوع الاختلاط اللى انا شايف انه بدل مش فى اى تطور فى العلاقة قيبقى ده مش حرام وانا عن نفسى اكتر حد مقرب ليا من صحابى بنت ومسيحية كمان ويمكن بقضى وقت معاها اكتر ما بقضى وقت فى بيتى لاننا على طول معبعض وبروحلها البيت وبنقعد انا وهى فى اوضة وحدة ومقفول علينا والباب مش فى ازاز ولا حاجة.وبعيد عن الادب والتربية والاخلاق فى حاجة اسمها الخوف من ربنا اللى بيخلى الواحد لو ادامة مين.ميعملش حاجة غلط.
التعليق التانى-انت دلوقتى بتطلب منى ان اعرف عن دينى حجات واصلا مش فى حد مشجعنى لان ولا مدرسة ولا نظام تعليم بيهتم بالدين وثقافتة وطبعا مش كل واحد باباه الشيخ محمد عبدة او مامته مسز عبلة الكحلاوى.قبل متطلب مننا ده ازرع فينا الاول حب الاستطلاع عن الدين من واحنا فى ال Kids Grade
البوست فعلا رائع بجد
تحياتى واتمنى نكون اصدقاء

الفقيرة إلى الله أم البنات يقول...

فذكر أن الذكرى تنفع المؤمنين
حلو قوى يا ياسر بجد
الاسئله الموجه للنفس دى بتخلى الواحد يشغل تفكيرة ويسأل نفسه ..ولازم نكون صرحاء ...اسوأ شئ الكذب على النفس
بسم الله الرحمن الرحيم
انظر كيف كذبوا على انفسهم وضل عنهم ما كانوا يفترون
الانعام...24


الله عليك بخصوص الاغانى والافلام
والله غير انها حرام..او مرفوضه
بتموت القلب
يعنى الوقت اللى فيه رب العباد قريب مننا لندعوه
قاعدين متنحين لاغنيه ولا لفيلم
طيب بالله عليك بالعقل كده..كلامى للبيتفرج وناسى نفسه
ساعه ذكر فى ميزان حسناتك قد ايه
وساعه فرجه..هتستفيد منها إيه؟
ترويح عن النفس
طيب له سكك كتييره غير مشاهده الضالين المضلين

ربنا يخرجنا منها على خير

ياسر زادك الله علم ونفعك به
امك ام البنات

د. ياسر عمر عبد الفتاح يقول...

غير معرف

ليه التخفي ده بس؟
ربنا يجععلك نصيب من دعائك الجميل

ستيته حسب الله الحمش

ربنا يكرمك يا خالة
وربنا ينفعنا جميعاً بما علمنا

د. ياسر عمر عبد الفتاح يقول...

ebn roshd 777

اللهم ءامين
جزاك الله خيراً على المرور

د/عرفه

ربنا يبارك فيك ويكرمك
وينفعك بعلمك

د. ياسر عمر عبد الفتاح يقول...

iBRAHiM sAllAM

عم إبراهيم اللى عمل رد أطول من البوست نفسه
إيه الرغي ده كله؟؟
هههههههههه

كلامك مظبوط يا هيما
بس أنا أكيد مبقلش الكلام ده علشان الناس تيب طلب العلم والقراية
أنا قصدي إن الواحد يعمل بما يتعلم
وأظنك تعرف إن سيدنا عمر مات دون أن يحفظ القرآن ... لأنه كان بيحفظ الأية ويطبقها الأول
وإن شاء الله هيبقىي ليا بوست تانى عن الكلام ده

د. ياسر عمر عبد الفتاح يقول...

مذكرات مشاغب

مهو علشان المشاغبين أمثالك لازم أعمل كده

منور يا عم
وبعدين خلاص أخر مرة

د. ياسر عمر عبد الفتاح يقول...

رئيس التحرير

أسجل تقديري بمرورك
خلل يا أستاذنا أخر مرة
مكنتش أعرف إن حضرتك هتعدى من هنا

د. ياسر عمر عبد الفتاح يقول...

MǿиY El-Shreef

ربنا يكرمك يا أختي
كلامك شجعني كثير

د. ياسر عمر عبد الفتاح يقول...

mohamed ghalia

أكيد مش زي بتاعي أبداً
إحنا نيجي جنبك إيه بس يا محمد
ربنا يكرمك على المرور والتشجيع

اللؤلؤة

ربنا يكرمك ويبارك فيك
بالنسبة للنهج الفحلقى ..
ده تهريج يعنى
أى كلالالالام
مش حاجة محددة

د. ياسر عمر عبد الفتاح يقول...

ملكة بحجابى

جزانا وإياكِ يا أختي الكريمة
أسمك رااااااائع

د. ياسر عمر عبد الفتاح يقول...

صفــــــاء

هههههه
خلاص أخر مرة شخط ونطر

د. ياسر عمر عبد الفتاح يقول...

ghorBty

تعليق رائع وجميل
جزاكِ الله خيراً يا اختي

موناليزا

مظبوط كلامك وفعلك
ربنا ينفعنا جميعاً بما علمنا

Soul.o0o.Whisper يقول...

ما شاء الله

ربنا يبارك لك يارب

و آسفة على التأخير
بس والله غصب عنى

موضوعك رائع جدا بس يادوب أنا قرأت نصه
لى عودة لقراءته كاملا و التعليق عليه


دمت بود

د. ياسر عمر عبد الفتاح يقول...

القدر و انا

كلامك مظبوط
مرور رائع



يوم جديد

ولكِ المثل

د. ياسر عمر عبد الفتاح يقول...

الشموع البيضاء

كلامك فعلاً مظبوط
العالم زي ما قلتلك يتعرف من الخشية والعمل .. بعد العلم طبعاً

د. ياسر عمر عبد الفتاح يقول...

Hossam

هقولك يا حسام بيك
إنت الأول منورني طبعاً

بس كلامك مش مظبوط بتاتاً
كونك مسلم يبقى معناها إنك أسلمت نفسك لله
لما يقولك إعم حاجة يا حسام يبقى تعمل
{وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ وَمَن يَعْصِ اللَّهَ وَرَسُولَهُ فَقَدْ ضَلَّ ضَلَالًا مُّبِينًا} (36) سورة الأحزاب

فهمتني .. يعنى مش إحنا اللى بنح القواعد
ونقول إيه اللى ينفع وإيه مينفعش
إنت شايف إن ده مش غلط
لكن إنك تصاحب واحدة وتكون كمان مش مسلمة وكمان تدخل بيتها وتقعدوا مع بعض لوحدكم .. ده كله حاجة فيه لوحدها غلط
ولو إنت عندك إستعداد للمناقشة أو عاوز توضيح أكثر لوجة نظري ... أنا معاك يا باشا على طول

أما بالنسبة للنقطة التانية
فأنا معاك إن المجتمع بتاعنا ضد حاجات كثير أوى صح
ومش بيعلمنا دينا ..
لكن يا حسام متنساش إن ثوابك هيبقى أكبر لو قهرت كل الظروف دي .. وبعدين هيه الجنة بالساهل؟
ألا إن سلعة الله غالية .. ألا إن سلعة الله الجنة
وبعدين أفضل من لعن الظلام .. غ،ك تضىء شمعة
أفضل من إننا نقول المجتمع والظروف ونظام التعليم والناس والشارع وأنا وإنته ... نقوم كده نشترى كتاب صغير ونقرأه ونبقى تغلينا علي كل ده
شفت الحل بسيط إزاي؟

إستمتعت جداً بالنقاش معاك
وياريت أشوفك على طول عندي

د. ياسر عمر عبد الفتاح يقول...

الفقيرة إلى الله أم البنات

عندك حق يا أمنا فى كل كلامك والله
إستمتعت جداً وأنا بقرأ ردك
ربنا يعيننا جميعاً على طاعة الله
ونصبر على الطاعة ونصبر عن المعصية

بقالك فترة مزرتنيش على فكرة

د. ياسر عمر عبد الفتاح يقول...

Soul.o0o.Whisper

جزاكِ الله خيراً على المرور
ومستني رأيك كالم بعد ما تخلصي الموضوع

تامر علي يقول...

ممكن يكون الهدف هو التعلم في مراحل معينة وفيها بيكون الإنسان لم ينضج فكرياً بعد وبيكون التحصيل هدفه ... لكن في المراحل المتقدمة في شيء من المعرفة بالله يجب أن تدخل إلى قلب الإنسان وهي الإخلاص الذي إن وجد ينفع الله به العالم والمتعلم وإلا فأي فتنة قد تعصف بالعالم أو المتعلم فتورده الموارد أعاذنا الله وإياكم من الفتن .

موضوع غني بالبروتين :)

جزاك الله خيراً وجعله في ميزان الحسنات

Nour يقول...

السلام عليكم..

ليس العلم بكثرة الرواية ولكن العلم بالخشية"

قال سلمان الفارسى-رضى الله عنه - لحذيفه "يا أخا بنى عبس العلم كثير ، والعمر قصير، فخذ من العلم ما تحتاج فى أمر دينك .."

======

موضوع مكمل لسابقه ..ولكن هنا العلم ليس وسيله للالمام بما يدور بقدر ما هو علم للقلوب لانارة بصيره تنبع عن يقين صادقاً وللانتقال من وراثة الاديان الى اليقين الكمال مع العلم التام لتكون مؤمنا خالصاً..

اللهم أنى اعوذ بك من علم لا ينفع .."

===
جزاك الله خيراً يا دكتور..

أبو العريف يقول...

ازيك يا دكتور
كلامك جميل جدا
وربنا يجعله في ميزان حسناتك

مصطفي ريان يقول...

اتفق معك علم بلا عمل ليس له اي فائدة
تحياتي لك

مصطفي ريان يقول...

طبعا لازم اقولك بارك الله لك وجعله في ميزان حسناتك وحسناتنا

ملكة بحجابى يقول...

الله
ربنا يباركلك
دماغ طول عمرك من اول قراياتى ليك وعرفت ده

ماشاء الله عليك
تقبل مرورى وتحياتى

ملكة بحجابى

ذو النون المصري يقول...

يعني الفكره ان العلم كما يقول البعض بالعاميه :لا يكيل بالبتنجان
لابد للعلم من استخدام و الا نساه صاحبه و لا يجب ان يكون مجرد معلومات نظريه في الراس
يجب ان يتحول الي مخلوق حي بين الناس

ابو المفاصل الواصل يقول...

كيفية معالجة غلطنا
نحــن بلا فخــــر بنعالج الغلط الصغير بغلط كبير
ولا نتعلم من بلاوينـا المتلتلة ونتريق على الحمير
ونتساو ى فى هذا الامر فقط لاغير من الكبير للصغير
وريحة حياتنا اعـــوذ بالله .....وشايفينها عبير
وندارى خيبتنا بمهاجمة الاخرين وشافينها حسن تدبير

معتز شاهين - باحث تربوي يقول...

والله معاك حق
احنا اقمنا الحجة على انفسنا بمعرفتنا لتلك العلوم
ودي مش حجة ان احنا نسيبها ومنتعلمهاش طالما حتجبلنا وجع الدماغ - ده رأي العالم المفلقة - ولكن ده دافع للعمل بما تعلمناه
بوست أكثر من رائع وتأصيل للمشكلة
ومستني رؤيتك في ناحية العلوم الدنيوية.
ويبقى التواصل

د. ياسر عمر عبد الفتاح يقول...

تامر علي

صح كلامك
شرفت يا باشا ونورت

د. ياسر عمر عبد الفتاح يقول...

Nour

جزانا وإياكِ أختي الكريمة

د. ياسر عمر عبد الفتاح يقول...

أبو العريف

إزيك يا معلم
ربنا يكرمك ويبارك فيك

د. ياسر عمر عبد الفتاح يقول...

مصطفي ريان

جزاك الله خيراً يا درش
نورت كعادتك

د. ياسر عمر عبد الفتاح يقول...

ملكة بحجاب

ههههههههه
دماااااااااغ ..!!
ربنا يكرمك ويبارك فيكِ بجد
ويارب دايماً في تواصل

د. ياسر عمر عبد الفتاح يقول...

ذو النون المصري

أيون
هوه العلم لا يكيل بالبتنجااااااان
هوه إنت كده جبت من الأخر

د. ياسر عمر عبد الفتاح يقول...

ابو المفاصل الواصل

حلو تعليقك
معإنه شايفه بعيد عن الموضوع شوية
بس ميضرش
نورت وشرفت

د. ياسر عمر عبد الفتاح يقول...

معتز شاهين - باحث تربوي

رأيك ليه تقدير خاص
وكلامك شرف كبير ليا

Soul.o0o.Whisper يقول...

طيب الاول ادعيلك

ربنا يكرمك يارب و يبارك لك
و يرزقك العمل بما علمت
و يعلمك علم مالك تعلم

بالاضافة للتعليق على البوست اللى فات
و الحديثين اللى قلتهم

ففعلا لازم يكون لنا هدف من العلم
مش بس لمجرد انه متعة
لازم يكون له تطبيق فى حياتنا
و إلا هيرتحل فعلا

و دا بردوا كان موضع نقاش
بين المتعلم و المثقف
فقالوا المتعلم هو اللى بيقرا عشان يكون عنده علم و خلاص
انما المثقف هو اللى بيتعلم عشان يطبق

ربنا يرزقنا جميعا العمل بما علمنا
عشان فعلا حجة ندعو الله ان تكون لنا لا علينا


و هأروح بئا اشوف اصداراتك الاعلامية
:)



دمت بود

بنت أبيها يقول...

منين عايز الناس متكسفكش

ومنين قافل التعليق في البوست الجديد

عامة انا كنت داخلة ادعو حضرتك للتدوين معانا في المدونة الجماعية لمدوني بني سويف

على شخابيط سويفية

ويسعدنا انضمامك معنا


انا اسفة اني كاتبة تعليق خارج اطار التدوينة

لكن مش لاقيت شات بوكس اكتب فيه

ايوشة يقول...

جزااااااااااك الله كل خير يادكتور اسلوب اكتر من رائع لعرض البوست وبطريقة سهلة وومتعة
بس فى العلم الشرعية اعتقد مينفعش اقرا من غير هدف يعنى مش بقرا لانى عندى ملل ومحتاجة حاجة تشغل وقتى وبعج ما اقفل الكتاب ولا افتكر كلمة منه

بنت أبيها يقول...

السلام عليكم

مرحبا بحضرتك معانا في الشخابيط

محتاجين اميل حضرتك للمراسلة

والافضل يكون على الياهو

قمم التميز يقول...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز يقول...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام