05 أبريل، 2009

الثقافة بين الوسائل والغايات


الثقافة بين الوسائل والغايات


إيه يا عم العنوان ده
إيه الكلام الكبير ده ..؟


متشغلوش بالكم ..
أصلى عقبال عندكم ناوى أتكلم عن الثقافة ولازم يبقى العنوان يبقى على مستوى القاعدة
أقعد بقى كده واستهدى بالله علشان تفهم
وأى حد مش هيقعد مش هيبقى على مستوى القاعدة ..
ومش هيفهم

طيب هنقعد بس الله يكرمك بلاش الكلام الكبير المجعلظ ده
يعنى إدينى فى الكلام السلس الشعبى الحلو بتاعنا
من عونيا التونين
ممكن أسأل حضرتك سؤال؟
أكيد طبعاً ممكن .. هوه إنت هترفض ليه يعنى؟
هوه العلم بالنسبة ليك غاية ولا وسيلة؟
(وهنا أقصد العلوم الغير شرعية يعنى اى قراءة فى أى مجال غير الدين)
أوضح شوية .. ؟
ياسلالالالالام بس كده .. ده إنت تؤمر
(بس متاخدش على كده علشان بتخنق بسرعة)

يعنى وإنت بتقرأ كتاب معين فى أى حاجة
هل بتقرأه علشان إنت بتحب تقرأ وتعرف وتتفشخرن قدام أصحابك بإنك
واد فاهم كل حاجة بس مدكن .. وبس
ولا بتقرأه علشان تستفيد منه وتوصل لحاجة تانى بعد القراءة
أظن كده بقى فهمت ..!!
طيب قبل ما سيادتك تجاوب تسمحلى أدلى بدلوى؟
أيون طبعاً هتسمحلى ..
دى المدونة بتاعتى ياعم انت وأعمل اللى أنا عاوزه
طيب أبعد شوية كده علشان دلوى ولمؤاخذة ميطرطرش عليك
سألت ناس كثير من أصحابى القريرة .. العيال الرخمة المثأفة دى
أيون أيون اللى مبروزين عيونهم بنضارات طخنية وظهرهم متنى
وبيقفلوا زرار القميص اللى فوق
واحد منهم بص لفوق للسما .. ويكأن فيه طيارة رش معدية
وبعدين عدل نضارته .. هنا بقى حسيت إنه هيتحول
قلتله أوعى تعملى أي مفأجة
قاللى القرااااااااءة دى فى حد ذاتها متعة كبيرة
والعلم والمعرفة نهم وغاية ولما تبقى عارف حاجات كثير ده فى حد ذاته شىء جميل جداً
ولازم تبقى ملم بمختلف فروع العلم
جمعااااااء جمعااااااااء جمعاااااااااء
(بالثلاثة)
 

واحد تانى قلتله إنت عملت ايه من يوم ما إتخرجت
قاللى بحضر ماجيستير وباخد كورسات ودبلومة مش عارف فين وبثقف نفسى عامةً
قلتله ده شىء جميل جداً .. طيب ليه؟
بصلى بصة غريبة ..
ويكأننى حمار ومش فاهم أى حاجة
(مفيش حاجة بتستخبى فى البلد دى)
وقاللى هوه ده سؤال ... العلم مش محتاج ليه .. أنا بحب العلم
... بحبه يا بابا بحبه ...
واحد ثالث قاللى أنا بدرس وبقرأ وبتثقف علشان أقدر أوصل لمركز كويس فى وظيفتى

ورابع لما سألته إنت بتحب تقرأ ليه؟

قاللى اصلها جميلة جداً ..

هههههههههههههههههههه

وبتضحكنى مووووووت

ههههههههههههههههههههه

بقوله ايه هيه دى ياض؟

قاللى مجلة ميكى ..

هههههههههههههههههه

وبرضه عمال يضحك

(الهى ربنا يشفيك)

قلتله لا أنا قصدى العلم والثقافة

قاللى لا والله دول مش فى مجلة ميكى

طيب بالنسبة ليا أنا بقى شايف إن العلم والثقافة يحتمل الوجهين

(بأكد تانى إن كلامى هنا بعيد عن القراءات الدينية)

يعنى وإنت بتقرأ فى حاجة معينة بتحس بلذة عجيبة ومتعة ما بعدها متعة,

لأنك ببساطة بدات تفهم الحياة وتشوف الدنيا بمنظور مختلف

لكن بصراحة يبقى حرمان كبير جداً إنك متطبقش ده

إيه فائدة صينية البطاطس فى الفرن باللحمة لو مشبعتكش؟

وإيه فايدة البدلة السودة الجديدة اللى فى الدولاب .. لو ملبستهاش؟

لازم علمك تنتفع بيه .. وثقافتك توجهها صح

لكن أنا لا أعيب على أصحاب الرأى الأول

لأن كون الواحد منهم بيساير أخر تطوارت الدنيا ويكون ملم بأنماط الحياة المختلفة فشىء مفيد

كمان هوه كده بيقدم خدمة جليلة لنفسه ..

(مين جليلة دى..؟؟)

ألا وهيه إكسابها لذة وسعادة وراحة وسلام نفسى

يمكن كثير فى الدنيا بيبحثوا عنها فى الحشيش والأفيون والبانجو

أو فى الخمور أو فى علاقات محرمة ومشبوهة

(بطل ضرب بقى يا صايع)

ده رأيى .. إيه رأى سعادتكم
وانتظروا الجزء التانى اللى هتكلم فيه عن الثقافة الشرعية
القراءة فى الدين يعنى


إقعدوا بعافية
Image Hosted by ImageShack.us
الصورة أو اللوجو ده هدية من TiMMy

هناك 38 تعليقًا:

ستيته حسب الله الحمش يقول...

شوف يا عم الضاكتور
انا أقرأ في العلوم غير الشرعية للمتعة فقط

ولسه بتعلم لأني بحب العلم

وبقرأ ميكي والأميرات لأن عقلي على قده وبحب الضحك زي ما بتفرج برضه يوميا على توم وجيري واقهقه كأني بشوفهم لأول مرة

لما بنعمل شيء مش بنقعد نحط أهداف في ورقة وخاصة لو بتتمتع فعلا بالقراءة والثأفة

بس أن ده كله ميطفحش على شخصيتك في الآخر أجباري ده انت ساعتها تكون بتقرأ الكتب بالشقلوب

يعني سواء مسكت الكتاب وانت حاطط غاية أو هو مجرد وسيلة للمتعة في الآخر ها تستفيد وتفيد بكل كلمة أجباري

يعني بذمتك مش تحس ان اسلوبي شبه جيري شوية؟؟؟؟؟؟؟؟؟؟؟

ستيته حسب الله الحمش يقول...

وبعدين الله يبارك فيك ويحيك كبر الخط شوية واعمل مسافات علشان اعرف اضحك على الدلو براحتي
احترم السن "الأجرام" اللي احنا فيه يا ابو موته


الا طلعت مين جليلة؟

د. ياسر عمر عبد الفتاح يقول...

كبرته يا خالة والله
وموضوع المسافات ده خنقنى
بحطها تتشال لوحدها
أعمل ايه بقى؟

أنا معاكى إننا نقرأ للمتعة
ونتعلم ونتثقف .. لكن وبعدين؟
أنا بشوف ناس بحس إنها مكاتب متحركة
صناديق كتب
لكن دوره فى الحياة محدود جداً
وممكن نشيله ونحط مكانه أى حد تانى ميعرفش حاجة .. وبرضه هيأدى نفس الدور
أنا على فكرة برضه لو لقيت عدد من ميكى لازم أقرأه كله

----------
تصدقى فعلاً فيكى شبه من جيرى؟
بس متعرفيش جيرى راح على فين
ولما جيرى .. كان بيجرى من مين؟

جارى البحث عن الست جليلة

MǿиY El-Shreef يقول...

والله يادكتور انا بقرأ طلبا للمتعه لحددلوقتي

وده يمكن عشان انا مضطره اني اقرأ كتب المدرسه ف بدور ع بديل

بس انا الحجات الي بقراها ك متعه صحابي بيشوفوا انها دمها تقيل وكبيره عليا ومش فاهمه ليه

انا بحب القراءه جدا وبقرأ بنهم غير عادي

يمكن لسه مادخلتش ف باب القراءات العلميه

ومعظم قراءاتي ف الادب وكده بس انا حاسه اني بستفيد كتير بردوا

وبالنسبه لاني اعلم غيري من الي اتعلمته

ده شئ اكيد .. انا مش فاكره نص الحديث الي فيه تشبيه للمسلم بالأرض

بس كان افضل الانواع هي الارض الي بتاخد من ماء المطر وترجع تطرح زرع يفيد الناس مره تاني

مستنيين الجزء التاني يادكتور

iBRAHiM sAllAM يقول...

السلام عليكم

أول هام :
ألف مبروك على الاستايل الجديد للمدونة :)

ثاني ( مش هام ) : بالنسبة للعلم و الكلام الكبير ده , بالنسبة لي هو للمتعة و اللإفادة معا ,

يعني أنا مثلا الهدف من الدراسة و الكلام ده بالنسبة لي إني أشتغل و أصرف على نفسي , طيب لو أنا درست مجال بحبه , يبقى هضرب عصفورين بحر ,
إني هحس بالسعادة و المتعة العقلية و أنا باخذ العلم ده ,
و في نفس الوقت هيبقى فيه عائد آخر هو العائد المادي ,

أما بالنسبة للعلوم المجردة غير التطبيقية فأنا لا أحبذها على الإطلاق , و أرى إن اللي بيحشو رأسه بها إنما يُثقل كاهله فحسب ..

بس خلاص :)

فارس عبدالفتاح يقول...

أولا :

فاتتك ثلاث حتات يا بطل

الأولى هي على مستوى القمة وليست القاعدة فالقمة للمثقفين فقط أما القاعدة فهم المتلقي أو المتعلم أو الباحث عن المعرفة أو صاحب الوعي بما يقرأ

الثانية :

انك لم تعرف مصطلح المثقف فلابد من تعريف مصطلح المثقف ومن هو هذا المثقف

والثالثة :

انك وقعت في خطأ وارجوا تقبل هذا النقد وراجع ما أقول وابحث عنه وادرسه جيداً حتى تتبين من نقدي هل هو صحيح أما خاطئ

فأنت تقصد المعرفة وليس المثقف فهناك فرق بين المثقف وبين طالب المعرفة وهنا أيضا فرق بين المعرفة والعلم فالمعرفة هي أن تعرف بعض الشيء عن كل شيء .. أما العلم هي أن تعرف كل شيء عن شيء معين بحد ذاته

وهنا نظرية تقول بعنوان مثل عنوانك ( نظرية المعرفة وارتباطها بالمثقف ) فقد كتبت موضوع طويل في هذا الصدد ولكن لم أجد باحث عن المعرفة أو مثقف حقيقي استطيع أن أتناقش معه في هذا الموضوع فأجبرت أن اقفل هذه المدون وهي كانت في مدونات موقع مكتوب الكويتي ، ما علينا

راجع ما قلت بالبحث عن هذه الأمور وبعدها يتم النقاش يا صديقي الباحث عن المعرفة صاحب الاتجاه الإسلامي

لك التحية والتقدير على مجهودك الملفت ولكن رجاء إذا أردت أن تتكلم عن المثقف والتثقيف والمعرفة والعلم إلى .. الخ

فكتب بطريقة علمية وبطريقة ممنهجه وبلغة عربية اقرب إلى الفصحى

سلام عليكم يا صديقي الكريم

فارس عبد الفتاح ... قومي عربي

mohamed ghalia يقول...

حلو النيو لوك الجديد ده يادكتور
ندخل بقى على الموضوع
بص انت ممكن الإجابات كلها تضربها فى الخلاط وتطلع منها إجابة واحدة
يعنى بقرأ لإنى القراءة فى حد ذاتها
بقرأ لأنها بتزود ثقافتى وفهمى للواقع
بقرأ لأنى أكيد إلى مش بيقرأ مش هيكون عنده ثقافتى لانى زائد ثقافتى الشخصية باخد ثقافة الأخرين من خلال كتابهم
بقرأ لإنى عايز أتعلم
بقرأ عشان أوصل لمركز كويس فى مجالى
وكفاية كده عشان تعبت من كتر القراءة
هههههههههههه
وبعدين أنا قرير كبير ومش عندى نضارة مقعرة ولا حاجة ياعم ههههههههههههه

salma mohamed يقول...

مبروك شكل المدونة الجديد (:
اما كلامك واختيارك للموضوع موفق ومهم جدا,
انا بالنسبه ليا بحب القراءة موت واغلب اوقات فراغي قراءة بكل اشكالها,
لدرجة ان اختي بتتخنق مني وتقولي انتِ طول الوقت لعينك في الشاشة تقرأي او عينك في كتاب برضه بتقرأي,
فالقراءة هي بنزين حياتي
يعني ايه يعني انا معرفش امشي في الدنيا ولا اعيش من غير القراءة,
يعني انا زي العربية كده
فلو العربية بتمولها بنزين ومش بتستخدمه بانها بتمشي بيه تبقى عربية بايظه
فانا لو قرات وماستخدمش ده في حياتي هبقى بايظه ومليش لازمه
من الاخر انا بقرا لان القراءة من اكتر الحاجات اللي بتدخل السرور على قلبي ولا تكتمل سعادتي الا بالاستفادة ومحاولة تطبيق ما قراته.

ايوشة يقول...

مش عارفة انا الايام دى اصلا فقدت متعة القراءة عموما فى اى مجال بس لما بقرا اى شئ بكون انا عايزة اقراه مش لهدف معين يعنى لمجرد المتعة والاستفادة الشخصية بس انا مع ان العلم مش بيتوقف عند حد معين ولازم القراءة تكون شئ مستمر مهو مينفعش الدنيا كلها بتتغير وتتطور واحنا زى مااحنا القراءة هتكون الوسيلة اللى هتربطك بالعالم اللى انت عايش فيه مش نكون عايشين فى عصر ودماغك فى عصور قبله

د/عرفه يقول...

سلام عليكم
ازيك دكترة
ندخل فى الموضوع فعلا زى ما انت قولت
علم بدون تنفيذ وتطبيق لا فائدة منه
زى البخيل اللى بيكنز فلوس ومش بيصرفها هيموت ويسبها

بالنسبة ليا بقى
القراءة مهمة جدا ممكن تكون متعة وربط بالعالم زى ما الناس قالت
بس برضه مهمة علشان اقدر احكم على اللى بيحصل حواليا بشكل مظبوط واقدر افسر اللى بيحصل واستنتج كمان
ياااااه
دى فى حاجات تانية كتير كمان
ده محتاج بوست لوحده يا عم مش هينفع تعليق بس كده
تحياتى دكتور

ebn roshd 777 يقول...

دكتور ياسر
اولا حلو اوي منك انك تراجع نفسك وتراجعنا معاك في الهدف من القراءه والاطلاع وده في حد ذاته جميل جدا
انا شخصيا اقرا لاستمتع واعطي الفرصه لعقلي وكل جوارحي ان تستمتع
اذن استمتع واستفيد لان كل حرف جديد اقراه استفيد منه واشعر بروحي وهي تسمو وتعلو بقدر هذا الحرف
موضوع نوع القراءه ده شخصي بحت
ولو عايز تعرف ايه اللي مفروض علينا من العلوم لازم تقرا كتاب احياء علوم الدين للامام ابو حامد الغزالي
واوعدك ايضا ان تستمتع
دومت بكل الخير والصحه

د. ياسر عمر عبد الفتاح يقول...

MǿиY El-Shreef

جزاكِ الله خيراً على المرور
ورأي محترم
الحديث هيبقى موجود طمن الحلقى القادمة إن شاء الله

iBRAHiM sAllAM

ازيك يا هندزة
عامل إيه؟
ولا بقينا نشوفك خالص
رأيك سديد كعادتك

فارس عبدالفتاح

أستاذنا القومي العربي الكبير
أرجو أنا يكون ردى وصلك

mohamed ghalia

ربنا يكرمك يا محمد
جزاك الله خيراً يا باشا على المرور والتعليق.
ومتقلقش الناضارة جاية جاية
(ربنا يعافيك)

salma mohamed

رد رائع وجميل
ووجهة نظر تحترم


ايوشة

كرم مظبوط جداً
ويارب ترجعى لللقارءة فى أقرب فرصة

د/عرف

طيب خلاص
مستنين البوست ده .. متنفضش بس إنت
نورت وشرفت والله
يارب دايماً على طول موجود معانا

ebn roshd 777

عمنا بن رشد
رجودك بيضفى على البوست طابع مميز
كتاب الإحياء مش محتاج تعريف
وأنا لاحظت وجوده فى قاشمة الكتب المفضلى ليك
أنا قرأت إختصار ليه إسمه مختصر منهاج القاصدين لإبن قدامة المقدسى
وده كان أول كتاب أقرأه تقريباً
ويمكن مخلصتهوش لحد دلوقت لكن دايماً بسح إنه زاد ليا فى أى وقت

موناليزا يقول...

القراءة والمعرفة بالنسبة لى متعة
لا أمِل من القراءة فى جميع المجالات
حتى ميكى:)

رئيس التحرير يقول...

بسم الله الرحمن الرحيم
عزيزي د. ياسووو
السلام عليكم ورحمه الله وبركاته.
مبروك الشكل الجديد للومضات ...خِف الومض شويه علشان العيون ما تقفلش.
------عزيزي ...لقد قرأت لك الكثير ...وتتمتع بخفه ظل وقدره علي اقناع متابعك إنك معه...هل تشعر بأن متابعك معك؟
------أشكرك جدا علي ذكر مدونتي في المدونات المفضله لديك ...بس باين عليك بتحب قرايبك الصعايده قوي !!!
------ موضوعك اليوم مهم ومهم للغايه من زمن بعيد ...قرأت كتاب للعقاد أسمه ( لماذا نقرأ؟)طبعا عندما يتكلم العقاد لابد ان يستمع الجميع ...أتمني ان تبحث عن الكتاب وتقرأه ...
----- كل الحب والتقدير لبلدياتي أبن بني سويف ...

Nour يقول...

القراءة هى رسالة عقل إلى عقول ،وهى خاطر الى خواطر..
فالكتب كالطعام للفكر ومن مزايا الجسد القوى أن ينتقى طعامه من كل الاطعمة..

وكما قال العقاد..لست اهوى القراءة لاكتب .. ولا اهوى القراءة لازداد عمراً فى تقدير الحساب.

ولكن أهوى القراءة لان لدى حياة واحدة فى هذه الدنيا وحياة واحده لا تكفينى ولا تحرك كل ما فى ضميرى من بواعث الحركة..
ـ ـ ـ ـ ـ ـ

واذ كان الهدف من القراءة التعلم فيكفى أن تتعهد أولاً بتعلم نفسك التى بين جنبيك .. فإن سلكنا ذلك النهج سنجد الهدف..ولا ننكر أن زكاة العلم نقل المعرفة المتعلمة..وليس بالضرورة ان يكون الدور ملحوظ فقد يكون فى محيط محدود وإن لم يوجد مجال فيكفى انك انقذت نفسك من غيابات الجهل المظلم..

.....
ولى تعقيب هنا على بعض سطورك فاسمح لى..

"" أنا بشوف ناس بحس إنها مكاتب متحركة
صناديق كتب
لكن دوره فى الحياة محدود جداً
وممكن نشيله ونحط مكانه أى حد تانى ميعرفش حاجة .. وبرضه هيأدى نفس الدور ""

لا يستوى الذين يعلمون والذين لا يعلمون..

...

دمت بخير..

صفـــــاء يقول...

شوف يا دكترة
بأقرأ
لكن مفكرتش ولا مرة انا بقرأ ليه
وأحيانا فى مجالات متخصنيش
ولا ليا دخل بيها
بس برضه ولا مرة سئلت نفسى ليه

كون أننا ننتفع بالقرائات دى
مسئله فيها نظر
يعنى هنستفيد بيها ازاى فى بلد محدش فيها له لازمه اصلا
.

ملكة بحجابى يقول...

نيولوك لذيذ
وبالنسبة للتوبيك بجد يادكتور فكرته عجبانى وغالبا هتلقى المعظم بيأكد انه يابيقرا للثقافة يااما للمتعه واحيانا الثقافة عند الناس هى المتعه فى حد ذاتها



تقبل مرورى
ملكة بحجابى

حسام غانم يقول...

همممممم

الثقافة وسيلة أو غاية ؟


في رأيي إن مش لازم تبقى بتذاكر حاجة محددة عشان هدف محدد

لأ

كل ما قريت أكتر هتبقى إنسان أفضل

وده هيفيدك في حياتك

يعني مثلا انت دلوقتي في صيدلي

ممكن تقول أنا ليه درست في حياتي حاجات زي الدراسات ولا الفلسفة

بس تخيل لو مكنتش درستهم

أكيد هتبقى أقل فكريا من ما انت دلوقتي

ghorBty يقول...

السلام عليكم

اسلوب العرض جميل عجبني جدا

كنت قرأت مقال بعنوان كيف تكون قارئاً عظيماً للكتب ؟

وعجبني جزء يقول فيه الكاتب

:
اعرف: لماذا تقرأ؟ فيجب عليك أن تعرفَ هدفكَ قبل القراءة، والذي بناء عليه تقوم باختيار الكتب التي ترتقي بإدراككَ ومعارفكَ، فهل أنت تقرأ للتسلية والمتعة؟ أو تقرأ للتعلُّم المستمر، الذي يطوِّر من مفاهيمكَ ومعارفك وقدراتك، ونظرتك للحياة والكون، والحكم على الأشياء، وبناء وتكوين شخصيتك الثقافية والقيادية والفكرية التكوين المناسب؛ حتى تكون مؤثِّرًا في محيطكَ والمجتمع من حولكَ؟

:

اذن من يقرا كتب للتسليه والمتعه سوف يقراها لهذا الغرض وبس

واللي عايز يقرا علشان السبب الثاني سوف يفيد نفسه ومن حوله ايضا

وكلنا محتاجين نكون من النوع التاني والله المستعان

وعجبني ايضا قول الكاتب في نهاية مقاله

(عزيزي القارئ.القراءةُ ليستْ هواية كما يظن الكثيرون، ومِن سخف القول أن يجيبَ أحدُهم عندما يُسأل عن هوايته بأن هوايته القراءة، إنها منهج حياة متكامِل وضروري ومهم وحيوي، لمن أراد أن يكونَ مشعل نور وإضاءة، وقائدًا ذا أَثَرٍ في هذه الحياة.) وعنده حق

بوركت

غربتي

hasona يقول...
أزال المؤلف هذا التعليق.
يــوم جــديد يقول...

الموضوع في نيولوك ودلو وحاجات كبيرة أوي
في رأيي الشخصي العلم ماينفعش يكون غاية

1) لأنك هتضيع وقتك وتركيزك في ما لايفيد
يعني مثلا أروح أخد كورس أوتوكاد ليه لو أنا مش هستخدمه ومش هستفيد به ومش مجالي يبقى تضييع وقت على الفاضي

2) جاء في دراسة إحصائية في التنمية البشريةأن تعلم العلم عن طريق الاستفادة من محاضرة معينة مثلا يوزع على أجزاء ثلاثة :
60% تفهمه من المحاضرة (القراءة أو الاستماع)
تصل إلى 70% إذا قمت بكتابتها أو تلخيصها
ويرتفع استيعابك إلى 80% إذا قمت بشرحها لشخص غيرك
ثم تصل إلى 90% إذا قمت بتطبيق ما تعلمته عمليا

إذن فالعلم وحده لا يغني ولايسمن من جوع إذا لم يتوج بتطبيق ولم يتجاوزك إلى غيرك
ولذلك نستخلص من كل الرغي اللي فوق ده إن العلم ماينفعش غاية
طيب ما أنا قلت كده من الأول

جميل الشكل الجديد

أحمد عمر يقول...

اقولك شئ

كنت قرات قبل موضوع لمدونه معانا هنا- مش مع الناس التاننين يعنى ^^-

كانت بتكلم عن (انت مقتنع ولا متكيف" او متكتف ) الاتنين واحد او يعنى بالاصح

وان كان ف اختلاف فلسفى بينهم لكن ما علينا من دا ..

ندخل ف موضوعك ..

احنا الاتنين مع بعض


يعنى اولا تقدر تقول اننا نادرا ما نقرأ رغم اننا "بنرغى" كتير .. للاسف الموازين عندنا مختله "فجل" ثقافتنا من النت و التلفزيون و كنت عاوز اقولك الراديو لكن دا انعدم تقريباً الا من تلات محطات الاف ام لبعض الساده السواقين و كثير من محبى الهيمان بليل و القران الكريم دا لمن رحم ربى و اخيرا الشباب و الرياضه لما الاهلى بيلعب بره

يعنى تقدر تقول نحن شعوب لا نقرأ و اذا قرأنا لا نفهم و اذا فهمنا اسئنا التطبيق

طبعا مش الدنيا سوده اوى كده

بس انا قلت امشى مع الموجه يعنى :D



اشكرك كثيرا و لا حرمنا الله منكم:)

د. ياسر عمر عبد الفتاح يقول...

رئيس التحرير

طبعاً بحس إن معابا
أمال أنا حاطط كرسيين جنب الكمبيوتر ليه؟ هههههه

بس فيه حتة كده مش فاهمها
هوه حضرتك من بنى سويف؟؟

د. ياسر عمر عبد الفتاح يقول...

Nour

كومينت أكثر من رائع
وإضافات ذات مغزى ومعنى

د. ياسر عمر عبد الفتاح يقول...

صفـــــاء

لالالا مالها البلد بس
دى زى الفل

د. ياسر عمر عبد الفتاح يقول...

ملكة بحجابى

كلام مظبوط
والحمد لله إن التوبيك والنيولوك كمان عجبوكي

د. ياسر عمر عبد الفتاح يقول...

حسام غانم

معاك يا باشا والله
كلامك صح الى حد كبير
رغم إنى بكره الدراسات كره جامد
ولو مكنتش درستها مكنتش هتفرق كثير

د. ياسر عمر عبد الفتاح يقول...

ghorBty

جزاكِ الله خيراً على المرور فضلاً عن التعليق
وبعدين كتاب العقاد ده شكله جامد
أنا قريت للعقاد بس مقريتش الكتاب ده
إن شاء الله هجيبه

د. ياسر عمر عبد الفتاح يقول...

يــوم جــديد

وجهة نظر مظبوطة جداً جداً جداً
وأنا بميل للرأى ده بشدة

د. ياسر عمر عبد الفتاح يقول...

أحمد عمر

ربنا يكرمك يا أبو حميد
رأيك مظبوط جداً للأسف
شرفت ونورت

د. ياسر عمر عبد الفتاح يقول...

موناليزا

جزاكِ الله خيراً على المرور والتعليق
وجة نظر محترمة

رئيس التحرير يقول...

أخي د.ياسر
السلام عليكم ورحمه الله وبركاته
( تعليق علي تليقكم ..طرفنا )
الغايه في الروعه متابعتك لي . وبفضل الله وعونه سنواصل سويا . لقد أصبت كبد الحقيقه برمزك...للفضيله بالكعبه ..و قطعت الطريق علي تلبيس إبليس لنا.
----------أما ما تقوله:ـ (لكن هل هيه منقولة من كتاب معين
أم أنها خليط من من عدة قراءات مختلفة؟
وهل ستكتفى بالسرد أم ستحتوى على بعض الحواشى من الشرح والتعليق؟)
أخي الحبيب إنها خليط قراءات عُمر بحاله.
هل هناك شيئ غير واضح يحتاج لحاشيه أو شرح ؟
ثم ما ظنك بي؟ ...إنني أقرأ شرح كلماتي في تعليقات أصدقائى و أسترشد بكلماتهم لنصل للحقيقه.
سؤالك راح تعرف الإجابه عنه في الوقت المناسب.

رئيس التحرير يقول...

هو أنت أبو أسامه؟
دوختنـ ـ ـ ـى!!!
لي عظيم الشرف ...

Mohamed Nagah يقول...

مدونه رائعه

بالتوفيق دائما

_ دعوه خاصه الى زيارة منتدى البيت العربى للتصميم

منتدى اكثر من رائع
http://mohamed-nagah.com/vb/

Soul.o0o.Whisper يقول...

أنا قلت أقرأ البوست دا الاول عشان أتابع التانى بتركيز و افهم
:)

فى حديثين بصراحة دايما حطاهم ادامى و بأخاف منهم اوى
و بافرح بردوا بيهم اوى

"من عمل بما علم ، اتاه الله علم مالم يعلم"
و التانى " اعلموا ما شئتم فلن تؤجروا حتى تعملوا بما علمتم"

دا طبعا غير " ... و عن علمه ماذا عمل به"

و طبعا بردوا العلم ذكرت نكرة فهى تشمل كل انواع العلوم الدينية و الدنيوية


فربنا يرزقنا العمل بما علمنا
و يعلمنا مالم نعلم


و اروح بئا اقرا البوست التانى
:)

دمت بود

علي جاد يقول...

أخى ياسر جميل جدا ما تكتب لكن الأجمل ألا تنسى أن تكتب .. فقد لاحظت أنك من فترة لم تدون أى حاجة لعل المانع خير .. يارب تشوف تعليقى
وتدخل تلف لفة فى مدونتى الجديدة
أهلا بيك ... مستنيك.

قمم التميز يقول...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز يقول...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام