امبارح حصلت حاجة صعبة جداً
مجموعة شباب صغيرين يمكن أعمارهم كلهم أقل من عشرين سنة كانوا في عربية واحد صاحبهم وبدون الدخول فى تفاصيل كثيرة العربية عملت حادثة مروعة ..
شكل العربية بعد الحادثة شبه علبة السردين
السقف مفتوح ومخبوطة من كل حتة ..شكلها إتقلبت أكثر من مرة
كانت النتيجة إن كل الشباب مصابين ومنهم اللى حالته خطيرة جداً
ومنهم شاب صغير عنده 17 سنة مات
{وَجَاءتْ سَكْرَةُ الْمَوْتِ بِالْحَقِّ ذَلِكَ مَا كُنتَ مِنْهُ تَحِيدُ} (19) سورة ق
الشاب ده قبل كام ساعة بس كان معانا فى الدنيا
بياكل .. وبيضحك .. وبيتكلم .. وبيتنفس .. وبيشرب
يمكن كان رايح يتعشي أو يخرج أو أو أو
أكيد كانت عنده خطط لحاجات هيعملها فى فترة الكام يوم الأجازة دول
يمكن كان المفروض هيقابل حد من أصحابه إنهاردة علشان يخرج معاه
أكيد كان بيفكر فى مستقبل كبير جداً بعد التخرج والشغل والجواز والأولاد
{كُلُّ نَفْسٍ ذَائِقَةُ الْمَوْتِ وَنَبْلُوكُم بِالشَّرِّ وَالْخَيْرِ فِتْنَةً وَإِلَيْنَا تُرْجَعُونَ} (35) سورة الأنبياء
لما روحت المستشفي لقيتها مليانة شباب صغيرين وكبار
كله واقف حزين وبيبكي ومتأثر
ياتري لو كنت أنا أو أي حد منهم اللى مكانه ..
هل كان هيبقي عندي إستعداد لمقابلة ربنا؟
{وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَى أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ}(10) سورة المنافقون
هوه إحنا ليه بننسي إننا هنموت ..؟؟
أيوه كلنا هنموت وهنندفن وهنتسأل ...
{قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ ثُمَّ تُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُم بِمَا كُنتُمْ تَعْمَلُونَ} (8) سورة الجمعة
ليه فكرتنا عن الموت دايماً مستشفي ومرض فى أخر العمر
وأولادنا حوالينا وكل أحلامنا تكون إتحققت
مع إن كل يوم ناس بتموت فجأة .. وشباب بتموت
واحد هيقولي ده كلام كلنا عارفينه
كلنا هنموت ومحدش عارف هيموت إمتي
هيه فعلاً حقيقة مجردة ..
وأنا مش جاي أقول كلام جديد
أنا بس بقول كلام كلنا بنتجاهله أو بنتناساه
{كُلُّ نَفْسٍ ذَائِقَةُ الْمَوْتِ ثُمَّ إِلَيْنَا تُرْجَعُونَ} (57) سورة العنكبوت
مش باقي غير كلمة واحدة بس
مش لازم نفكر فى الموت وبس
لكن لازم نفكر فيما بعد الموت
{كُلُّ نَفْسٍ ذَآئِقَةُ الْمَوْتِ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ فَمَن زُحْزِحَ عَنِ النَّارِ وَأُدْخِلَ الْجَنَّةَفَقَدْ فَازَ وَما الْحَيَاةُ الدُّنْيَا إِلاَّ مَتَاعُ الْغُرُورِ} (185) سورة آل عمران
أنا عارف إن البوست ممكن يبقي دمه تقيل شوية وحزين
بس دي شوية خواطر جاتلي وقلا أذكركم بالموت
عن أبي هريرة رضي الله عنه قال:
قال رسول الله صلى الله عليه وسلم :
«أكثروا ذكر هادم اللذات»،
يعني الموت.
هناك 35 تعليقًا:
د.ياسر
انا لسه قادمه حالا من المقابر
بداخلى كل ما تحدثت عنه واكثر
بعد ان ذهبت صديقتى الى ربها فى غمضة عين الشهر الماضى
ومن يومها وانا ازور قبرها كل خميس لاقرأ القران واتعظ بزيارة القبور
رحم الله الجميع رحمة واسعة وهدانا واياكم وشباب المسلمين الى حسن الخاتمة
السلام عليكم ,
بصراحة مش عارف أقول لك إيه يا ياسر ,
رغم إن الواحد مخنوق من الحياة ,
إلا إن الموت برضه يظل مخيفا كلما تذكرته ,
ربنا يرزقنا حسن الخاتمة ,
و يرزقنا الجنة و يجرنا من النار ...
اللهم ارزقنا حسن الخاتمه والثبات عند السؤال
ربنا يرحم الشاب الي مات ويصبر اهله
جزاك الله خير يا دكتور
دكتور ياسر
البوست مش دمه تقيل ولا حاجة دا شئ لازم كلنا نتذكرة وما يروحش عن بالنا ابدا
الموت هوه هادم اللذات ومفرق الجماعات
ياربي سبحان الله تخيل قد ايه خبر صعب شاب لسا في بداية حياته اكيد افكارة كلها مليئة بالطموحات والرغبة في تحقيق كل شئ يسعده في المستقبل
من تخرج و شغل ومناصب من جواز وحب واولاد
وفجأة تيجي ساعة الموت خلاص مافيش تقديم ولا تاخير
نفذ امر ربنا وانقضى الامر
يارب يارب يارب احسن خاتمتنا يارب امتنا على الاسلام اغفر لنا ذنوبنا
جزاك الله كل خير اخي وتقبل خالص تحياتي
اللهم انى اعوذ بك من عذاب الموت
ربنا يكرمك على هذه التذكرة
فنحن نحتاجها من فترة لاخرى
ربنا يرحمنا اذا صرنا الى ما صار اليه هذا الشاب
وربنا يصبر امه وابوه ويراضيهما
قصة متكررة ومع هذا مؤلمة في كل مرة الواحد يسمعها
تحياتي
احسن الله عزائكم و غفر الله لنا و لكم ..
دائما ما يحصد الموت من بينا احدهم ع فجأه و بدون مقدمات و كان القدر يمهلنا بعض الوقت لا لنتوقف بل لنلحق بمن سبقنا ..
الموت و الحياة يتسابق بينهما نفس داخل و اخر خارج ..
اللهم احسن الينا و ثبتنا ع طاعتك و اغفر لنا ذنوبنا و تجاوز عن خطايانا و جميع المسلمين الاحياء منهم و الاموات
انا فكرت في الموضوع ده كتير جدا
بالذات لما اسمع عن حد صغير انه مات
فبحس اني فعلا ممكن اموت في اي وقت
وبتهيالي ناس كتير فكرت زيك وزيي كده
ربنا يرحمنا ويغفرلنا ويهدينا
تحياتي
السلام عليكم ..
ربنا يرحمنا ويرحم موتى المسلمين فالرحمة ليست على الاموات فقط...
فالموت هو الحقيقة المطلقة التى لا تحتمل تبديل ولا تغير...
وقيل " الموت يمثل تناقض فى نفس البشرية لانه يصعب على النفس الحية أن تدرك بنقيض الحياة ومهما حاول أن يدفن تلك الحقيقه الكامنه فى اعماقه وينساها تظل تبرز له باشكال مختلفة ليس أقلها وضوحاً أنه يرى موت يصيب الكثيرين من حوله..
واغرب ما فى الانسان أنه لا يدرى ما يريد من حياته وانه يعلم فى اعماقه أن حياته محددة زمنياً وان الموت يقترب باستمرار ، والواجب أن يكون ذلك مدعاه لوضوح هدفه فى الحياة ولكن الامر على العكس"
نسال الله الهداية لنا وللجميع وحسن الخاتمة...
دمت بخير ..
السلام عليكم و رحمة الله و بركاته
أخى الدكتور ياسر
جزاك الله خيرا أخى الكريم على إحياءك هذه السنة ... التذكير بالموت..
ياااااه .. معك حق كلنا يعرف لكن كلنا نتجاهل..
البعض يعتقد أننا لو عشنا هذه الدنيا و الموت نصب أعيينا أن حياتنا ستكون حينئذ تعيسة ... لا و الله.. وقتها ستكون الدنيا فعلا جنة .. لا ظلم لا قتل لا غش لا كذب ...
أسأل الله أن يثبتى و إياك عند السؤال و عند الحشر و عند الموقف بين يدى الله ... ياله من يوم..يوم يفر المرء من أخيه و أمه و أبيه و صاحبته و بنيه....
بارك الله فيك
انا لله وانا اليه راجعون
لله ما اعطى ولله ما اخذ
يقول الرسول "عليكم بذكر هازم اللذات"
او كما قال
نسأل الله ان يحسن ختامنا جميعا.
كما اسأل الله ان يجعل هذا الموضوع فى ميزان حسناتك وجزاكم الله خيرا
د/ ياسر
السلام عليكم
أسعدنى جدا مرورك الطيب
أما عن الموت فيقول الله تعالى :-
{قُلْ يَتَوَفَّاكُم مَّلَكُ الْمَوْتِ الَّذِي وُكِّلَ بِكُمْ ثُمَّ إِلَى رَبِّكُمْ تُرْجَعُونَ} (11) سورة السجدة
صدق الله العظيم
فلا بد لنا أن نضع الموت نصب أعيننا ونتعامل فى حياتنا على أن الموت يأتى فجأة
دمت بكل الخير
بسم الله الرحمن الرحيم
دكتور...
السلام عليكم ورحمه الله وبركاته
ما بيننا ليس بدايه ونهايه ...ما بيننا متصل الي ما لا نهايه.النهايه في الدنيا و آخرها الموت و البدايه في الآخره اولها الموت . الموت واعظ الا من متعظ؟
===انت ما بتفتحش الماسنجر بتاعك ولا ايه؟ اما بفتح كل يوم علشان تسأل عليا واتاريك بتتقال .
السلام عليكم
وكفي بالموت واعظ ..
:
ربنا يرحم جميل المسلمين ويرحمنا اذا ما صرنا اٍلي ما صاروا اٍليه
:
جزاك الله خيرا علي التذكره .. (وذكر فاٍن الذكري تنفع المؤمنين )
السلام عليكم ورحمة الله وبركاته....
الله يرحم موتانا وموتى المسلمين ..
ويحسن ختمتنا ..
....
الموضوع جدا مهم ...
جزيت خيرا على التذكير ..
...
في أمان الله..
الموت ...
القضيه التي سلم بها الجميع.
واجمعت عليها كل الملل.
ولم يعمل حسابها غير القليل.
لو تذكرناه ...
لأصبحت الأحوال احسن من الحال.
الموت هو الحقيقة الوحيدة التي يصدقها الانسان على العالم كله إلا نفسه
وده اسمه طول الأمل ...عافانا الله واياكم منه وجعلنا ممن يحكمون الراحلة ويكثرون الزاد للآخرة
تحياتي :)
القدر و انا
البقاء
لله يرحمنا إذا ما صرنا إلي ما صاروا إليه
القدر و انا
البقاء
لله يرحمنا إذا ما صرنا إلي ما صاروا إليه
iBRAHiM sAllAM
والله كلنا ذاك المخنوق
لكم الموت برضه ليه هيبته
ربنا يرحمنا جميعاً
MǿиY El-Shreef
امين
وإياكِ ..
fnoonh
عندك حق فى كل كلمة
ربنا يكرمك
موناليزا
جزاكِ الله خيرً
شكراً على المرور والتعليق
ستيته حسب الله الحمش
قعلاً قصة بنسمعها كثير
لكن هل من مدكر؟
أحمد عمر
كرمك مظبوط جداً
وربنا يرزقنا بحسن الخاتمة
مذكرات مشاغب
يارب نفضل فاكرين الموت على طول
بس بطريقة إيجابية
ربنا يزقني وإياك حسن الخاتمة
Nour
كلمتين فى الصميم
فعلاً إحنا عمرنا دنيانا وخربنا أخرانا
علشان كده مش عاوزين ننتقل من العمار للخراب
dr aly khamis
دكتورنا العزيز
مرورك أسعدنا
وكلماتك رائعة ومؤلمة
مسدس صغير
اللهم أمين
ولك المثل
شرفت
اللؤلؤة
كلامك مظبوط جداً
وربنا يزقنا جميعاً الثبات حتي الممات
رئيس التحرير
أسأل الله أن يجمعني وإياك فى ظل عرشه يوم لا ظل ظله , وفي الفردوس الأعلي مع سيد المرسلين سيدنا محمد صلى الله عليه وسلم.
الماسنجر مفتوح على طول إن شاء الله
ghorBty
اللهم أمين
دمتِ بخير يا اختي
نهــــــــــار
اللهم آمين
جزاكِ الله خيراً
هــو..مش ..نـو
عندك حق
بس إنت فين من زمان
ولا بنشفك ولا بنسمعلك حس
تامر علي
اللهم آمين
مرورك وثنائك شرف كبير ليا بجد
إرسال تعليق