27 يونيو، 2009

رسائل سريعة مريعة

السلام عليكم ورحمة الله وبركاته
ازيكم يا جماعة
عاملين إيه كلكم؟
يارب تكونوا كويسين
دي شوية رسائل سريعة  في مواضيع مختلفة
عاملة زي أهم الأنباء كده ,, ربنا يستر
.
.
1- لكل الناس اللي دعيتلي وسألت ليا .. ربنا يكرمكم بجد
الحمد لله خصلت إمتحانات يوم الخميس ,,
بعد فترة إمتحانات مبقتش عارف أحسب هيه استمرت قد إيه
وكمان بفضل اله سبحانه وتعالي حليت كويس في الإمتحانات
.
2-واجب عزاء لأمنا أم البنات لوفاة والدها
أحسن الله عزائك ,, إن لله ما أخذ وله ما أعطي وكل شيءٍ عنده إلي أجل مسميً
فلتصبري ولتحتسبي
أنا عارف إنها متأخرة شوية ,, ياريت حضرتك تعذريني
.
3- بشكر كل الناس اللي رشحتني للحصول علي المركز الأول في استفتاء الشهر الأول
واختياركم ده حقيقي أسعدني جداً جداً جداً
ده أنا حتي ازبهليت لما لقيت نفسي في القايمة بس ,, مش مركز أول كمان ..!!
وبدعو كل الناس للتفاعل مع المدونة ,, والترشيح كل أسبوع
دي حاجة بتخلق جو جميل من التنافس وبتخلي للتدوين طعم تاني
.
4- شايف موضة كده غريبة شوية ,, كل الناس بتغيب عن التدوين
وأنا مش فاهم ليه حقيقي ,, يعني إيه نغيب عن مدوناتنا
وأنا من مدونتني بعلنها صراحةً
إني ناوي أغيب أنا كمان :)
أنا كنت مقصر معاكم في الفترة اللي فاتت
والجديد بقي إني ناوي كمان أقصر الفترة الجاية
.
أنا حاسس إني عاوز أعمل ريستارت لنفسي ,,
وعلي رأي عمدة التدوين الزعيمة المناضلة (خالتي ستيتة)
أنا بعاني من أعرض الإنسحاب من الإمتحانات
.
.
محدش يزعل مني ,, حقيقي غصب عني
أشوفكم علي خير إن شاء الله
مش هطول كلها أيام وهاجي تاني واقعد علي قلبكم
هتروحوا مني فين يعني؟

هناك 74 تعليقًا:

رؤية يقول...

لام البنات.... البقاء لله وانا لله وانا اليه راجعون
ولك اقول...
بالتوفيق وربنا معاك

تحياتى

غير معرف يقول...

حمد لله عى السلامة يابطل
الحمد لله ان الامتحانات خلصت
بالتوفيق والنجاح يارب
كان نفسى اول تعليق لكن ملحقتش
علشان تعرف انى كنت قاعدة على باب المدونة
وبعدين انت رجعت علشان تبعد تانى
عموما يابنى لك ان تاخذ هدنة راحة وانا عارفة
انك مش حتطول
تحياتى والله الموفق

Unknown يقول...

ربنا يوفقك ياصيدلى
وتنجح وتخلص الكلية
والماجستير والدكتوراة
كمااااااااااااااااان

Unknown يقول...

بس بقولك ايه وانت راجع
من الريسترات بتاعتك دى
هات لنا كيس (ريستراررت على ذوقك )
يعنى لبان شوكلاتة بونبونننننننننن
كل اللى تيجيبه كويس احنا متواضعين
وراضيييييييييييييييين بالقلييييييييل

Unknown يقول...

تروح وترجع أحسن
من الاول ياصيدلى:)

ديالا يقول...

ليه كده بس يادكتور

علي العموم تروح وترجعلنا بالف سلامه

مبروك علي الترشيح

MǿиY El-Shreef يقول...

ايه ده بقى احنا فينا من ده

لا مش مسموح

خلصت امتحنات اخيرا تغيب ليه بقى

انا معترضه

GiGi world يقول...

ربنا يباركلك ويعزك يارب تقبل وافر تحياتى

غير معرف يقول...

يعني مش فارقة
امتحانات اجازة النتيجة واحدة

ما تعمل ريستارت هنا
ولا هنا كخة
اية حركات الدكاترة دي

Darsh Basha يقول...

يادكتوووووووووووووووووووور
لا دا انا كنت بجرب حرف الواو بس

اولا ..حمد لله على سلامتك من الامتحانات ..ووجع القلب دة
ومبرووووووك للمركز الاول فى المدونات
انت تستحقها بجدارة

ومتغبش علينا ..ياعم..مستنينك

سلااااااااااااااام

الشعب لابد له من حكومه تشكمه يقول...

اهو ده اللى عمرى مبفهمه تلاقى الاخوه والاخوات المدونين وقت الامتحانات لاجئين فى مدوناتهم بدل الكتب والمذاكره واول ميخلصوا امتحانات يعينى يتشغلوا ويسيبوا المدونات:))
حتى انت يابروتس:(
متتأخرش بأه اوعى تكون رايح تجيب طابع بوسته انت كمان:))؟

أحمد سعيد بسيوني يقول...

ياريت

ماتتاخرش علينا

اتابع من على بعد

mohamed ghalia يقول...

ترجعلنا بالسلامة

Sweet Violet يقول...

يعنى الناس بتاخد الاجازة علشان ترجع
وانت بتاخد الاجازة علشان تروح !!!
عموما ترجع بالسلامة
بس بلاش تاخير بقى
^_^

أبو العريف يقول...

ايه يا دكتور
اولا مبروك
انت مدونتك بجد جميله وتستاهل
وانا لو رشحت كنت هرشحها

بس ايه تغيب دي

ايه يا عم الحج
دا انا بعتبر المدونه حاجه بتعمل للواحد ريفريش
لو هنج

ما تغيبش يا ريس

تحياتي

عمرو جويلى يقول...

السلام عليكم
حمداً لله على سلامتك وبالتوفيق إن شاء الله وأجازة سعيدة ومليون مبروك حصولك على المركز الأول
دمت فى حفظ الله ورعايته

ستيتة يقول...

متتأخرش فاهم
ستب ويندوز جديدة
وحط انتي فيروس
واعمل ريستارت سريع

وعندا فيك
انا كمان الأسبوع الجاي ان شاء الله ها افلسع اعمل ريستارت
بس
هه

ترجع بالسلامة

بنجاواتى يقول...

ايه يا ريس ده يا ريس

لما انت كمان تغيب يبقى ايه اللى فاضل بقى

عموما انت اللى حكمت انهم يومين او تلاتة ولو زادوا عن كده انت حر

تحياتى

حياتى نغم يقول...

السلام عليكم / بداية إنا لله وإنا إليه راجعون .
ثانياً خذ راحتك وفسحتك وعد لنا بألف خير بإذن الله .

غير معرف يقول...

الف ميروك الاجازة يا دكتور

وعندك حق ان الواحد بيطلع من الامتحانات عنده حالة عجيبة من ال &^%^&)()&%^$%^&*&^^%%&^%#@^#@

عشان كده لازم ناخد فترة استجمام ونقاهه

حلوة نقاهه دي ههههههههه

ربنا يوفقك وترجع لنا بالسلامة ان شاء الله

مجرد مدونة يقول...

معلش يا دكتور انا عارف انى مقصر معاك
ربنا يكرمك ويوفقك

د/على خميس يقول...

السلام عليكم ورحمة الله و بركاته
دكترة
رايح فين يا عم ... ده انا كنت لسه هخلع ... و بعدين كده الصيادلة هينضربوا فى سوق التدوين .. سول و بعدين انت و بعدين انا ....

على العموم مدونتك تستاهل فعلا لأنها جميلة ..

و مبروك الحل الكويس فى الإمتحانات و لينا الحلاوة بعد النجاح ان شاء الله ..
و ريستارد موفق و سعيد
بارك الله فيك يا دكتوووووووووووور
تقبل تحياتى

MaNoOoSh يقول...

طيب اعمل ريستارت براحتك

بس متطولش بقى

يللا سلام الوقتى

اصل انا كمان كنت عاملة ريستارت ويظهر هنجت تانى وهعمل ريستارت جديدة
هههههههههههههه

مشخبطاتي يقول...

السلام عليكم..

حمداًً لله على السلامة يادكتور ومنتظرين تواجدك للتدوين والإبداع..

تقبل مرورى

Hossam يقول...

صديقى د.ياسر عبد الفتاح
اول مرة احب اهم الانباء
بجد جميلة اوى طبعا البقاء لله
والف مبروك على الاستفتاء وربنا يوفقك فى النتيجة والحمد لله انك خلصت على خير
تحياتى صديقى
سلام

رابطة هويتي اسلامية يقول...

بالتوفيق ان شاء الله
وتعود لعالم التدوين بافضل حال قريبا باذن الله

ندعوكم لزياره الرابطه حال عودتكم

محمد سعد القويري يقول...

الأخ الفاضل :: د.ياسر عمر عبدالفتاح

أسأل الله لك مزيدًا من التألق والنجاح

وغفر الله لميتكم وأسكنه فسيح جنانه

بانتظار إبداعاتك

صفــــاء يقول...

حلوة رؤس الاخبار دى
ومبروك عليك الترشيحات

ومتتاخرش بقى ... حكم انت عارف ان المدونات دى عامله زى الأدمان
بالسلامه ان شاء الله يا دكتور

بولا حلمي يقول...

البقاء لله لام البنات
.. و الحمد لله انك عديت امتحاناتك ع خير
ومبروك انك احتليت المركز الأول

..... و متغبش كتير :)
سلااااااااااااااااااااااااااامي ليك:)

The illusionist يقول...

ياااااااااااااااه
دكتور ياسر
واحشنى اوى والله
الافتتاح مكنش ليه اى طعم من غيرك عندى
والله واحشنى وكويس انك خلصت الامتحانات على خير
واحشنى جدا جدا جدا والله
وبصبح عليك وبقولك خد اى حاجه عشان اعراض الامتحانات بسرعه
مستنيييك

موناليزا يقول...

تيجى بالسلامة ان شاء الله:)
ويارب تكون اجازة سعيدة

جلال كمال الجربانى يقول...

السلام عليكم

الحمد لله إنك جاوبت كويس
ونتمنى لك التوفيق والنجاح
وهى موضه فعلاً وحتعدى
ووحشتنا
وأجازه سعيده

ودمت بخير

Unknown يقول...

مستنيين رجوعك يادوك
أيوه سريع سريع كده تعمل لاندنج في مطار التدوين أو حنخليك تعمل هبوط اضطراري

ويبقى التواصل

ghorBty يقول...

السلامـ عليكمـ

ربنا معاك ان شاء الله وترجع بكل نشاط كما تعهدناك

يسر الله امرك

سما أحمد يقول...

كتير حلوة الرسائل وعالهدف على طووووووول
تسلم وان شاء الله بنرشح لانه كتير حلوة الفكرة تبع الترشيح
نتمنى لك عودة سريعه متألقة كما عهدناك

Ahmed Othman يقول...

نبتعد كثيرا
و نعتاد التأخير

هكذا تواجهنا الظروف دوما

المهم
ان يعيدنا الشوق للتدوين

تحياتي

المتبهدلون في الأرض يقول...

كفارة

Lola يقول...

بالتوفيق يا دكتور..
ربنا يوفقك ..تتخطى الظروف.. تلاقى وقت عشان تبقى هنا..
سعات كتير يتحول التدوين فى لحظات الزحمة والإنشغال لعبء
لأن المسأله فعلا ليست هينه
تتطلب الكثير من المجهود للتنسيق والإعداد لما سوف يكتب وينشر..
لكن تخيل وسط كل زحام الحياه
ينتابنى احساس عميق اننا عندما ندخل لهذا العالم نتحرر من لزوجه الواقع وبلاده الأحداث..
وتجتمع اقلام رائعه..
واشخاص يفرحك جدا سؤالهم
واستفقادهم..
وتتنبه انه عالم افتراضى يجمع من الجمال كثيرا ما ينقص العالم الحقيقى.. الذى نغرق في زحمته فنبتعد عن هنا..
لأول مره ايضا اصل لهنا عن طريق مدونات صديقه..
لا يمنع ان اقول لك.. لا تغب كثيرا عن احباءك.

بالتوفيق يا دكتور.


لولا

حفيدة عرابى يقول...

كده الريستارت طول اوى يا دكتور
حد يسيب بيته كل ده برده
انا عن نفسى اتمنى انزل ويندوز جديد

ضحكات الحياة يقول...

السلام عليكم

أسف على التأخير بس تروح و ترجع لينا بالسلامة يا دكتور

و احنا كلنا فعلا مقصرين فى المدونات بتاعتنا بس تقول ايه الامتحانات بقي ربنا يعفينا يا رب

و أتمنى العودة قريبا ان شاء الله

ابو المفاصل الواصل يقول...

النت
كانما خلق النــــــــــــــــت لدول العالم التالت
لفضح مخازيه وتخلفه واحـــواله وما الــت
المتمسك بجهله المعادى للعلوم وما قالـــــت
المحب للدماء !وغير مهم ليه اريقت وسالت
ولا يستوعب اى دروس وعبر اتقالــــــــــت
وجه النت وجات معاه الحقيقة اللى زالــــــت
وابتدأ الناس تفهم والمعلومات توالــــــــــــت
=========

غير معرف يقول...

http://gigiandworld.blogspot.com/2009/07/blog-post_05.html
ياريت تشاركنا وتسيب ايميكل حضرتك عندنا اذا حبي طبعا
علشان تشاركنا فى المدونه اللى عملناها علشان دكتوره مروه الشربينى

دي المدونه الجديده
http://marwa-elsherbiny.blogspot.com/
جيجي والعالم

Soul.o0o.Whisper يقول...

السلام عليكم و رحمة الله و بركاته

أولا يا دكتور كفارة و عقبال ما نطمن عليك فى النتيجة ان شاء الله

ثانيا " شايف موضة كده غريبة شوية ,, كل الناس بتغيب عن التدوين
وأنا مش فاهم ليه حقيقي ,, يعني إيه نغيب عن مدوناتنا
وأنا من مدونتني بعلنها صراحةً
إني ناوي أغيب أنا كمان :)
أنا كنت مقصر معاكم في الفترة اللي فاتت
والجديد بقي إني ناوي كمان أقصر الفترة الجاية"

ايوا والله نفسى انا كمان
مش عارفة الفترة دى مالها
يمكن عشان الحر ؟؟

انا نفسى اختفىىىىىىىىىىىىىىىىىىى
عن الدنيا دى كلهااااااااااا
حتى من نفسى والله

ربنا يعفو عنا جميعا

دى بئا اعراض الانساحاب من الصيدلية و ان شاء الله استلام التكليف عن قريب ...ياااااااااامسهل



ترجع بالسلامة ان شاء الله

دمت بود

أم أحمد المصرية يقول...

مبروك الاجازة و عقبال ما نبارك علي النجاح يلا بقي منتظرين جديدك لا تتأخر

♥نبع الغرام♥♪≈ يقول...

السلام عليكم

معلهش جيت متأخره بس بجد غصب عنى

كنت مسافره ولسه راجعه

مبروك الاجازة عليك

وان شاء الله نبارك فى النتيجه

تحياتى
انوسه

Hossam يقول...

صديقى وحبيب قلبى د/ياسر
وحشتنى جدا
الحمد لله انك خلصت امتحناتك ربنا يكرمك يا رب فى النتيجة وحتوحشنى جدا الايام اللى هتغيب فيها
تحياتى صديقى

Kiara يقول...

حلوه المسجات دي :)

تامر علي يقول...

أولاً مبروك على انك خلصت الامتحانات وكمان على انك اخدت المركز الأول وكمان على انك اخدت الأجازه .... وعقبال ما نبارك على الحصول على المرتبة :)

تحياتي :)

ن يقول...

السلام عليكم
انت فين يا زينة الشباب بجد قلقت عليك اتمنى ان تكون بخير وتعود لنا بروحك المرحة
مع خالص تحياتى

غير معرف يقول...

كده انا بدات اقلق
الغيبة طولت خالص ونفتقدك كثير
اتمنا العودة او على الاقل تكتب
حاجة اطمن بيها عليك حتى لو عندى فى المدونة
لكن هذا الاختفاء الطويل يقلق
دعواتى

TIMMY !! يقول...

إيه ياض فينك ؟؟

انت عملت لنفسك ريستارت و لا شديت الفيشة خالص :) ؟؟

オラアルス يقول...

وعليكم السلام ورحمة الله وبركاته

على حظي النحيس صادف دخولي لأقرأ موجزا وتأديةواجب وليس ومضات ..لكن المدونة بحق ماشاءالله رائعة رائعة
لكن شدّ انتباهي تلك السطور:
"- شايف موضة كده غريبة شوية ,, كل الناس بتغيب عن التدوين
وأنا مش فاهم ليه حقيقي ,, يعني إيه نغيب عن مدوناتنا
وأنا من مدونتني بعلنها صراحةً
إني ناوي أغيب أنا كمان :)"
هي ليست موصة بقدر ماهي ظروف تجبر المدونـ/نة على ترك التدوين وعلى رأس الظروف والرسائل عطل الجهاز أو الإنشغال بأمور الحياة العويصة .

أخيرا تقبل إطلالتي الأولى على مدونتك الطيبة
قد ندمت إني لم أدل عليها من الأول.
كل التقدير لنبض فكرك الواعي ويراعك الراقي

الازهرى يقول...

يا عمنا عيب زى ما انت عايز
المهم
يفضل الامل انك راجع لنا من تانى

تحياتى دوما

حارة سد يقول...

أما بالنسبة للرسالة الأولى..فحمدا لله على عودتك الحميدة والموفقة

والرسالة الثانية فالبقاء لله وحده..جميل أن نشاطر أحزان الناس ليشاطرونا أفراحنا وأحزاننا

والرسالة الثالثة لا اعلم عن ذاك الترشيخ شيئا حيث كنت غائبا مغيبا عن عالم التدوين

وفقك الله ...وأتم عليك بنعمه

الحارة سد

تأثير الفراشة يقول...

السلام عليكم و رحمة الله و بركاته

تحياتى لحضرتك، أتمنى تكون بخير بإذن الله

بالنسبة لأم البنات، البقاء لله، رزقها الله الصبر و السلوان إن شاء الله

ألف مبروك على الاختيار ، أنا عرفت دلوقتى بس من البوست، وفقك الله دائما

بالنسبة للغياب عن التدوين، مكنتش اعرف إن فيه ناس كتير تغيبت كده، لأنى كنت متغيبة أنا كمان، على العموم بالتوفيق لحضرتك، و بإذن الله تعود مرة أخرى ببوستات ممتازة كالعادة

تحياتى لحضرتك

Unknown يقول...

السلام عليكم ورحمة الله تعالى وبركاته
حترجع امتى ياصيدلى
(بحق وحقيق مش كده وكده:)؟
عايزين نشتغل بقى:)

Me7'o يقول...

خد يا عم إنت تعال هنا

إنت من فين يا عم من بنى سويف
وإزاى معرفتكش قبل النهاردة

تعال تعال

إحكيلى بقى يا سيدى
إنت منين بالظبط من بنى سويف
أنا من الجزيرة
ياللااااااااااااا
عاوز رد سريع وحاسم

ههههههههههه

تحياتى

نوسه وريمان فى هاكونا مطاطا يقول...

معقول يا دكتور ياسر عايز تعمل ريستارت لنفسك


طب تعالى هاكونا مطاطا حالا

واحنا نعملك ريفريش

انت ليه هنا؟

لا لا تعالى بسرعه عندنا


تيمون وبوبما عايزينك

هاكونا مطاطا

مش هتقدر تغمض عنيك

هاكونا مطاطا تهييس للصبح

هاكونا مطاطا ... لااااا للملل


هاكونا مطاطا... قول لاء للهم

هاكونا مطاطا.... اوعى تزعل ابدااا

هاكونا مطاطا... ارمى الماضى ورا ضهرك


انسى الماضى اللى يغيظ


يلاااااااااا تعالى مستنى ايه

سلوى يقول...

ربنا يوفقك واجازة سعيده ان شاء الله

والبقاء لله لأم البنات

شمس النهار يقول...

ازيك
يادكتره
الحمد لله انك خلصت امتحانات علي خير وان شاء الله بالنجاح الباهر
انت ماكنتش تعرف اني في امريكا المحطه
يابني ده اوباما قالها في خطابه الاخير مع الترحيب بحضرتي طبعا

mimi يقول...

خد أجازة ... بس اوعدنا ترجع تاني

بألف سلامة


في رعاية الله


برجاء كتابة لينك مدونة ام البنات في مدونة ايد واحدة

لتقديم واجب العزاء

http://a7walnaaa.blogspot.com/


شكراااااااااااااا

Dr. Kafy يقول...

السلام عليكم
أول زيارة لى لمدونتك و هى جميلة.

حمدا لله على سلامتك من الإمتحانات و بالنجاح
تحياتى

MǿиY El-Shreef يقول...

يلا بقى انزل ببوست جديد

غير معرف يقول...

تحياتى لك
هو دعوة و ليس تعليق
وضعت رابط يضم 300 موقع ثقافى و أدبى

http://shayunbiqalbi.blogspot.com/2009/07/blog-post_23.html

أتمنى أن يحوز اعجابك
وترسلها لاصدقائك

لاسع افندى يقول...

اجازه سعيده بس ماتتأخرش علينا


تحياتى

♥نبع الغرام♥♪≈ يقول...

السلام عليكم

ربنا معاك ان شاء الله ومنتظرين عودتك

ايناس

نوسه وريمان فى هاكونا مطاطا يقول...

انت لسه هنا؟
لا لا تعالى بسرعه عندنا


تيمون وبوبما عايزينك


كل ما تضحك اكتر كل تاكل بطاطا اكتر

هاكونا مطاطا

مش هتقدر تغمض عنيك

هاكونا مطاطا هديتنا لكل المدونين عشان نخرج من حاله النكد

هاكونا مطاطا تهييس للصبح

هاكونا مطاطا ... لااااا للملل


هاكونا مطاطا... قول لاء للهم

هاكونا مطاطا.... اوعى تزعل ابدااا

هاكونا مطاطا... ارمى الماضى ورا ضهرك


انسى الماضى اللى يغيظ


يلاااااااااا تعالى مستنى ايه

الازهرى يقول...

بصرااحة المل كده بدأ يقل

انت فين الجديد يا عمنا

محمد بن خالد الحليبي يقول...

الأخ الفاضل : وفقك الله وأعانك ويسر لك أمورك وجعل طريقك مليئا بالتوفيق والنجاح والتميز ..

مزيدا من التميز أخينا ..

صيدلانيه طالعه نازله يقول...

كلنا للاسف بنمر بحاله ملل و زهق من اى حاجه و من كل حاجه
ربنا يهدينا جميعا و يرحمنا
و ترجع لينا بالف خير و سلامه

yara يقول...

اخي الفاضل ..
انار الله قلبك وطريقك وان شاء الله بالنجاح والتوفيق كما تحب وترضى من الله ..
هذا مرور الاول فاسمح لي بوضع حروفي هنا لاعجابي لمدونتك ,, واسمح لي بوضع اللينك لدي في المدونة ..
القالب رائع اسمح لي .. جرب الرابط هذا فهو لنفس قالبك ولكنه معرب .. ولكن عليك حفظ الاضافات المضافة لديك في المفكرة لان عند نغير القالب تختفي
http://italib.blogspot.com/2009/04/red-light.html

والاختيار لك اكيد ولكنني ادعم القوالب المعربة لما فيها خاصية دعم للعربية وتعريب اخي الطالب لا يعلى عليه صراحة ...
دمت كما تحب ..

Ebraheem Aadam يقول...

حمد الله بالسلامة على رجوعك يا واد ,
شرفن و نورت :)

Dr. Ibrahim يقول...

ترجع بالسلامة يا فندم

فشكووول يقول...

السلام عليكم دكتور ياسر

انا اول مره اعلم بوفاة والد ام البنات ولذلك ساذهب اليه لاعزيها

عارف هما ليه بيزهقوا من التدوين عشان مصربعين كل يوم عايزين ينزلوا بوست وانا مريت وامر بالحاله دى وعشان كدا عملت لها علاج مميز وهو انى اكتب بوست كل اسبوعين من ناحيه انى اريح نفسى فى البحث عن المواضيع وتيجى المواضيع بالصدفه ومن الناحيه التانيه متابعة المدونات والرد على التعليقات محتاج وقت كبير جدا وجهد اكبر وقلت افرق الوقت والجهد ده على اسبوعين وكانت والحمد لله الان مش زهقان .. بس زمقان وخلاص ..
تحياتى